الموضوع: لا للهيبرة

كتير أوي اللي حاصل ده عشان ماتش مصر و الجزاير..
كتيرة أوي الهيبرة دي..
كتير أوي كم الكره بين الطرفين..
كتير أوي الشحن و التصريحات هنا و هناك..
كتير أوي اللي حصل في معركة الحصول على تذكرة للماتش..
كتير أوي بهدلة و مرمطة و انتظار بالساعات عشان تذكرة ماتش..
كتير أو و باقولها بصوت عالي.. لا للهيبرة

لا للهيبرة عشان على أد الحماس لحاجة و الأمل فيها على أد ما بيكون الحزن كبير أوي لفقد الأمل..
لا للهيبرة عشان ما ينفعش حد يجند حياته كلها عشان 90 دقيقة..
لا للهيبرة عشان أي هيبرة و مبالغة في أي حاجة بتجيب نتيجة مش مرضية.. و في الحالة دي ممكن تكون نتيجة كارثية..
لا للهيبرة عشان الواقع بيقول ان فرص تأهل الجزاير أكتر بكتير من فرص تأهل مصر..
لا للهيبرة عشان الناس دي كلها اللي هاتموت نفسها عشان الماتش و بيناموا يحلموا بيه بقالهم شهرين مش همه اللي هاينزلوا الملعب يلعبوا الماتش و لا همه اللي حاطين خطة اللعب و لا همه اللي هاياخدوا قرار التغييرات أثناء المباراة.. الناس دي رايحة تشجع فريق بلدها و بس و التشجيع مش مطلوب فيه غير حماس متصل في التشجيع بغض النظر عن النتيجة.. يعني كل اللي حاصل في الدنيا و الإعلام و الشوارع و البيوت مالوش أي تأثير على المباراة ولا نتيجتها.
لا للهيبرة ولازم نتوقع الخسارة قبل المكسب عشان ما نلاقيش اللي جت له أزمة قلبية و راح فيها و لا اللي جت له نقطة من الحزن على الخسارة و لا اللي طلق مراته في لحظة غضب و لا اللي سابت البيت عشان جوزها مش طايقها و لا طايق العيال من كتر الغيظ و الغضب
لا للهيبرة عشان ممكن لو حصلت خسارة كل الحماس و حرقة الدم و النفس و الأعصاب و طاقة الكره دي كلها تطلع في تكسير و تخريب و تدمير و تحصل كوارث لا طاقة لنا بها و هنبص كلنا نلاقي كل مذيعي الفضائيات اللي بقالهم شهرين بيسخنوا في الناس طالعين يشجبوا و يدينوا أحداث العنف اللي حصلت و بيتكلموا عن الروح الرياضية و أخواتها
لا للهيبرة عشان رسول الله صلى الله عليه و سلم أوصانا بالوسطية و الاعتدال في أفعالنا و ردود أفعالنا و عدم المغالاة أو الغضب، و بالمناسبة فرسول الله أوصى أمته بالوصايا دي.. و احنا من أمته و الجزاير برضه بالمناسبة من أمته صلى الله عليه و سلم و لا يرضي رسول الله أبدا اللي حاصل ده بين فريقين من أمته.

و أخيرا يارب النصر لمصر.. بس برضه لا للهيبرة