رحت عملت اقرار الضرائب العقارية
النهاردة رحت عملت اقرار الضريبة العقارية، الموضوع ما اخدش اكتر من 10 دقايق و تفاصيله كالأتى:
- انا رحت المقر الرئيسى اللى فى شارع منصور، قدام ضريح سعد زغلول.
- هناك ممكن اى حد يقدم الاقرار بغض النظر عن منطقة سكنه، بس باقى مأموريات الضرائب ملتزمة بمنطقتها بس.
- نماذج القرارات موجودة فى المكتبة بالدور الارضى، هتلاقى يفطة ارشادية توصلك بسهولة
- طلبوا صورة عقد الشقة و صورة البطاقة، بس لما قدمت الاقرار اخدوا صورة البطاقة بس!!!!
- الاقرار شكله معقد، بس طلع سهل جدا فى بياناته و الموظفين كانوا متهاونين و عموما مكنش فى ضغط ولا طوابير.
- بتملى الاقرار و تسلمه فى المكتبة برضوا و تاخد ايصال استلام.
- لما يحددوا قيمة الضريبة هيتصلوا او يبعتوا رسالة على الموبايل بقيمة الضريبة.
- اول شريحة هى 500 الف جنيه و ضريبتها 165 جنيه فى السنة، اقل من كده معلهوش ضريبة.
- الضريبة بتدفع على قسطين و اللى عنده اكتر من عقار بيتحاسب عادى حسب قيمة كل عقار.
النقطة المهمة بقى ان الناس اللى قدمت الاقرار لغاية دلوقت قليلة جدا جدا و الموظفين متوقعين اقبال كتير فى اخر المهلة اللى تنتهى اخر السنة، فبجد انصح كل واحد انه يروح يخلص من المشوار ده دلوقت فى الهدوء قبل ما يعانى من الزحمة و كده كده كله هيقدم الاقرار.