ال SPY 2 Way في سبير كار تمنه 450 جنيه بالتركيب
عرض للطباعة
ال SPY 2 Way في سبير كار تمنه 450 جنيه بالتركيب
مافيش بهدلة ولا حاجة ، هو الشغل كله فى الجزء اللى تحت رجل السواق الشمال على شمال دواسة الدبرياج ..
هو بيشيل جلد العتب بتاع باب السواق فالفرش الموكيت بيتشال بسهولة ، ويثبت جهاز الانذار ويوصله توصيله كهربائية فى الحتة دى.
وبيطلع من جهاز الانذار لمبة الانذار ودى بيحطها على التابلوه قدام السائق على الشمال (بين التابلوه والزجاج الأمامى) ودى برضه مافيهاش بهدلة لأن فيه فبرة على شمال الزجاج الأمامى بتتشال بسهولة ويمشى السلك من وراها ويركبها تانى ، حتى هو كان حاطط اللمبة فى مكان ماعجبنيش ، فشلت أنا الفبرة ونقلت مكانها وكل حاجة رجعت زى ما كانت.
ولو الانذار 2-way، هيبقى فيه كمان اريال واصل من جهاز الانذار وبيتثبت على الزجاج ، وأفضل مكان ليه ورا المراية على الجزء المظلل وبرضه تمشية السلك بتاعه للمكان ده سهلة جداً ومش بتبهدل حاجة فى العربية.
وبعد ما بيخلص بتستلم عربيتك زى ما كانت بالظبط بدون أى احساس بان فيه حاجة اتركبت.
انا اشتريت الانذار ال Walf ب 165 جنيه من ش زكى وركبهولى كهربائى عند البيت ب 50 جنيه بس نصيحة للى ها يشترى يركبو فى ش زكى او عند ادريان او سبير كا راو حد شغلته انذارمش اى كهربائى لان الكهربائى طلع عينى عقبال ما ركبة وسيب مفاصلى لما خرج الضفيرة بره وحسبت أنه مش عارف يعمل أيه الناس بتوع الانذار بيركبوه على طول لكن ده اخدله يمكن 4 ساعات ورفعلى الضغظ وهى هى نفس الفلوس
معاك حق طبعاً .. أنا أول سؤال سألته للفنى اللى ركب لى ، انت ركبت انذار فى لوجان قبل كده ؟؟؟
معلش يا جماعة هو ايه الفرق بين الإنذار ال spy2 way & spy 1 way
الانذار الـ 1-way ده انذار عادى زى اللى احنا عارفينه ، العربية بتصفر لما حد يخبطها والريموت اللى معاك بيفتح ويقفل العربية ويشغل ويبطل الانذار لما بتكون قريب من العربية.
أما الـ 2-way ففيه ببيبقى هناك تواصل بين العربية والريموت اللى معاك عن طريق وحدة ارسال واستقبال بين العربية والريموت ، ومداها بيوصل لـ 500 متر لو مافيش حواجز مبانى ، وحوالى 200 متر فى المبانى.
يعنى حضرتك تبقى قاعد فى شغلك أو فى بيتك والعربية مركونة تحت ، واللى يحصل فى العربية بيظهر لك على الريموت ، لو العربية اتخبطت تلاقى الريموت بيصفر ويعمل vibration وعلى شاشته صورة شاكوش بيخبط العربية.
ولو العربية بابها اتفتح هتلاقى الصفارة والاهتزاز وصورة باب بيتفتح على شاشة الريموت
ولو دارت ، تظهر صورة شكمان بيطلع دخان.
ودى تحل مشكلة لو صوت سرينة الانذار مش واصلك وده غالباً بيحصل ، والمشكلة الأكبر ان صوت سرينة الانذار متشابه فى كل العربيات ، فهتعرف ان المقصود عربيتك من الرسالة اللى جاية لك على الريموت وكمان تعرف ايه اللى بيحصل فى عربيتك بالظبط من الصورة على الشاشة.
وكمان لأن مداه واسع ، فانت لو راكن فى بارك كبير ومش فاكر راكن فين ، فممكن تشغل الصفارة من الريموت وتمشى ورا الصوت لغاية ما تلاقى عربيتك ، وده من على بعد كبير بيوصل لنص كيلو زى ما قلنا.
الحقيقة ان دى مش كل امكانياته ، بس دى الحاجات اللى ركبت عندى ، لأن فيه امكانيات تانية ماركبوهاش وقالوا ان الحاجات دى لو ركبت هتبقى لعب فى العربية وتضيع الضمان (مش عارف هو كده واللا هم مايعرفوش يركبوها) زى مثلاً إمكانية انك تشغل تأمين العربية وانت جواها بالضغط على الفرامل (anti-hijacking) وإمكانية انك تبطل وتدور العربية من الريموت يعنى لو حد سارق العربية وطلع يجرى بيها ممكن تبطلها من الريموت وانت بعيد. وفيه حاجة كمان اسمها microwave sensor ودى بتخلى العربية تدى انذار لو حد وقف جنبها فترة أكبر من 5 ثوانى حتى من غير ما يلمسها.
وهتلاقى صور وشرح فى الموضوع ده
الف سكر أ/ Egyzizo علي ردك المفصل
جزاك الله خير
شكرا يا استاذ Egyzizo على مساهمتك بالشرح و التوضيح
و اعتقد ان خاصية ال Anti hijacking بالضغط على الفرامل مش صعبة ولا لعب ولا حاجة لان الكاتلوج شارح كل توصيلة و كل اللى ها يحصل انه يوصله بمفتاح الفرامل اللى عند دواسة الفرامل ..... ...... ثانيا موضوع انك تفصل العربية برضوا المفروض يوصلوه بالكتاوت اللى جاى مع الانذار اسمه rely بيفصل الكهربة اللى رايحة المبينة عند حالة السطو ... اعتقد هما بيستسهلوا ....
بس لو اجيب المانيوال سيرفيس بتاع العربية ها نعرف كل توصيلة فيها ان شاء الله
فعلاً الكتاوت دى ماركبوهاش وادوهالى مع الكرتونة ..
يا ريت لو حد ركب الـ 2-way والحاجات دى شغالة عنده يفيدنى مين ركبها له وأنا ممكن أروح أعمل تعديل فى التركيب هناك.
انا عندي خاصية ال Anti hijacking بالضغط على الفرامل بعد 30 ثانية العربية بتتأمن والسنتر بيقفل لكن موضوع انك تفصل كهربة العربية عند تعرضها للسرقة مش عندي وعرفت ان لو فعلت الخاصية دي لازم الكتاوت دي تتحط في مكان تكون انت بس عارفه والكهربائي اللي ركبلك الانذار علشان الحرامي ما يوصلهوش ولو حصلت مشكلة معينة زي عطل في الموبينه او في الكونتاكت مثلا مش هتتعرف تدور العربية وهاتعيط جنبها لحد ما تجيب كهربائي يحلها وكمان لما بتفصل كهربة العربية تيجي ترجعها هاتلاقي محطات الراديو المسبقة الضبط اتمسحت وهاتتضطر تظبطها تاني ولو العربية فيها كاسيت بكود هاتضطر تدخل الكود ولو انت مش عارفة لازم تسأل التوكيل ومش هاتبقي عارف المشكلة في الموبينة ولا في الكتاوت دي
فالافضل انك تقفل الدريكسيون بعكاز مثلا وتأمن عربيتك بالطريقة دي