شجع شجع ... زيط زيط ... هلل هلل ؟؟ طيب و بعدين ؟!
السلام عليكم و رحمة الله
اخواني الكرام
تحياتي لكم جميعا
الموضوع ده انا باكتبه قبل الماتش بساعة واحدة بس... ويا رب مصر تكسب ان شاء الله
لكن عايز أفكر معاكم بصوت عالي.. هاطق يا ناس ..اسمعوني من فضلكم .. تسمحولي اصدعكم ؟؟!!
1- مصر وكاس العالم
ده حلم لينا كلنا يا رب نقدر نحققه ... صحيح منتخبنا الوطني هو بطل افريقيا... و من احسن الفرق العربية والافريقية.. و بطل امم افريقيا..
المسلسل بدأ لما جت تصفيات كاس العالم ... احنا اتهزينا كتير ... و رجعنا في الاخر بعد ما صعبنا المسائل ... نحاول الصعود بعد تأزم الامر و ارتباطه بماتش أخير.. لابد أن نكسب فيه بفارق هدفين علي الاقل لنلعب ماتش فاصل !!!! طيب ده كلام ...
برضو ربنا ينصرنا.. والمهم نلحق اللي فاتنا
2-مصر والجزائر ؟ بلدين شقيقين صحيح ؟؟
لو جينا للجد بقي.. فين فكر الاخوة والاشقة العرب ... منتخب مصر يتبهدل في الجزائر.. طيب ليه ؟؟؟ و منتخب الجزائر الشعب هنا يستحلفله ... ايه ده ؟؟ هي دي رياضة ولا حرب؟؟؟؟
احنا في عرض حاجه نتفق عليها .. في عرض لحظة صدق وأخوة بينا وبين العرب.. طيب ده لمصلحة مين ؟؟؟؟؟
3- شجع شجع مصر... مصر بتلعب ... مصر
بقالي 4 ايام ..ز كل السيارات اللي في الشارع عليها الاعلام المصرية .. والله عينيا بتدمع لما اشوف العلم .. وفرحان جدا ... بس ما تزعلوش مني لو قلتلكم اني حسيت النهارده قد ايه احنا بقينا تافهين
النهارده عندي في الكلية ... قاعدين في غرفة القسم .. و نفاجأ داخل الجامعة ... بمظااااهرة .. طبعا انا قلت دول الاخوان ولا بتوع اللي بالي بالكم ماشيين يحتجوا علي قضية سياسية فاهمينها غلط كالعاده ... فتحت الشباك و أفاجأ
بجماهير غفيييييييييرو من النمل الابيض والاحمر والاسود ... والله ما يفوق ال2000 طالب ماشيين داخل الحرم الجامعي لجامعة القاهرة ... و بنات وولاد ..ز وطبل و أعلام
و المصيبة السوده ... بيغنوا بنفس واحد .. هيلا هيلا هيلا هيلا هووو .. والجزائر ^^^^^ ... و االاشارات بس انا كاتبها علشان يندي للفظ و المعني الجبين
كورة ايه دي يا ناس ؟؟ و شباب ايه دول... والله حسيت بقمة التخلف والانحدار ..
ايه الحكاية ... ايه اللي جرا
5- نتحد من أجل مصر علي هدف واحد ... تحقيق اكبر قدر من الكارثة!!!
اتحاد الفضائيات ... والاذاعة ... والراديو ... من أجل هدف واحد .. شحذ الشعب للتشجيع .. ده ممكن يعمل كوارث .. لو فزنا "يا رب نفوز يا رب بس الناس تاخد بالها" مش هايبقي فيه مجال لرجل طول الليل في اي شارع ... تحرش هاتلاقي ... غلاسة هاتلاقي... سد طرق هاتلاقي... انا لسه يوم الاربع مفوت طيارتي لأني مالحقتش اوصل المطار بسبب الطريق اللي كان واقف فوق الساعتين نظرا لشراء الناس لتذاكر الماتش .. تخيلوا بقي يوم الماتش ممكن يحصل ايه ؟؟؟
و لو لا قدر الله خسرنا .... كآبة ما بعدها كآبة لكل الشعب... وهانبقي مسخرة وأضحوكة العالم كله.. مش كده ولا ايه ؟؟؟؟
6- دعم سياسي قوي ... تحيا الرياضة !!!
حتي السياسة .. طبعا حلوة مافيش كلام "والله باحب الحكومة:khd:" بس هو احنا فاضيين ... انفلونزا .. وبلاوي .. وقطارات عمالة تخبط في بعض... والله احنا شعب طيب ... شوفتوا رجلينا جت ازاي :)
7- ماذا بعد ؟؟
طيب ... يا أخواني ياللي بتتلموا علي ماتش كورة ... و بتخرجوا في الشوارع .. وبتزينوا بعلمها البلكونات والعربيات والشوارع ... خدوا بالكم وانتوا بتشجعوا أو بتحتفلوا أحسن تدمروا اللي انتوا بتحبوها "والله قمة التناقض"... ماسك العلم في ايد ... و بيعدغدغ في البرجولات وبيتنطط علي عربيات الناس ؟؟
و بعدين إسمحولي بحتة غلاسة شوية بقي بزيادة
هللوا لما جامعة القاهرة مثلا تبقي من الجامعات ال100 الاوائل في العالم
هللوا لما نحقق اكتفاء ذاتي من الطعام
هللوا يوم ما المصري حقة يرجعله في اي حتة في الكون بعزة
هللوا يوم ما نسبة البطالة تبقي 0
هللوا يوم ما متوسط دخل الافراد يبقي موازي لاي دولة شعبها عايش عيشة كريمة
هللوا يوم ما توصل القطارات في مواعيدها
يوم ما تعرف توصل مكان في معادك
و هللوا برضو علشان الماتش
بحبك يا مصر ... و يا رب تفضلي ديما فوق