الموضوع: ألف شكر لسيادة العقيد خالد...كلاكيت ثانى مرة

بالأمس....كان ميعاد صيانة ال 40 ألف حسب الحجز الساعة 8 صباحا
كالعادة وصلت 7:50 ص
طابور مكون من 10-12 عربية و أنا فى المنتصف

بخلاف الصيانة كنت بأشتكى من :-
الهواء الساخن بيدخل للمقصورة مش عارف منين ( غالبا من فتحات التكييف )
العربية بتحدف شمال
لمبة إشارة لا تعمل
صوت حشرجة من مراوح التكييف

و بالفعل كنت مبلغ فى التليفون بالكلام ده

إللى حصل كالآتى :-
العربية دخلت الساعة 8:10 ...تم عمل اللازم من تغيير زيت بفلتره و بوجيهات و مياه بطارية و مساحات و فلتر هواء و تم تجربة السيارة و الكلام ده انتهى الساعة 9:15

من 9:15 إلى 12 لم تمس السيارة يد....و طبعا الساعة 12 ميعاد الراحة حتى 1 ...
الظريف إنى كنت متابع لأعمال تصليحات بجهاز ظبط الزوايا و التى تم الانتهاء منها بحلول الساعة 1 ...و من ثم انهمرت السيارات المنتظرة مثل سيارتى على الجهاز...سيارتى كانت الثانية من بعد تلك الكليو الزرقاء...
تم تجربة ظبط الزوايا أكثر من مرة....و فى آخر محاولة تم تبديل أماكن الإطارات الأمامية مع بعضها...
بعد ذلك اختفت السيارة عن الأعين لمدة ساعتين....
بنهاية اليوم....تمت محاولة يائسة ( و لكنها تحققت فيما بعد ) لمحاولة إقناعى بإن فك التابلوه لتنظيف فتحات التهوية يتطلب عملا شاقا و طويلا و من الأجدى الإتيان بها فى يوم آخر...لكنى رفضت...فليس من المنطقى أبدا الانتظار 8 ساعات و فى النهاية لا أحصل على ما أريد...
المهم....مرت الدقائق المريرة من بعد الساعة 4:15 حتى الساعة 4:35 ...و كنت آخر شخص داخل الصالة....أغلقت الأنوار و الكافتيريا و الحمام أصلا كانت المياه مقطوعة فلم أدخله طوال اليوم و حيث أنه لم يتبق غيرى فبادر رجل الخزنة ( الكاشير )...
"حضرتك لك عربية جوه ؟ "..
آآآه...
"بإسم مين ؟ " ...
" بإسم ....."...
" 843 جنيه .."...
" هى خلصت ؟؟؟!!!!"...
أيوة
طبعا أنا تمام التأكد إنها ما خلصتش...لكن دفعت علشان أنتقل للمرحلة الأخرى..و بينى و بينكم كان دمى فائر و أنا فى ثورة داخلية...و ناوى على الشر...علشان ما يرضيش ربنا أبدا أقعد 9 ساعات من 8 إلى 5 و فى الآخر يقولوا لى تعالى بكرة أو سيبها تبات عندنا...خصوصا إن المعضلة كلها فى موضوع فك التابلوه و تنظيف الفتحات و المراوح و تغيير لمبة إشارة......

المهم ...رحت أستلم العربية و أنا متأكد إن اللمبة ما اتغيرتش و لا المراوح اتنظفت...حطيت الكارت..دورت...إشارة...زى ما هى....اللمبة ما اتغيرتش..فتحت المراوح..زى ما هى...دورت على مهندس الاستقبال ..مش لاقيه...رحت لمهندس استقبال تانى...قلت له..أنا هنا من 8 و العربية ما اتصلحتش...جاب المهندس إللى استلم منى... و إللى بدوره جاب مهندس تانى من جوه و فى لحظة اللمبة كانت اتصلحت ( مجرد مهزوزة لكن سليمة ) و قعدوا يتكلموا ( بعد ما استأذنونى فى إنى أستنى فى الاستراحة { المظلمة } ) شوية على ما يخلصوا....
و فى الآخر...لازم يا إما آجى بكرة..أو أسيبها الليلة..
أنا طبعا سيبتها و لكن ناوى على عدم السكوت بأى طريقة مش هأسكت...لكن الوقت كان مش بتاع رغى...الساعة 5 و الناس مشيت و أنا ناوى على تصعيد...

المهم ركبت و كلمت العقيد خالد ( بارك الله فيه ) و استشرته فى التصرف الصائب و هو سمع منى الحدوتة و قال لى ..خلاص أنا هآجى معاك بكرة و نشوف المهندس خالد شلبى و لا هنعرف نقابل مين ....

تانى يوم...وصلنا التوكيل...سألنا على خالد شلبى قالوا لسه مش هنا...طلعنا على أ/ رفيق عبد الله....قال لنا إنه مش فى مصر..طيب ممكن نكلم مين ؟...بعد شوية قابلنا" م/ عمرو أبو الفتوح "( مدير خدمة العملاء )...

سمه مننا الكلام و تفهم سبب غضبى و أوضح لى إن المشكلة تكمن فى ضيق المساحة فى المقطم و كمية الشغل و رفض العملاء الذهاب إلى فرع العبور...فبالتالى الضغط كبير و بيضطروا إلى أنهم يؤجلوا الأعمال الأقل حتمية إلى يوم آخر لكى يستطيعوا خدمة أكبر عدد ممكن من السيارات فى نفس اليوم....

طيب إزاى نساعدكم ؟؟...الجواب يا إما نروح فرع العبور الأكثر هدوءا و سعة...يا إما لو أنا حاسس إن العربية محتاجة وقت فى الشغل المطلوب يبقى أوضح لمهندس الاستقبال إنى ممكن أسيب العربية لتانى يوم فيقدروا يشتغلوا براحتهم بدون عجالة التى قد تؤدى إلى سهوة أو سقطة أو اضطرار إلى ترحيل أعمال ثانوية إلى يوم آخر

و أوضح لى إن هناك نية أكيدة لإحداث إصلاحات داخلية لتلافى مشاكل من نوعية ما صادفت فيما يتعلق بالتنظيمات الداخلية للعمل و أيضا هناك نية أكيدة لبعض التوسعات الطفيفة فى المقطم لكى تتقدم وتيرة العمل قليلا خصوصا إن الانتقال إلى أبو رواش أمر مستقبلى لكن ليس عن قريب...

أنا فى المقام الأول أحب أن أشكر العقيد خالد أولا على اهتمامه الشخصى بنا كأخ كبير لنا و نردها لك فى الخير دايما ...

و أشكر EIM على تجاور مكتب مدير خدمة العملاء لمنطقة الاستقبال و الاستراحة و أخص المهندس عمرو أبو الفتوح لتفهمه و تقبله و أنتظر منه تحقيق الأمنية التى طالما حلمنا بها و هى وجود رأى خبير من EIM فى قسم رينو فى المنتدى ( و بالفعل المهندس عمرو أبدى اهتماما بالموضوع و وعد بإحراز تقدم فى هذا الاتجاه ) و أنا متأكد أنه هيعجب بالمجهودات التى بذلهاالأعضاء الوحوش فى القسم على وجه الخصوص و فى المنتدى على وجه العموم

و شكرا لأستاذ رفيق لاهتمامه بالعملاء بالرغم من أنه لا يختص بتاتا بمشاكل ما بعد البيع و لا الصيانة...و هو ما يميز غالبية العاملين ب eim حتى أصبحت هى السمة المميزة لهم

و الحمد لله قدرنا نغير حزام الأمان و مفصلة الباب فى سيارة العقيد خالد داخل الضمان نظرا لوجود بوادر تلف و هو ما تم فى وقت و توقيت قياسيين...دخلنا الساعة 2 و خرجنا 4 ...و أستغل الفرصة لشكر المهندس أيمن فى قسم ال bODY woRKSHOP على مجهوداته معنا...

الحمد لله ..موضوع الحدفة شمال تحسن كثيرا جدا عن الأول..و الشهادة لوجه الله...الموضوع ده اتحل قبل ما نتكلم مع المهندس عمرو إطلاقا...و هما أخدوا وقت لحد ما حلوا الموضوع ده و أنا شفت بنفسى العربية اتجربت مرات عديدة...
و موضوع الهواء الساخن ده مالوش حل..المهندس عمرو فهمنى إنه ضرورى يوكون فيه هواء يدخل العربية علشان الركاب ما يتخنقوش لو قافلين الزجاج...فى بعض العربيات بتكون الفتحات فى الخلف و فى البعض بتكون فى الأمام...و للتحايل على الموضوع يمكن تحويل مسار الهواء لأعلى و قفل البوابة ال Recycle و غلق فتحات التكييف إمعانا فى إحكام الغلق...لكنه شىء مقصود فى تصميم السيارة مراعاة لحياة الركاب

أحب أبشركم...فلتر التكييف زاد 10 جنيه و بقى ب 130 + 13 جنيه ضرائب....

زى ماق ولت قبل كده وهقوله تكرارا

سياده العقيد شخصيه تترفع لها القبعه احتراما