الموضوع: رحت عملت اقرار الضرائب العقارية

الفكره مش في تعاون الموظفين الفكره أنه القانون مخالف للدستور و غير منطقي. الضرائب يتم دفعها للأرباح و ليس رأس المال. الإستماره نفسها مستفزه جدا فيها اسئله زي شقتك بحري ولا قبلي؟ بطل على حديقه أو شارع رئيسي أو أرض فضاء؟؟ معنى كده أنه هتفرق يعني ممكن شقتين في نفس العماره و نفس المساحه واحده قبلي و التانيه بحري و بطل على جنينه يبقى يدفع ضرايب أعلى؟

يعني ليه الحكومه تجبرني أجاوب على أسئله زي دي؟ ناقص يسألوا إنت مرتاح و مبسوط في شقتك؟ و كلوا يتسجل على الكمبيوتر و يرفق برقمك القومي لمراقبة و متابعة و حصر المواطن. ده إللي فالحين فيه في إستخدامات الكمبيوتر: مراقبة وحصر و إحكام الخناق على الشعب و ليس سرعة الأداء و التيسيير على المواطن بدليل اللطعه في المرور و جميع المصالح الحكوميه بحجة "أصل الكومبيوتشر عتلان" و لازلت تقف في الخزنه و تستنى الموظف يكتب و يقطعلك الوصل الأحمر يعني الكمبيوتر أصبح إجراء زائد و مُعطل لأنه "بيعطل كتشير".

و لو قبلنا تطبيق قانون مثل هذا فبما أنك قبلت و ملأت الإستماره و تقدمت بها يبقى موافق من حيث المبدأ. صحيح السنه دي شقتك متسواش 500 ألف لكن هيقدروها بكام بعد سنه أو إثتنين؟ أو يعدلوا القانون و يبقى الحد الأدنى 100 ألف الفهلويه مش هتغلب و أسهل حاجه سن القوانين لحلب المواطن المطيع. و طالما قبلت المبدأ يبقى إستعد لقانون "ضريبة الكسوه" و إملا فورمه تانيه و قولنا عندك كام قميص في دولابك و كام جزمه و ألوانهم إيه و مين فيهم مريحك و تدفع ضريبه ثمن قميص لكل عشر قمصان لديك و لو جايب قميصين نفس اللون يبقى تقع تحت بند ضريبه الترفيه فلازم تدفع ثمن لباس و مش هيهدوا حتى لو الشعب كله باعه و مشي من غيره. و كل شئ محفوظ على قواعد البيانات و مرتبط بالرقم القومي من أجل الأمن و الأمان يا مان.

الإجراء السليم طبعا هو ملأ الفورمه و الدفع ثم الطعن بعدم دستورية القانون و لو كسبت القضيه ممكن فلوسك ترجعلك بعد كام سنه و ده أقصى طموح. في حين أنه العداله تقتضي بعد كسب القضيه يجب معاقبة و محاسبه كل فاجر ساهم بدفع هذا القانون لكي لا نستقيظ يوما على قانون عجيب أخر مثل قانون "ضريبة الكساء" الذي طرحته من قبل.

هذا القانون وصمة عار في تاريخ مصر و لوي ذراع للمواطن. شحاته ممزوجه ببلطجة السلطه. لن أعطيهم أي بيانات خليهم ينزلوا موظفين و ييجوا بنفسهم و حسبي الله و نعم الوكيل في كل حرامي.
الواحد محتل في بلده و بس نهلل و نقول القدس لنا يا عم لما تبقى مصر لنا الأول!

مش رايح واعلي مافي خيلهم يركبوه
ودكر الي يقرب لبيتي

المشاركة الأصلية كتبت بواسطة أبو عبدالله

الله يفتح عليك بجد
هو ده اللي عاوز اقوله
ان انت بتفتحلهم الطريق وانت متعرفش هما ناويين على ايه

انا على فكره جبت الأقرارات بس لم املأها لحد الآن ومتخوف بصراحه منهم

هما مش محتاجينك تملأ الاستماره عشان يتفتحلهم الطريق لأن الطرق (و البلد كلها) بالفعل مفتوحه على البحري أصلا. لأن الشهر العقاري موجود و السجلات موجوده و كله مرتبط بالرقم القومي (ماهو ده الهدف الأصلي و الوحيد من الحكومه الإلكترونيه). لكن بدل ما يعينوا موظفين لإدخال بيانات من الشهر العقاري و غيره من الجهات المسجل بها أي عقار لديك (من شركة الكهربا يقدروا يعرفوا كام شقه من العداد و وسائل أخرى مش هيغلبوا) و يخلوا الموظفين دول يستخلصوا من واقع الأوراق الرسميه مواصفات عقارك و موقعه و إتجاه الريح التي تهب عليه ثم إدخالها في قواعد بياناتهم بدقه و كل هذا يحتاج لناس ذات قدرات و دقه معينه يعني مزيد من المصاريف و التعيينات على عبء الحكومه. فيأتي واحد من عصابة الفهلوه ويقول:
كده اللي هنلمه من الناس أكتر من نصه هيضيع بسبب تشغيل عماله أكثر و أكفأ. ده غير الوقت اللي هيضيع و إحنا محتاجين فلوس كتيــــر و بســـــرعه! طب ليه تدفع أكتر لما ممكن متدفعش حاجه خالص؟ إحنا نعمل إستماره فيها خانات عن كل المعلومات المطلوب حصرها و نخلي المواطن يملاها بنفسه و كده يبقى سخرناه يشتغل لحسابنا ببلاش و لو غلط في المعلومات يبقى لا يلومن إلا نفسه دي لوحدها تهديد كافي يخلينا نستخلص البهاريز. و يبقى الموظفين مجرد لإدخال بيانات و بس. و كل شويه ندي الشعب أخر مهله و إنذار تاني أخير. نرعبهم زي ما عملنا في شنط الإسعاف و المثلث. و كده يبقى وفرنا وقت و فلوس. و القله القليله اللي مش هتستسلم و ترفض التعاون معنا نبقى نعين بقى شوية فنيين و" نشكل لجنه" لمطاردتهم و اهو يبقى لمينا حبه حلوين من الغالبيه العظمى و دي القاعده العريضه حسب الإحصائيات و سابق تجاربنا مع الشعب يا فندم.

- فهمت. قصدك:
"Let the citizen do the dirty work and be his own slayer"

- بالظبط يا فندم. هو فريق سلاير ده بتاع الهيفي ميتال.
و عشان نحافظ على" مظهرنا الحضاري" و "حكومتنا الإلكترونيه" و عصر" ثورة المعلومات" نبعت لكل مواطن رساله قصيره على موبايله نشكره على إخلاصه و نطمنه برساله شيك زي مثلا:
مبروك يا مواطن عجبنا عقارك
و فزت في السحب فتم إختيارك
لتدفع لنا بناء على خطابك
مبلغ كـذا و بلغ جيرانك
و لو رفضت الدفع جنابك
سنضطر أسفين لإحتلالك
و التحفظ على أموالك و ممتلكاتك



- فكره هايله. خلي كل مطبعه في مصر تطبعلنا 1000 إستماره و قولهم دي ضريبة التلوث البيئي و الضوضائي من جراء تشغيل مكنات الطباعه.

- يا فندم و الرسائل القصيره مين يتحمل تمنها؟

- كل اللي شاري موبايل ثمنه معدي الألف جنيه يدفع ضريبة ثمن 100 رساله قصيره .

- تمام يا فندم.

- كل شـــــئ مدروس.

(فيلم" لصوص لكن رؤساء" )

المشاركة الأصلية كتبت بواسطة dode2002

مش رايح واعلي مافي خيلهم يركبوه
ودكر الي يقرب لبيتي

في الإتحاد قوه. ولازم نضع حد للمهزله دي. عن نفسي عندي
إستعداد أدفع ضعف الضريبه العقاريه في محاربة هذا القانون لأن مبدأ أن أصف شقتي للحكومه (و هواها بحري ولا قبلي ولا خليجي) مرفــــــــوض.
لو عملنا كلنا مع بعض رد فعل قانوني وعاقل (عشان ميجوش يقولوا القبض على تشكيل عصابي للتهرب من دفع الضريبه العقاريه الجديده. أصل إللي إختشوا ماتوا.) أعتقد هيلغوا الفكره السخيفه دي زي ما لغوا فكرة: الإنترنت الغير محدود يبقى محدود

سؤال جه فى دماغى دلوقت.... هو على اى اساس يتم تقدير سعر الشقة؟ و هل لو مكتوب سعرها فى العقد ينفع ده كأساس لتقدير سعرها و لا ايه بالظبط؟