هي الكوسة مش هتخلص من البلد دي ؟؟؟؟؟؟؟؟؟؟؟
سلام عليكم
طبعا الموضوع نوع من الفضفضة لأني بجد هنفجر من الروتين والكوسة والقرف وصوتي راح من كتر الزعيق انهاردة
امبارح روحت المرور الساعة 11 ونص تقريبا والحمد لله ربنا كان مسهل وجهزت الورق كلة وخلصت الفحص كمان
لكن الشبكة كانت واقعة طول اليوم ومعرفتش اسجل علي الكمبيوتر
وروحت تاني انهاردة ، خدتلي بتاع نص ساعة علي شباك الراجل اللي بيملي الورق ويسجلة وسلمت النمر وكلة تمام والدنيا ماشية بييييس (علي رأي الناس الروشة)
وبعدين الملف بتاعي اترمي علي مكتب البني أدم بتاع المراجعة
مش عارف اقول علية إية والله
فضلت واقف قدام الشباك من الساعة 9 ونص تقريبا لحد الساعة 1
كل شوية حد يدخلة يقوم مطلع شوية ملفات حاططها فوق اللي قدامة علي المكتب
شوية الملف يبقي رقم 2 ولا 3 وانا اصبر نفسي اقول هانت اصبر يعني الورق كلة خلص من غير قرف مجتش علي أهيف حاجة
وشوية والاقية بقي تحت كوم ملفات
والناس كلها واقفة تزعق وتنادي علي حضرتة وهو ولا هنا
وبني أدم ممل وبطييييئ
ويوم ما يتكرم ويحن علينا يقوم باصص علي الطابور ومبرق شوية ويقول ماهو لو في صبر الدنيا هتمشي .. مش عارف دنية مين اللي هتمشي بالظبط
وعلي هذا السيناريو طول اليوم لحد ما بجد خلاص اتفقعت
الخزنة بتقفل 12 ولو ملحقتش ادفع مفيش نمر ولا رخص غير يوم السبت
قلت مبدهاش بقي و اتصلت بوالدي جالي المرور ودخل لنائب المدير وبعتلي صول دخل للراجل التييت دة طلعلة الملف وخلاة مسكة خلصة الأول ، وبرضو فضلت واقف ييجي نص ساعة علي ما عم السريع خلص مراجعة وطلعلي الرقم اللي هدفع بية في الخزنة
انا بجد كنت علي الأخر وخلاص بقيت عصبي بطريقة مش ممكن لدرجة انة لما الصول دخل للراجل والدي ندهلي بيقولي اديلة الرقم ، انا بحسبة بيقولي تعالي وروحت نافض الناس اللي واقفين ورايا من عليا وخرجت من الطابور
لاقيتة بيقولي الراجل جوا أهوة اية اللي طلعك .. قلتلة معليش سمعتك غلط و من غير ما احس بنفسي والله رحت رامي الناس اللي متكومة علي الشباك شوية يمين وشوية شمال وانا في منتهي العصبية وبقيت قدام الشباك تاني مش عايز اقولكم نظرات الناس ليا كانت عاملة ازاي بس فعلا والله كنت علي أخري لو حد فتح بقة معرفش كنت هعمل فية اية خصوصا ان معظمهم جايين بعدي بكتير وانا طلع روحي علي ما وصلت للشباك
لكن طبعا الخزنة كانت قفلت الساعة بقت 1 وخدت الرقم ومشيت من غير أي ورق ولا رخص ولا نمر
وركنت العربية
و طبعا مروحتش الشغل لأني حتي ملاقيتش حد من اصحابي فاضي اخد عربيتة
ولسة هروح تاني يوم السبت ان شاء الله ادفع واخد الرخص والنمر وربنا يستر
عارف طبعا ان في ناس بيطلع روحها قد كدة مية مرة
لكن ..
مش فاهم اية اللي هيحصل لما الناس تقف في الطابور باحترامها و ورا بعض ؟
هيحصل اية لما الموظف يقولك علي طلباتة كلها مرة واحدة بدل ما يطلع الناس من الطابور 100 مرة .. واللي بيقف قدام الشباك يحصلة التصاق ميبقاش عايز يتحرك تاني ولا يوسع لأي حد مع انة المفروض يروح يستني انة الموظف يندة علية ؟
هيحصل اية لما الموظفين يحترمو نفسهم ويشتغلو بضمير وبالدور ؟
مش عارف امتي هنخلص من الهمجية اللي بقت في كل حاجة
ولا الواحد يكبر دماغة ويطفش بجد من البلد دي
المفروض علي الأقل يخلو عندهم دم ولما يسلمونا الرخص يكون معاها شوية مهدئات وأدوية للضغط علي شوية مسكنات