الحل الأمثل لموضوع طقطقة الكبالن و عن تجربة سنين

اقولكم على حل رائع لموضوع طقطقة الكبالن بيعالج المشكلة دي نهائيا و الكوبلن مايطقطقش تاني ابدا و تنساة

ومن غير ماتملاة مهما كان الكوبلن دة ضايع و بيطقطق جامد, بس تكون الشبكة بتاعته سليمة مش مكسورة

خللي العفشجي يفك الكوبلن و يغسلة من الشحم تماما بجاز و يطهرة ببنزين

و بعدين تجيب بلاك من اللي بيسيح عالنار من اي موان

و تخللي العفشجي يسيحة و يصبة مصهور جوة الكوبلن لتحت و الاكس راكب و يكون حاطط كاوتشة جديدة في الاكس الاول

ويملا البلاك لغاية ما الكاس بتاع الكوبلن يتملي و يسيبة مقلوب (المشرشر لتحت) 3 دقايق لغاية ما البلاك يشد و بعدين يركب الكاوتشة بكوليهين و يركبة في العربية

و انسى ان الكوبلن دة يطقطق او يعمل اي مشكلة بتاتا و لمدة سنين مهما استعملتة بعنف و قرصت حتى بنزين في الملفات من غير ماتمور

انا عملت الموضوع دة في عربيات كتير و عاش الكوبلن سنين لغاية ما بعت العربيات و لا فكرت فية تاني, بيتعمل و يتنسي تماما بس عيبة ان في الشتا و البرد شديد قوي حاتلاقي الدركسيون وانت لسة بتطلع من ركنة ناشف قوي و بعد 3 دقايق مشي حايكون طري من سخونة الطنابير و يبقى تمام

و أحذر قوي انك تنزل مياة عالية بسرعه و تطلع تلف الدركسيون ملف جامد, لأن برضة البلاك حايشد و ينشف قوي و تلاقي الدركسيون تقل لمدة دقايق و بعدين يفك تاني

والله أقتراح كويس
بس معتقدش أن حد هيخاطر بالموضوع ده فى عربية جديده ممكن فى 128 أو أكسيل بالكتير أوى
هو حضرتك جربته فى عربيات نوعها ايه؟

جربتة في هوندا اكورد و سيفيك و جولف و ريتمو و 128 و مازدا 323 و ربما سيارات اخرى كمان لا أذكرها

فكرة عجيبة بس قابلة للتجربة
شكرا

فكره جميله و التجربه مش حتخسر.
شكرا يا فهد باشا

اقتباس:

---

فكره جميله و التجربه مش حتخسر.

---

معلش انا مش معاك
لو فشلت التجربة هتخسر الكوبلن شوف هو بكام دلوقتى

ماهو أكيد محدش هيعمل كده في كوبلن كويس...أكيد ده هيتعمل وقت ما الكوبلن يطقطق. و ساعتها هيبقي يأما تغيره يأما تجرب الطريقة دي.

اقتباس:

---

ماهو أكيد محدش هيعمل كده في كوبلن كويس...أكيد ده هيتعمل وقت ما الكوبلن يطقطق. و ساعتها هيبقي يأما تغيره يأما تجرب الطريقة دي.

---

معتقدش انى ممكن أفكر فى الموضوع ده خالص لو حصل لا قدر لله والكوبلن طقط هغيرة على طول
العمر مش بعزأة لو الكوبلن فرط منك على سرعه عالية كل سنة وانت طيب :-? :neutral:

فكرة غريبة

ياجماعة واحد ميكانيكى عملى العملة دى فى عربيتى 127 الطيبه وبعد مامشيت بيها لقيت فردة بتلف اسرع من فردة والعربية كانت بتسخن وبتمشى الصبح كانى شادد فرامل اليد

اقتباس:

---

لقيت فردة بتلف اسرع من فردة والعربية كانت بتسخن وبتمشى الصبح كانى شادد فرامل اليد

---

This Is Logic

اقتباس:

---

المشاركة الأصلية كتبت بواسطة ahmedsrs

ياجماعة واحد ميكانيكى عملى العملة دى فى عربيتى 127 الطيبه وبعد مامشيت بيها لقيت فردة بتلف اسرع من فردة والعربية كانت بتسخن وبتمشى الصبح كانى شادد فرامل اليد

---

والله انا عملت الموضوع دة اكتر من 7 او 8 مرات عند عفشجي محترف و هوة صاحب و مجرب الفكرة دي من سنين و مافيش مرة عملت كدة معاة و لا معيا و لا أي مرة حصل اي عيب غير ان و العربية باردة في الشتا بيبقى الدركسيون تقيل لمدة دقيقة و العربية مركونة و اول ماتمشي يخف عادي

اكيد اللي عمللك كدة كان مش مركب صليبة الكوبلن كويس في الفتيس او المشرشر مش بايت صح في الطنبورة وبالتالي مافيش Traction عالعجلة دي مش بسبب ملو الكوبلن بلاك

لأن ملو الكوبلن بلاك مالوش دعوة بسرعه دوران العجل خالص لأن اللي بيحكمة ساعتها هوة إحكام مشرشر الكوبلن و تربيط الصليبة في الفتيس

و عمر الكوبلن ما يفرط و هوة مملي بلاك بتاتا و مافيش اي خطورة بالتالي

اقتباس:

---

المشاركة الأصلية كتبت بواسطة Ruin Scud

اقتباس:

---

لقيت فردة بتلف اسرع من فردة والعربية كانت بتسخن وبتمشى الصبح كانى شادد فرامل اليد

---

This Is Logic

---

not really, cause filling the coupling wouldnt effect on the traction, getting no traction on wheels allocated to not tightening the couplings into the wheels or the gear box, thats would be if they were not installed correctly, i've tried this idea many times and didnt get this effect even once

اقتباس:

---

المشاركة الأصلية كتبت بواسطة TAG_Turbo0

اقتباس:

---

ماهو أكيد محدش هيعمل كده في كوبلن كويس...أكيد ده هيتعمل وقت ما الكوبلن يطقطق. و ساعتها هيبقي يأما تغيره يأما تجرب الطريقة دي.

---

معتقدش انى ممكن أفكر فى الموضوع ده خالص لو حصل لا قدر لله والكوبلن طقط هغيرة على طول
العمر مش بعزأة لو الكوبلن فرط منك على سرعه عالية كل سنة وانت طيب :-? :neutral:

---

و كل سنة و انت طيب و بخير و صحه وسعادة

عمر الكوبلن ما يفرط و هو مملي بلاك بل بالعكس بيبقى محكوم جدا و ثابت عن و هوة مملي شحم, لأن البلاك أتقل و تماسكة أعلى

غير ان الكوبلن عمرة ما يفرط و انت ماشي بسرعه في طريق مستقيم

الكوبلن بيفرط بس و انت كاسر العجل عالآخر, و بالتالي عمرك ما حاتكسر العجل لآخر الدركسيون و انت ماشي على 100 ولا حتى 60 ( لأن العربية ساعتها كدة كدة حاتتقلب)

الكوبلن يفرط بس و انت كاسر العجل للآخر و بالذات مع مطب و تحديداً حفرة عميقه تخللي العجلة تنزل جامد مع كسرة العجل

صباح العسل يا شباب

موضوع ظريف جدا وفكرة مفتكسة

هو انا بس مشكلتى انى محسوك شوية فى مواضيع الميكانييكا دى، وبالتالى انا بحب افكر فى الموضوع بكل ابعاده

ايه اللى هنكسبه او نخسره لو ملينا الكوبلن بلاك (البلاك هو الزفت بتاع العزل -زفت دى مش شتيمة لكن هو اسمه كدا-زفت)

نظريا مش هنخسر حاجة، احنا هنجيب كوبلن بايظ وهنحوله الى صورة اشبه ما تكون للكوبلن الكاوتش بتاع السيات، وصلتين معدن وبينهم مادة مطاطة تنقل الحركة وتمنع التخبيط، كلام عظيم جدا

لكن

علشان نفهم البعد السلبى لهذا الأمر لازم ناخد فكرة بسيطة جدا عن أسلوب عمل الكورونا، بداية لازم نعرف ان مافيش عربية مافيهاش كورونا، سواء كانت جر امامى او دفع خلفى، عربية الدفع الامامى بتكون الكورونا بتاعتها جوة جسم الفتيس، والكورونا ببساطة منظومة مكونة من 3 تروس منها ترس حر وظيفتها الأساسية استقبال الحركة من الجير بوكس واخراجها للعجلتيين مع وجود منظومة تسمع بأن يكون احد عمودين الخرج اسرع من الآخر لو احتاج الامر لذلك(وهو ما يحققه لنا هنا الترس الحر)، وتبرز الحاجة لهذا فى الملفات لأن عجلة تلف اسرع من الأخرى، يعنى لو عربية مافيهاش كورونا مش هينفع تحود

حيث ان هذا الموضوع ليس هدفه فى الاساس شرح الكورونا فلو حد عايز يستزيد ويستفيض عن الكورونا عليه بالرابط ده

http://en.wikipedia.org/wiki/Differential_gear

طب انا ايه اللى خلانى جبت سيرة الكورونا هنا، فى سيارات الجر الامامى الكورونا هى آخر عنصر فى آلات الجر موجود قبل الكبالن، يعنى الخرج بتاعها رايح لعمود الكوبلن مباشرة، والسبب التانى ان ما يدفع الترس الحر فى الكورونا الى الحركة لكى يخلق فرق فى سرعة بين العمود االيمين والعمود والعمود الشمال هو وجود فرق عزم بين العمودين،
معناه ايه الكلام المكلكع دا، معناه ببساطة ان لو فيه عجلة مقاومتها للعزم اللى جاى من الكورونا اكثر من التانية فببساطة الكورونا هيتهيألها ان فرق العزم ده ناتج عن العربية بتاخد ملف وتخلى العجلة اللى الناحية التانية تلف اسرع، وده معناه مباشرة حدفة فى العربية

طيب هييجى منين فرق المقاومة واحنا ماشيين طوالى والكوبلن دوره هنا كأنه صامولة ربط بين العجلة وأكس الجر ، لأماهى الصورة مش بالبساطة دى، لان حالة ان عمود الجر يكون على استقامة واحدة مع العجلة دى حالة نادرة جدا ولا تحدث تقريبا، دايما العمود مايل عالى العجلة بنسبة بسيطة كما ان مرتفعات ومنخفضات الطريق واستجابة نظام التعليق بتخلى عمود الجر فى حالة ميل دائم على العجلة وده معناه ببساطة ان الكوبلن دايما فى حالة شد وجذب حتى لو احنا ماشيين فى طريق مستقيم

طيب لو احنا عندنا اتنين كوبلن واحد فيهم سليم والتانى بايظ ومملى زفت، طبيعى ان حركة اجزاء الكوبلن السليم بالنسبة لبعضها هتكون حركة سلسة جدا وبدون مقاومة شديدة، فى حين ان الكوبلن المزفت حركه اجزائه بالنسبة لبعضها تقيلة و هتخلق مقاومة على الكورونا وده هيئودى مباشرة الى ان ترس الكورونا الحر يعوض العزم ده بتسريع العجلة ذات الكوبلن السليم ويؤدى لحدفة فى اتجاه عجلة الكوبلن المزفت ، وهذة الحدفه لو رحت لشيخ مشايخ صنعة الزوايا مش هيلاقيلها سبب

هتقول طب نزفت ال 2 كوبلن ونخلص، ده هيؤدى معاك لمشكلتين ، اولهما هى فقد جزء من طاقة المحرك فى مقاومة الزفت، ثانيا مين اللى قال ان حتى لو زفتنا ال 2 كوبلن مقاومتهم هتكون زى بعض ، طبقتين الزفت مش بنفس السمك لان التآكل فى الكوبلنين غير متساوى ، وبالتالى غالبا هتحدف برضه

ننقل لعيب تانى من عيوب الفكرة دى الزملاء طرحوه ، الزفت بيشد جدا فى درجات الحرارة المنخفضة، يبقى هيطلع عينى مع الديريكسيون فى الشتاء ده اول هام، ثانيا لو العربية باور ستيرنج يبقى انا بقصف عمر الباور ستيرنج بتاعى علشان مش عايز اشترى كوبلن،

اما الكارثة الحقيقة فهى لو انت ماشى فى المية ، اى فى جو المطر شتاء، الزفت هيحجر وهتلاقى الديريكسيون زى الطوبة تحت ايدك وممكن لو اتعافيت عليه بيضة بارة الدريريكسون تملص او البارة نفسها تتكسر

نصل فى النهاية الى انه حل قد يكون مناسب جدا لسائق تاكسى عايز يلم الللية من غير ما يدفع فلوس وهو كدة كدة مش بيمشى اكتر من 60، لكنه حل غير عملى وغير آمن لحد بيهتم بالحصول على النهاية العليا لأداء السيارة

دكتور والله يا خالد
ممكن اسميك دكتور خالد
انت لو فتحت مركز او اشرفت علية بديني ماروح التوكيل ولا اخطية تاني
غير في الصيانات المجانية

:D :D :D :D

ملو الكوبلن بلاك يا سبعاوي انا عملتة في عربيات استخدمتها سنين و لا حصل اي تغيير في سحب العربية و مشيت بيها فوق ال 160 و لا أتأثرت و لا حاجة, و حصل برضة ان مليت كوبلن واحد و التاني لأ لفترات و ماحصلش موضوع ان سرعه دوران العجل تتغير و لا احس ان عجلة بتقدم عن عجلة او ان العربية تقيلة في السحب

و طبعا انت عارف ان الهوندا فيها باور ستيرنج و كذلك و لا حصل اي عطل و لا غيرت اي قطعه غيار في الباور لا طلمبة الباور و لا السكاترا مع الاستعمال بكبالن مملية بلاك لسنين

وزي ما قلت فعلا هو الدركسيون بيبقى تقيل قوي وو العربية مركونة الصبح في الشتاء بس اول ماتمشي 50 متر الدركسيون بيخف و يبقى عادي جدا

و موضوع المشي في المياة هو فعلا بيخللي البلاك يحجر و يجمد و اول ماتطلع من المياة تلاقي الدركسوين تقيل قوي و بعد 100 متر مثلا من دوران الكوبلن و سخونة الطنابير بيفك البلاك و يرجع عادي, و دة عيب الملو بلاك

بس غير كدة الكوبلن بيعيش سنين و لا يفرط و لا يطقطق مهما استعملتة بعنف

و الكلام دة عن تجربة لسنين و في عده عربيات

اقتباس:

---

المشاركة الأصلية كتبت بواسطة Adham

ملو الكوبلن بلاك يا سبعاوي انا عملتة في عربيات استخدمتها سنين و لا حصل اي تغيير في سحب العربية و مشيت بيها فوق ال 160 و لا أتأثرت و لا حاجة, و حصل برضة ان مليت كوبلن واحد و التاني لأ لفترات و ماحصلش موضوع ان سرعه دوران العجل تتغير و لا احس ان عجلة بتقدم عن عجلة او ان العربية تقيلة في السحب

و طبعا انت عارف ان الهوندا فيها باور ستيرنج و كذلك و لا حصل اي عطل و لا غيرت اي قطعه غيار في الباور لا طلمبة الباور و لا السكاترا مع الاستعمال بكبالن مملية بلاك لسنين

وزي ما قلت فعلا هو الدركسيون بيبقى تقيل قوي وو العربية مركونة الصبح في الشتاء بس اول ماتمشي 50 متر الدركسيون بيخف و يبقى عادي جدا

و موضوع المشي في المياة هو فعلا بيخللي البلاك يحجر و يجمد و اول ماتطلع من المياة تلاقي الدركسوين تقيل قوي و بعد 100 متر مثلا من دوران الكوبلن و سخونة الطنابير بيفك البلاك و يرجع عادي, و دة عيب الملو بلاك

بس غير كدة الكوبلن بيعيش سنين و لا يفرط و لا يطقطق مهما استعملتة بعنف

و الكلام دة عن تجربة لسنين و في عده عربيات

---

ادهم باشا رغم اني مصدقك لانك عملتة عن تجربة اكتر من مرة
بس حاسس انه ينفع مع العربيات اللي كبالنها غالية وبعد ماتفرط خلاص
ولازم يكون كمان موتور عفي عشان يعوض العزم اللي هايضيع في النص
يعني في الاكورد تمام
لكن 128 ماظنش ولا اكسيل 1300 ولا برايد
دول كبالنهم بكلام فاضي

أدهم باشا
أنت عملت الموضوع ده فين

الاخ ادهم ده عبقرى و فكرته مفيده لناس كتير بس انا لو كوبلن عربيتى طقطق هجيب واحد اصلى من التوكيل ولو مش معايه ثمنه مش هركب العربيه لغايه ما يبقه معايه ثمنه ولا يمكن افكر فى الحل ده ابدا ولا حتى انى اصلحه اصلاح عادى (انا مبدأى فى العربيات انى اخير بالأصلى و انسى)

:hornytoro::hornytoro::hornytoro:
وجدت ناس فى بعض المنتديات الاجنبية بيلغوا الكوبلن نهائى زى صور المرفقات
:049:
لكن معرفش بيتم التعديل ازاى لاءى عربية??!!!

هي المشكلة اللي محدش لفت النظر إليها ..إن موضوع البلاك ده هيكتم صوت الطقطقه فعلا ..لكن مش هيحل مشكلة إن الكوبلن ضاع من عمره الإفتراضي خمسين أو ستين أو سبعين في المائه مثلا ..

طبعا كل اللي في المنتدى هنا عارفين إن الكوبلن بيبقى في بلي وشبكه ...وسبب الطقطقه وجود حفر أو شروخ في البلي بتاع الكوبلن ..واللي بيحصل إن مع الضغط على الكوبلن في حالة الملفات الشروخ أو الحفر اللي في البلي لما بتحتك جامد مع المجرى اللي البلي بيمشي عليه بحصل الصوت ده

دي فكره الكوبلن بإختصار شديد قويييي

طيب ما أنا لما أحط بلاك ..كل اللي انا عملته إني منعت الصوت بس ...لكن برضه لسه في عندي شروخ وتجاويف في البلي بتاع الكوبلن ..والشروخ والتجاويف دي بتزيد ..نتيجة إحتكاك البلي بالمجاري اللي هو بيمشي عليها ..يبقى أنا بدل ما كنت بعرف إن الكوبلن عمل مشكلة معايا وإن الصوت ده مؤشر لوجود المشكلة ..أنا كده لغيت المؤشر ده ..يبقى أنا كده في النهايه تقريبا ..بضحك على نفسي

زي ما يكون واحد ضرسه مسوس وبيضرب مسكنات ..هو المسكن ما عالجش تسوس الضرس ..هو سكتله الألم بس مش أكتر

http://www.nilemotors.net/Nile/3876003561-post8.html

:B4_048::B4_048::B4_048::B4_048::B4_048::B4_048::B 4_048::B4_048: