نيسان صنى- تقفيل مصرى....أم الأجنبى
فى السنة اللى رفضنا فيها نشترى عربية كورى، اشترينا الصنى
نيسان صنى ، تقفيل مصرى، أم الأجنبى
مش عارف ليه استوحيت الكلمتين دول من مجموعة اعلانات تهامى ووديع ، بس انا فعلا بتكلم جدا
ايام ما اشتريت العربية الصنى لقيت ناس كتير جدا بتتهمنى بالجنون المطبق بسبب شرائى لسيارة تقفيل مصرى، لدرجة انهم حسسونى انى دفعت فلوسى وخدت زكيبة فيها 16 ألف قطعة غيار لو جمعتهم تحصل على سيارة لكن هم كل واحدة فيهم جاية لوحدها، او انى مثلا اخدت بفلوسى احدى تلك السيارة المرتجلة التى تصنعها بعض ورش الوجه البحرى من ماكينة طلمبة مياه وشاسيه حديد كبديل للعربية الصاج ام حمار التقليدية
امضيت 3 سنوات مع العربية الصنى محاولا البحث عن غلطة التقفيل القاتلة التى من المفترض انها موجودة فيها والتى ستودى بحياتى او مدخراتى ، وأجروء على الاعتراف انى ملقيتش
بقيت خلال تلك السنوات ابحث عن الزجاج المصرى الذى سينفجر من تلقاء نفسه او المساعدين اللى هتجيب زيت اوالردياتير اللى هيخر المية ويبوظ الموتوراو عصاية الفتيس اللى هتطلع فى ايدى فلم اجد
بقيت خلال تلك السنوات ابحث عن اضمحلال الأداء الذى يعد به الكثيرون مع السيارات المحلية فلم اجد الا تحسن فى الأداء مع مرور الوقت فالعفشة الناشفة لانت وصوت المحرك اصبح انعم
بقيت انتظر البوية التى سيسقطها اول خرطوم مية فلم اجد سوى بوية اقل ما يقل عنها انها محترمة جدا
وعندما فتح الله على وبعت السيارة واشتريت سياره من فئة سعرية مختلفة وجيل احدث ورحت ابحث عن الفروق العملاقة بين خامات الصنى التى كان الكل يقولون عنها انها زبالة وبين خامات السيارة الجديدة ، فلم اجد فى السيارة الجديدة سوى كماليات او ابتكارات تكنولوجية غير موجودة فى الصنى بحكم فرق الأجيال وفرق الفئة السعرية لكن الاشياء المشتركة الموجودة فى السيارتين مصنعة من خامات متقاربة عالية الجودة، بل واجزم ان بعض خامات الصنى -مثل فرش الكراسى مثلا-مصنع من خامة اقيم من فرش سيارتى الحالية
انا بعت السيارة الصنى بالفعل ومنذ فترة، ولم يعد لى مأرب من الدفاع عنها ، لكن اقول وبكل ثقة اننى فشلت تماما فى العثور على غلطة تقفيل فيها ، او فرق ملحوظ بينها وبين مثيلاتها من الخارج فيما يتعلق بالتقفيل ، ولذا اقول وبكل ثقة اننا مصابين بحالة متقدمة من عقدة الخواجة تجعلنا وبدون تفكير بمجرد ان نسمع ان هناك منتجا مصريا نرفضه بدون ادنى محاوله للمعرفة او الاختبار
وأجرؤ ان اقول ايضا:
فى السنة اللى رفضنا فيها نشترى عربية كورى اشترينا الصنى
نيسان صنى ، اول انتاج 2006 ، اتباع منها 30 ألف عربية عند 8 موزعين معتمدين حققت انتشار لا مثيل له فى مصر
نيسان صنى، تقفيل مصرى........ام الأجنبى
مع الاعتذار لوديع وتهامى