عشان ماحدش يدعي علي العريس و العروسة بخراب جوازهم

**Hegazio** · 12-11-2009 01:44 PM

يا جماعة في الأفراح المصرية مشهور عنها عمل زفة بالعربيات
و تلاقي بقي حاجة غريبة جدا ..
يقفلو الشارع بالعربيات و ينزلو يلفو حوالين عربية العرايس
يقعدوا يمشوا زجزاج عشان ماحدش يعدي خالص
يمشوا بعرض الشارع بسرعة 20 و الشارع يضرب يقلب وراهم

ماحدش فكر في دعوات الناس اللي مزنوقة بدل ما تقول ربنا يبارك لهم .. ربنا يخرب بيتهم و قريب يطلقو قادر يا كريم !!
ماحدش فكر في حد مستعجل يلحق يودي مراته المستشفي عشان بتولد؟
أو جايب دوا يلحق بيه مريض ؟
أو رايح يلحق يشوف أبوه و هو بينازع الموت ؟

نداء لكل من يملك سيارة و يشارك في زفة .. افسحو الطريق للناس
و اتقوا شر دعوة من يظلم بسبب الزفة

**blazer** · 12-11-2009 02:03 PM

معاك فى اللى انت بتقوله
اللى عاوز يفرح يفرح براحته بس مش على حساب الناس التانيين
لانهم هيتحطوا فى نفس الظروف فى وقت تانى

**zaza_lanos** · 12-11-2009 02:26 PM

امتى بقى نتخلص من العادات الزبالة ده بقى

**أبو إياد** · 12-11-2009 02:31 PM

بص انا متعقد من الموضوع الخنقه ده كنت ماشى فى شارع النيل فى العجوزه والدنيا واقفه فوجئت ان السبب >>>>>>>>>زفته>>>اقصد زفه
المهم من خنقتى وصلت للصفوف الاولى ولقيت البيه بيخمس بالعربيه وكانه فى اللى ورثه من عيلته لدرجه انه ماشى بظهره فى اتجاه العربيات
حاجه قله ادب ومسخره واستهتار

انا فى جوازى اصريت انى انا اللى اسوق وكان كل هدفى انى اخلى الزفه تكون محترمه وبالفعل كنت ماشى طبيعى جدا ولا بطيىء ولا مسرع وكنت موصى اصحابى واقسم بالله كنت فى وسط البلد والناس بتهنى وفرحانه اصل العربيه كانت كابورليه بقا وكده

**نور القمر** · 12-11-2009 02:34 PM

بصراحة عندك حق في المواقف دي تلاقي الواحد لا اراديا دعى عليهم او شتم في سره

**demos70** · 12-11-2009 02:38 PM

كلام سليم جدا. لكنك نسيت أن الأغلبيه من الناس تمتاز بالأنانيه و مبدأ "عربيتي و بس" ده غير حبهم للفوضى التي تبدأ من الصغر نتيجة الكبت. ففي المدارس مثلا كنت أعجب من ظاهرة مجرد خروج المدرس أو المدرسه من الفصل التلاميذ كلها تبدأ بثورة فوضى من طبل و رقص و حذف طائرات ورقيه...إلخ. و الطبع يغلب التطبع. لذا أرى أنه أفضل رد فعل لتلك الزفات السخيفه هو ما أفعله دائما و ينجح معي:
بشوف الزفه أمامي و أبدأ بكلاكسات متواصله لمجاملة العروسين و أدوس بنزين على الأخر و أدخل في العربيات بجنون فيفتكروا إني تبع الزفه و متحمس جدا فيفسحوا الطريق بإعجاب للمتحمس المجنون. و بعد مبعدي يا إما بطير في سكون أو أدي الكلاكس الأبيح إياه مع فلاشر حسب سخافة الزفه و مدى تعطيلها للمرور.
و في هذا الزمان لا داعي للدعاء على العروسين لأنهم كده كده داخلين على مشروع فاشل سينتهي إما بالطلاق أو بالفشل مع الحفاظ بالشكل الإجتماعي "قال يعني متجوزين".