هو الكلام ده كده صحيح ولا التوكيل بيستهبلني ؟

**zakiali** · 15-11-2009 01:05 AM

رحت النهارده صيانة أبو رواش .. الأربعين ألف .. كان فيه الصيانه + المشاكل الاتيه :

1- تغيير الزيت بزيت هيلكس الترا - شيل
2- تغيير فلتر زيت
3- تغيير فلتر بنزين
4- تغيير فلتر الهوا
5- تغيير تيل الفرامل
6- تغيير بوجيهات
7- كان فيه مشكله في وصله الشكمان كان عامله صوت عالي .. (تغيير وصله الشكمان)
8- كان عندي مشكله في الحدف + الطاره كانت دايما معووجه يمين مهما زبطت زوايا .

المشكله مهندس الاستقبال بيقولي طالما انك مش بتعمل صيانات الخمسات - اصلي كمن بعمل صيانات العشرات فقط - يبقي انت كده طلعت من الضمان . وقالي انت كده لو هنغيرلك وصله الشكمان تبع الضمان يبقي هتدفع تمن الصيانات الخمسات اللي عدت همه كانو تلاته بس هنخليك تدفع اتنين بس 260 جنيه اضافيه .. المهم كام يعم كله علي بعض قالي تدخل في 1200 جنيه .

هل الكلام ده مظبوط ولو مش مزبوط اعمل ايه اصل العربيه لسه عندهم مبيته النهارده في ابورواش عشاان رحت متأخر

برجاء النصيحه لوجه الله .

**Diaby** · 15-11-2009 01:10 AM

يتهايئلى على حد علمى انت بتعمل الصيانات زى ما انت عاوز خمسة عشرة اللى يعجبك وبعدين ما فى ناس بتغير زيت عشر الاف ومعاه الفلاتر وبتروح كل 10 الاف

**zakiali** · 15-11-2009 01:29 AM

المشاركة الأصلية كتبت بواسطة med

يتهايئلى على حد علمى انت بتعمل الصيانات زى ما انت عاوز خمسة عشرة اللى يعجبك وبعدين ما فى ناس بتغير زيت عشر الاف ومعاه الفلاتر وبتروح كل 10 الاف

ايوه انا اقصد علي الضمان يعني لو حاجه خربت في العربيه .

**dr.nemo** · 15-11-2009 03:18 AM

انا اللي اعرفه ان صيانات 5 و ال 15 وال25 وهكذا
مش الزامية ومفيهاش تغيير حاجة في معظم التوكيلات
وان الالف والعشرة العشرين وهكذا أساسية للضمان

**zakiali** · 15-11-2009 03:54 AM

المشاركة الأصلية كتبت بواسطة dr.nemo

انا اللي اعرفه ان صيانات 5 و ال 15 وال25 وهكذا
مش الزامية ومفيهاش تغيير حاجة في معظم التوكيلات
وان الالف والعشرة العشرين وهكذا أساسية للضمان

لا مانا قلت للمهندس كده قالي لا الكلام ده مش مزبوط ؟ .. أكلم كبير المهندسين ولا أدخل لمدير الورشه ولا أعمل ايه دلوني انا هروح بكره الصبح انشاء الله .

**El Prince** · 15-11-2009 11:36 AM

متابع بأهتمام يا باشا و قولنا عملت ايه ..
أصلى ناوى برده أطنش الخمسات دى , بحس ان ملهاش لازمه ..

**A.Saad** · 15-11-2009 11:47 AM

المشاركة الأصلية كتبت بواسطة zakiali

لا مانا قلت للمهندس كده قالي لا الكلام ده مش مزبوط ؟ .. أكلم كبير المهندسين ولا أدخل لمدير الورشه ولا أعمل ايه دلوني انا هروح بكره الصبح انشاء الله .

ايوة طبعا تكلم مدير المهندسين ومدير الورشة و غبور نفسه
بس الاول
اتصل بالمهندس / عاطف عبد السميع - مدير خدمة العملاء
وعرفه انك من المنتدى
تانى حاجة
اتاكد ان مفيش تنبيه مكتوب بالكلام ده
واطلع على جدول الصيانات فى الموضوع بتاعه وشوف الحاجات الى فى صيانة الخمسات ليها علاقة بالمشاكل بتاعتك ولا لا

**BassamHafez** · 15-11-2009 11:50 AM

المشاركة الأصلية كتبت بواسطة el prince

متابع بأهتمام يا باشا و قولنا عملت ايه ..
أصلى ناوى برده أطنش الخمسات دى , بحس ان ملهاش لازمه ..

وانا كمان متابع جدا

اصل انا ماروحتش صيانة ال 20 وناوي اروح ال 25 عشان الضمان

ياريت لو تعرفلي هل لازم ادفع ثمن الصيانه اللي ما عملتهاش عشان الضمان ولا ايه النظام