الموضوع: صيانة ال 1000 للسيراتو...مريبة

يا جماعة حد يفيدني يمكن اكون انا شكاك او جديد على موضوع الصيانات الدورية ده
انا معايا كيا سيراتو 2010 [overline]خليجي[/overline] مشتريها من معرض الطارق للسيارات (اللي بيقدم خدمة انه بعد البيع يحجزلك الصيانات و يبعتلك مندوب يستلم منك العربية و يوديها الصيانة أو يروح معاك مركز الخدمة)

المهم انا رحت اعمل صيانة الألف مع المندوب و فوجئت ان مركز الخدمة اللي واخدني عليه اسمه أولاد صبحي سند في طريق المطار و مش متخصص في كيا هو تويوتا شغال فورد شغال ميتسوبيشي شغال و كمان هيونداي و كيا و دي حاجة خلتني مارتحتش من الأول (حدد يصححني لو انا غلطان)

اول حاجة ما شفتش العربية بيحصل فيها ايه داخل المركز لا بشاشة في مكان استراحة العميل كما اسمع عن مركز محمد زكي مثلا و لا حتى خرم في حيطة تشوف منه العربية بعملولها صيانة اصلا ولا بينصبوا عليك

ثانيا: تم تغير الزيت بموبيل 1 (مش شل هيليكس زي ما موصى المصنّع) و [overline]بدون تغيير الفلتر[/overline] (دي اكتر حاجة قالقاني في الموضوع كله يا ريت ردود الأخوة تركز على النقطة دي)

الباقي كان "على حسب ما مكتوب في الفاتورة" تربيط عفشة و ضبط اطارات و كشف على البطارية و الأنوار و الهلس ده

ثالثا: لم يتم ختم كتيب الضمان و الصيانة مع العلم ان العربية مالهاش ضمان علشان خليجي بس معاها الكتيب - اكتفوا بفاتورة و ايصال بال 300 جنيه اللي دفعتهم (235 موبيل 1 و 65 مصنعيات) و الفاتورة و الايصال موقعين بس بدون أختام!

رابعا: قالولي الصيانة الجاية عند ال 10000 مفيش صيانة عند ال 5000


اتصلت بشركة الطارق بعد ما الشك كلني قالي مركز أولاد صبحي سند ده هو اللي شغال في السيراتو الخليجي و باسعار معقولة على خلاف التوكيل اللي بيزود في تمن صيانة الخليجي (بس على فكرة عربيتي كانت السيراتو الوحيدة في المركز و الباقي ماركات أخرى - انا كنت خايف تبقى اول سيراتو يعملوها صيانة و دايما الخوف من "بتاع كله" ده)

مش عارف هل كل ده طبيعي و انا مزودها و لا في حاجة او حاجات غلط و العمة ادككتلي لحد عنيا
يا ريت اللي عنده اجابة او حتى تعليق على الكلام ده ما يبخلش عليا بالرد و انا شاكر جدا لكل الردود

خدمات التأمين لشركة الطارق اتصلوا بيا يسالوني الصيانة عجبتك رحت مهزقهم و قلتلهم انتو موديني لمركز خدمة مش معتمد من كيا قالولي يعني كده ولا تدفع اكتر في التوكيل علشان عربيتك خليجي قلتلهم انا شاري عربية مش رخيصة اكيد مش عشان 100 او حتى 200 جنيه زيادة هبهدل العربية البت قالتلي خلاص طالما الفلوس مش فارقة معاك احنا ممكن نعملك الصيانة بتاعة ال 1000 تاني في مركز خدمة تابع للوكيل, قلتلهم على حسابكو قالتلي لا على حسابك مش الفلوس مش فارقة معاك؟ قلتلها نعم ياختي مش فارقة معايا لو هدفع فلوس اكتر في الاول ماشي مش ارمي 300 جنيه على الارض و اروح ادفع كمان 500 تاني قالتلي طيب هخلي مدير خدمات الصيانة يكلمك

كلمني مدير خدمات الصيانة اسمه عادل قعد يقاوح معايا و قعد يحلفلي بأغلظ الأيمان بالآتي:

1- ان التوكيل نفسه بيغير زيت للكيا سيراتو موبيل 1
2- ان عدم تغيير فلتر الزيت عادي جدا و دي حاجة تابعة لرؤية المهندس (خلي بالكو ده غير من شل لموبيل و ما غيرش الفلتر و بصراحة انا شاكك ان ماكنش عندهم فلتر للسيراتو اصلا)
3- ان صيانة النيو سيراتو 2010 بتبقى عند ال 1000 و ال 10000 و مفيش 5000

قالي اللي بيقول غير كده ما بيفهمش

المهم شدينا مع بعض و كان ناقص نسب لبعض
قفلت معاه و انا كاره نفسي و العربية و البلد ده غير ان كل ده كنت مزنوق في زحمة الدائري بتاعة امبارح

المهم بعد ما نزلت من العربية خدت بالي لاول مرة ان بتوع خدمة الصيانة التعبانة لازقينلي على الشنطة ستيكر ما بيطلعش بالطبل البلدي مكتوب عليه اسمهم و عنوانهم و عيالهم (بدون اذني)

و افتكرت دلوقتي حالا و انا بشوف مواضيع المنتدى ان انا كمان عندي بالونة في الكاوتش (انا جنط 17) و محدش جاب سيرتها في الصيانة مع انها من فترة طويلة

طلعت البيت و انا حاسس اني عايز اشجع الجزائر في الماتش الجاي (مع اني متعصب جدا لمصر)
انا مش عايز اعقد حد بس بجد انا شفتش راحة البال من ساعة ما اشتريت العربية و دي اول عربية اشتريها لنفسي في حياتي و كنت معتقد ان الدنيا هتضحكلي اول ما اركبها!
الواحد ما بيلاقيش العزاء غير في الفضفضة مع الناس في المنتدى هنا