رحت عملت اقرار الضرائب العقارية

**إبراهيم.صادق** · 16-11-2009 02:59 PM

المشاركة الأصلية كتبت بواسطة ahmed4000

طيب وليه بتدفع ضريبة سنوية للعربية..هى العربية بتدخل ربح؟

المشاركة الأصلية كتبت بواسطة أبو عبدالله

مع احترامي لرأي حضرتك
بس العربيه مش زي الشقة
العربيه لها بديل وليست من أساسيات الحياة فهناك مواصلات
اما الشقة ليس لها بديل نهائي الا الشارع انت واولادك وده مستحيل
في فرق كبير بين الأتنين

بالظبط زي ما قال الأستاذ ابو عبد الله، السيارة رغم أهميتها بالنسبة لنا إلا أنها تعتبر كماليات وليست أساسيات، وعلى فكرة في ناس كتير قررت انها تستغنى عن سياراتها بعد زياده الضريبة في مايو 2008 خاصة أصحاب السيارات القديمة ذات المواتير الأكثر من 1600 لأن ضريبتها بقت فعلاً كبيرة

بالاضافة لكده ضريبة ترخيص السيارة المفروض انك بتاخد مقابلها طرق مجانية وخدمات مرورية مختلفة -صحيح مستواها زفت بس ده المفروض نظرياً-

المشاركة الأصلية كتبت بواسطة mmamdouh

هى الفكرة انك تقدر تدفع ولا لا... ولا انك ليه تدفع؟؟؟؟

mmamdouh

حضرتك قلت المفيد ...

المشاركة الأصلية كتبت بواسطة ahmed4000

لكن مدام معاك يبقى ادفع منهم حاجة بسيطة

اسمح لي اختلف مع حضرتك

أولاً فكرة انك معاك يبقى لازم تدفع دي بتنطبق على ضريبة الدخل والضريبة على الأرباح، إنما ساكن في شقة يبقى تدفع ده كلام مش منطقي

ثانياً مع كامل احترامي لحضرتك طبعاً بس الفكرة دي نفس فكرة الحرامي اللي مقتنع ان اللي قدامه ده معاه فلوس وهو مامعهوش يبقى لازم اللي معاه يدي اللي مامعهوش، مش مهم بقى هو جاب الفلوس دي منين ولا إزاي ودفع حقها ولا لأ

أخيراً كان ممكن اقتنع بالضريبة دي لو فرضها مثلاً على المنتجعات السياحية ذات الاعلانات المستفزة للغالبية العظمى من الشعب أو منتجعات الجولف والفيلات والقصور، إنما كل اللي ساكن في شقة يدفع ضربية معلش ده كلام مش مقبول من وجهة نظري،

وياريت حضرتك تاخد بالك زي م الزملاء قالوا ان التقييم بيتراجع كل 5 سنين والتضخم موحود وبيزيد يعني كله داخل وكله هايدفع

**MMamdouh** · 16-11-2009 03:05 PM

المشاركة الأصلية كتبت بواسطة ahmed4000

المبلغ ده مش حيعمل ل(كتير) مننا حاجة لكن حيكون حصيلة كويسة للحكومة

فكرتى بمحمد صبحى فى مسرحية تخاريف فى المشهد بتاع امنية التسلط و هو بيحاول ينفظ الاشتراكية على طريقتة.... "الناس كلها بتشتغل عند الحكومة... و الحكومة هى اللى تلم المكسب"

يا سادة مشكلة مصر مش موارد... مشكلة مصر نهب الموارد

انا افتكر كويس اوى من فترة كذا شهر فى بانر صغير فى التلفزيون و الاخبار شغالة مكتوب ان قناه السويس حققت رقم قياسى لعائداتها فى العام المالى ووصلت حاجة بتاعت 5 مليار و نص دولار... دى قناة السويس بس و بالدولار... طيب الفوس دى كلها بتروح فين؟؟

حد جرب يحسب هو اصلا بيدفع ضرايب كام كل شهر؟؟؟ دا المرتب علية ضريبة... الاكل علية ضريبة... المية و الكهربا عليهم ضريبة... اى ورقة ملهاش لزمة عليها ضريبة... عربيتك عليها ضريبة... احسب كدة كل الهيصة دى تعمل كام ضرايب (بغض النظر عن مسمى الضريبة) و احسب متوسط الفرد العادى بيدفع كام ضرايب فى السنة

و فى المقابل شوف انت بيتصرف عليك كام من الضرايب دى سواء صحة او تعليم و خلافة... و كل يوم تسمع ان الدولة عايزة تزود مواردها... يا جدعان المشكلة مش فى الموارد... المشكلة فى اهدار الموارد... و طول ما الاهدار موجود فا زيادة حجم الموارد مش الحل... لو انت شايل قربة مخرومة عمر ما الحل انك تزودها ميه... مهى حتخر برضة... و كل يوم تالف تاليفة جديدة تاخد بيها ضريبة جديدة عشان الناس اللى بتسرق بقوا اكتر و اكتر

يا عم كفاية انهم بياخدوا منك تامين على نمرة العربية الجديدة... طيب ما انت دافع تامين على القديمة و بتسلمهم النمرة... اذا مفيش اى لزمة للتامين دة... حد اخدة تانى؟؟؟ و برضة بتدفع تامين على الجديدة... و قيس على كدة حاجات كتير اوى... طيب فين يا جدعان تاثير الفلوس دى علينا؟؟؟؟؟

اذا الموضوع مش ان الفلوس تضلعنا ولا لا...

هو لو حد ضربك بالقفا حتقص حتة؟؟؟

لا طبعا...

يبقى هل دة مبرر انك تاخد بالقفا؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟

كفاية "ضرايب" بقا... احنا اتهريبنا ضرب

MMamdouh

**إبراهيم.صادق** · 16-11-2009 03:12 PM

المشاركة الأصلية كتبت بواسطة MMamdouh

هو لو حد ضربك بالقفا حتقص حتة؟؟؟

لا طبعا...

يبقى هل دة مبرر انك تاخد بالقفا؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟

MMamdouh

سؤال كويس !!

**أبو عبدالله** · 16-11-2009 03:13 PM

اخ احمد انا مش قصدي اجمعك معاهم
ولكن هما بيفكروا بنفس المنطق ده
ان الناس كلها معاها
وبعدين الفكره ان ده فتح للباب اساسا انك تاخد ضريبة على حاجه المفروض تبقى اخر حاجه تتكلم فيها

استاذ احمد اسمحلي اختلف معاك
وان مسالة 2000 جنيه مش حاجه دي فانت بتاكدلي ان حضرتك برضه مش شايف كل الشعب وانما فئة محدده بعينها
ناس كتير الــ 2000 جنيه دلو ميحلموش انهم يمسكوهم في ايديهم
وانا على فكره مبتفرجشي على افلام ولا مسلسلات من التلفزيون ولكن عايش وشايف الشارع وعندي امثلة كتير جدا وليس حاله شوفتها مثلا وواخدها مثال عام .... لأ مش كده خالص

وزي ما قال محمد ممدوح انت بتدفع كمية ضرائب مهولة اساسا خلاص خلصت موارد البلد علشان تدور على سكن الناس
ده وطني وبشتري منه الأرض كمان وكمان هتحاسبني اني قاعد في شقه امال المفروض الشعب يقعد فيين ؟؟؟؟؟؟؟؟؟؟؟؟؟؟؟

يا مثبت العقل والدين ثبتنا وارحمنا من متخذي القرارات العشوائية وهما مش عايشين معانا

حتقولى قناة السويس؟ قناة السويس ايرادها 30 مليار فى السنة ...نسيت اقول ان دعم البنزين لوحده 40 مليار...علشان دايما الناس تقولك هى فلوس قناة السويس بتروح فين

واضح ان حضرتك بتاخد كلامهم بمحمل الثقة الزائدة بدون ما تراجع الكلام اللي بيقولوه

حضرتك دعم البنزين ده كلام على ورق
يعني ببساطة هما بيعطوك البنزين مثلا بــ 1.85 قرش اللتر 92
هما بقه بيحسبوا اللتر ده بيتباع في الخرج مثلا بــ 3 دولا مثلا يعني بما يعادل 15 جنيه مصري مثلا برضه
هما بقه بيحسبوا انك بتدفع 1.85 قرش فقط امام 15 جنيه بالخار يبقى الفارق حوالي 13.15 للتر الواحد
هو ده الدعم بتاعهم انهم مبعوش اللتر بره بــ 15 جنيه وبعهولك انت المواطن بــ 1.85 قرش فقط
يبقى انت واخد دعم 13.15 جنيه

عرفت الدعم جاي منين
وهو في الأول والأخر بترول من الأرض جاي ببلاش تكاليفه كلها في استخراجه وتكريره
وحسبي الله ونعم الوكيل

**إبراهيم.صادق** · 16-11-2009 03:18 PM

المشاركة الأصلية كتبت بواسطة ahmed4000

واكيد الحكومة لو عليها تضاعف مرتبات الموظفين عشر مرات
لكن اللى يقدر يعمل كده يقول نجيب فلوس منين؟

اومال البلد تجيب منين؟

اللى عنده حل عملى يقوله؟

المفروض برضه ان اللي ماعندوش حل ومش عارف يجيب منين يوسع السكة ويركن على جنب ويتنحى ومايفضلش ماسك في الكرسي والسلطة لغاية آخر نفس يمكن حد غيره يعرف يفكر ويلاقي حلول مش حل واحد

**ahmed4000** · 16-11-2009 03:18 PM

يا اخ عبد الله انا مجبتش سيرة رقم بالالف خالص انا بقو 200 جنيه وراجع اللى انا عامله بلون مختلف علشان تعرف ان بقول ان فى ناس مطحونة وناس بتعيش بخمسين جنيه فى الشهر
لكن مش معنى ان عندى 30 مليون واحد غلبان انى مخدش من ال30 مليون اللى (نص) غلبانين

المشاركة الأصلية كتبت بواسطة ahmed4000

فمحدش يقول ان "الفئة دى" متقدرش تدفع 300 جنيه فى السنة ضريبة

فى غلابة وفى ناس معاهش 50 جنيه فى الشهر حتى...لكن مش دول المستهدفين ولا حد حيدفعهم حاجة

وعلى العموم ده كان راى وبقوله مش دفاعاً عن حكومة ولا حزب ولا كلام فاضى من ده..بس لانى شايف ان الحكومة لازم تشتغل واحنا كمان لازم نعمل حاجة...الفلوس مش حتنط للحكومة من الارض ولا حتنزل من السما

**MMamdouh** · 16-11-2009 03:32 PM

المشاركة الأصلية كتبت بواسطة ahmed4000

والله المشكلتين نقص موارد واهدار للموارد

ودول كلمتين كنت كاتبهم فى موضوع قبل كده وبالصدفة جه فيهم برده ذكر قناة السويبس

واكيد الحكومة لو عليها تضاعف مرتبات الموظفين عشر مرات
لكن اللى يقدر يعمل كده يقول نجيب فلوس منين؟ مش حقول ان الموظفين دول مبينتجوش حاجة اصلا ياخدوا عليها فلوس..لكن ما علينا قولى اجيب منين فلوس ازود مرتبات الموظفين؟

ياريت كلام بالارقام ومن غير هتافات..(زمان قالولنا لو حتقولى يجب ويلزم وضرورة الكلام ده كل الناس حافظاه..عايز تغير قولى برنامج بخطة جاهزة وتوضح حتموله ازاى) يعنى لو حد قالى الوزراء والفلوس اللى بيخدوها حقوله بالارقام بياخدوا 90 مليون جنيه فى السنة...يعنى لو وفرتهم مش حقدر ازود مرتبات الفين موظف حتى

لان الاجور والمعاشات بتوصل ل 40 مليار جنيه

يعنى علشان تضاعف المرتبات محتاج 40 مليار جنيه...

الحل الوحيد قدام اى حكومة -لان دخلها الاساسى بيبقى من الضرايب- انها تزود الضرايب..راجعوا كده الناس عملت ايه وقت الضريبة العقارية اللى حتخلى اللى عنده شقة بمليون جنيه يدفع 600 جنيه فى السنة

راجع التريقة اللى بتتعمل على حملات الترويج للضرايب

اومال البلد تجيب منين؟

حتقولى السياحة؟ السياحة مبيدخلش منها حاجة للحكومة ده كله للافراد برده بالارقام
هو السايح بيركب تاكسى الحكومة؟ بيتعامل مع شركة سياحة الحكومة؟ بيتغدى فى مطعم الحكومة؟ بيسكن فى فندق الحكومة؟ اقصى حاجة الحكومة بتاخدها تمن التاشيرة وده كلام فاضى او رسوم المعابد والمتاحد وبرده كلام فاضى

حتقولى قناة السويس؟ قناة السويس ايرادها 30 مليار فى السنة ...نسيت اقول ان دعم البنزين لوحده 40 مليار...علشان دايما الناس تقولك هى فلوس قناة السويس بتروح فين

اللى عنده حل عملى يقوله؟ حتى الفساد اللى الحكومة نفسها معترفة بيه مبيسرقش 40 مليار، لان كل ايرادك اصلا ميعديش 150مليار

كلام جميل

يبقى من المنطقى اقلل الدعم من على موارد الطاقة اللى رايحة للصناعة... انا ادعم واحد بيطبخ فى بيتهم لكن ادعم واحد عندة مصنع بيكسب ملايين لية؟؟؟ و كذلك الدعم على البنزين... ليه اصلا ادعم بنزين 95... هو اللى بيحط 95 غلبان؟؟... دا طبعا غير حوار الغاز اللى بيروح لاسرائيل بسعر ارخص من سعر بيعة للمصريين

و بعدين الارقام اللى بياخدها الوزراء دى الارقام الرسمية... احنا بنتكلم فى الفساد و السرقة... يعنى لما يكون عندك اصول بالمليارات و تتباع بتراب الفلوس تحت بند الخصخصة يبقى دة فساد و الامثلة كتير... لما يبقى عندك جراج متعدد الطوابق بنيتة بتكلفة 55 مليون جنية و ترجع تهدة بتكلفة 5 مليون جنية عشان "مخالفة فى التراخيص" يبقى دة اسمه اهدار و اللى عمل كدة يتحاسب (اللى بنا و اللى هد) و قيس على كدة حاجات كتير من تخبط ادارى و غياب التخطيط الخ الخ

MMamdouh

**ahmed4000** · 16-11-2009 04:18 PM

المشاركة الأصلية كتبت بواسطة emsadeck

المفروض برضه ان اللي ماعندوش حل ومش عارف يجيب منين يوسع السكة ويركن على جنب ويتنحى ومايفضلش ماسك في الكرسي والسلطة لغاية آخر نفس يمكن حد غيره يعرف يفكر ويلاقي حلول مش حل واحد

مهو بيحاول ينفذ الحل الوحيد اللى اى دولة بتعمله.....تفرض ضرايب

بالنسبة للاخ عبد الله فالدعم ده مش افتراضى لاننا مستوردين للبترول وانتاجنا مش هو النوعية اللى بتستخدم فى البنزين

يعنى بندفع تمنه فعلا مش بنفترض اننا لو كنا حنصدره كنا كسبنا وبنقول هو ده الدعم

بالنسبة للباشمهندس محمود انا متفق معاك تماما ان الدعم لازم يتشال فعلا من على المصانع بس خلى بالك ساعتها صاحب المصنع حيتكلف اكتر فى انتاج نفس السلعة يعنى ببساطة حيغلى السلعة علينا فدعم المصانع جزء منه رايح لينا

لكن كمان فى نفس الوقت حرام ان المياه والكهرباء والبنزين تدعم على (القادرين) والنبى يجماعة مليون خط تحت القادرين علشان محدش يقعد يهاجمنى

طبعا موضوع تصدير الغاز ده مقدرش اتكلم عنه

-

الموضوع: رحت عملت اقرار الضرائب العقارية

LinkBack

أدوات الموضوع

عرض

-

-

-

-

-

-

المواضيع المتشابهه

استفسار بخصوص الضرائب العقارية

ادخل حمل بسرعة اقرار الضريبة العقارية للوحدات السكنية pdf

استفسارات بخصوص الضرائب العقارية

الضرائب العقارية وصلت

الكلمات الدلالية لهذا الموضوع

المفضلات

المفضلات

ضوابط المشاركة