الموضوع: اشتري سبيرانزا a516 منين؟

اه انا قصدي كده بعيد عن البنوك

بص يا باشا
انت لو هتاخد رأى حد تشترى عربيه ايه مش هتعرف ترسى على حاجه
كل واحد ليه رأى من وجهة نظره ، واللى تعجب ده ما تعجبش ده
وعلى فكره كل العربيات فيها عيوب ، مافيش عربيه مافيهاش عيب حتى اغلى العربيات فيها عيوب والله وفيه احصائيه على الموقع هنا لكل الانواع بس مش فاكر بصراحه اللينك بتاعها ايه
المهم انت لو نويت على عربيه وعاوز تسال اسال حد معاه العربيه دى وياريت لو بقالها اكتر من شهر واسال على صيانتها وقطع غيارها موقفها ايه من الاعراب
بالنسبه للاسبيرانزا انا فعلا قارنتها باللانوس وبالافيو وباللوجان كفتها هيا اللى رجحت من حيث :-
1- التوكيل : هوا هوا توكيل دايو على فكره وحسام ابو الفتوح صاحبه يعنى مش هتفرق حاجه خالص عن الدايو
2- قطع الغيار : قطع غيارها مش غاليه ، لان الناس اللى بتقول انها غاليه بتبص على انها صينى فا المفروض انها تبقى ب 50 جنيه مثلا للقانوس محدش حط فى الاعتبار كذا حاجه اللى هما :
- قطعة الغيار دى الماده الخام بتاعتها انضف من الماده الخام بتاعت انواع العربيات اللى ارخص منها زى اللانوس
-فيها تكنولوجيا اكتر ، فلو بنتكلم على الفانوس فهو فيه مواتير على عكس اللانوس انها كويس ان فيها لمبه اصلا وبتتحرق كل شويه من السخونه هيا والفيوز بتاعها فده دليل على جودة الخامه
-ان قطع الغيار دى يا جماعه بتتباع فى التوكيل ، يعنى لو انتشرت بره ختبقى ارخص من اللانوس
- قطع الغيار دى اصلا اصلا ارخص من قطع غيار عربيات كتير نفس الفئه تقريبا ، وفيه برضو هنا هتلاقوا اسعار قطع غيار الاسبيرانزا وقطع غيار العربيات التانيه وانا شايف انها ارخص بالنسبه من اللوجان بشويه " زى فلتر البنزين مثلا فى اللوجان ب 60 جنيه وفى الاسبيرانزا ب 25 جنيه ...؟؟ "
وغير كل ده العربيه فيها فخامه بجد تقارن بالفئات الاعلى ، وقوه فى الماتور الالمانى الاصل ، وصلابه فى البودى بتاعها المكون من 3 طبقات صاج واللى مافيش زيه طالما بنقارن " يعنى انت لو قعدت عليه مش هيطبق ، في حين انك لو سندت ايدك بس على اى عربيه وكلنا عارفين الدايو هتطبق ومش هترجع زى الاول بسبب سندة ايد ؟؟ "
انا عن نفسى مقتنع بالاسبيرانزا 100 % ولو عاوز تجيب حاجه احسن يبقى اقرب حاجه تجيبهالها هيا الالنترا الجديده او التويوتا يارس او الاوبترا ومش هيبقوا فى كماليتها برضو
ولو حد يحب يتناقش معايا فى حاجه للعربيه دى يشرفنى ، مع انى ما اشتريتهاش لسه بس انا ناوى انشاء الله وعملت دراسه عليها كامله واقتنعت بيها فعلا ، واللى يجيبها ياريت يشارك فى المنتدى هنا ويقولنا اخبارها ايه معاه

مين قال موتور الاسبيرانزا الماني يعني شركة ايه اللي مصنعاه وياريت مصدر حضرتك من المعلومات دي
ويعني ايه صاج سمكه 3 طبقات
نخلي الكلام علمي شوية بس يعني ايه صاج 3 طبقات
الصاج بيتقاس سمكه كام مللي كده يعني لكن 3 طبقات ازاي
مش قادر افهم
وبرضه معلومة الموتور مش عارف ايه مصدرها