الموضوع: الحقيقة وراء فوز منتخب مصر .!

مهندس احمد... معلش، بس اسلوب تقبل ده علي اختك و مراتك، و بالرغم انه اصبح منتشر جدا في اي حوار، الا انه مش مقبول بالنسبة لي نهائياً، و لولا اني اعرف انك بتقوله علي سبيل التعود، و احتراماً للاخوة المفترضة بين اعضاء المنتدي، كان ممكن يكون ردي غير كده....

للأسف انا متشرفتش باسمك...
اولا قبل اى كلام انا بعتذرلك ان كنت ضايقتك بكلامى ولكن انا مقصدش اشخاص بعينها طبعا احنا جميعا اخوة وهن اخوات لى ومقصدش اساءة لهم ابدا ابدا وانا بعتذر مرة تانية
انا كل اللى اقصدة ان فى ناس بتبقى فرحانة وواخداها نوع من المنظرة وهم رايحين الاستاد ومعاة واحدة صاحبتة ولا واحدة من الشارع ولا اى حاجة ..... وطبعا كلنا عارفين اية اللى هيحصل مع الزحمة والبهدلة اللى هناك وبالفعل اصحابى كانوا فى الاستاد امبارح وشافو من المواقف دى وبالذات الدرجة التالتة !!
المهم ان اى انسان من دول لو راجل فعلا واللى معاة دى انسانة بيحترمها وليها قيمة عندة هيحافظ عليها ويحاول بقدر الامكان انة يحميها من اى مضايقات او شبهات حتى لأنة مش هيقبل ان اى حد يتكلم عليها كلمة مش تمام
عمرة ما هيبقى فرحان وهو شايفها لابسة مش عارف اية وواقفة ترقص فى وسط الشباب فى الشارع
ولا مش معايا؟؟؟...

ثانياً: لما قلت الناس دي هتحكم مصر، لم اقصد نهائياً ان السيد حمبوكشة هيكون رئيس جمهورية مصر القادم، و لكني قصدت انه سيد حمبوكشة سيفرض اسلوبه و فكره علي المجتمع و الشارع المصري، و الدليل انك كرجل علي درجة عالية من التعليم الجامعي (مهندس) بدأت في التسليم لفكر هولاء، و كأنه اصبح من الطبيعي و المسلم به التحرش بسيدة او فتاة في اي مكان مزدحم، و كأن مصر اصبحت محمية طبيعية لحيوانات مفترسة و علي بابها لافتة احترس من الكلاب السعرانة. و صدقني اخي الفاضل، اني لا ادعي شرف امتلاك الحل او الشجاعة في مواجهة هولاء، فانا من الناس اللي ما بتحاولش الخروج مع زوجاتهم او بناتهم بدون سيارة، و اختيار اماكن الخروج بدقة متناهية، و العسكرة بالمنزل في ايام الاعياد...الخ (ده لما كنت في مصر).

اكيد الناس دى مش هتفرض رأيها لأن ببساطة الناس دى ملهاش رأى ولا فكر ولا اى حاجة وبالطبع انا مسلمتش لفكرهم وفكرهم مرفوض تماما وزى مافى ناس من النوع دة فى بردة ناس كويسين
بس تعالا نفكر بالراحة , انا اية اللى يخلينى اوصل لمستوى الناس دى ؟؟..احتك بيهم لية؟ ... انا مقدرش احكم على اخلاق اللى ماشيين حواليا فى الشارع اكيد فى منهم الكويس وفية الوحش يبقى لية احط نفسى فى موضع شبهة لية اخلى اى حد ملهوش لازمة ايا كان انة يتكلم او يبص بصة مش كويسة
انت نفسك وانت انسان محترم ومتعلم ومثقف لو شفت بنت عمالة ترقص فى وسط الشارع اكيد مش هتقربلها ولا هتعملها حاجة بس نظرتك ليها هتبقى ازاى ؟؟ هل ممكن تقول انها انسانة محترمة من بيت محترم؟؟
وبلاش نقول المظاهرات وتنظيم البنات للمظاهرات لأن على الاقل الناس اللى عاملة مظاهرة ليها هدف ورسالة من ورا المظاهرةوبالطبع مش هنلاقى اى حد من الاشكال اللى اتكلمنا عليها دى فى مظاهرات لأن بالطبع لايوجد هدف ولا تفكير ولا اى شئ
واحتفالات الكورة والتشجيع منتهى العشوائية وبدون هدف وهتلاقى اشكال من كل حتة وبالتالى متستبعدش اى حاجة تحصل
زى الكلاب فى الشارع ارمى بس حتة عضمة هتلاقى كلاب الشارع كلها اتلمت واتخانقت مع بعض عليها !!
مش معنى كدة ان احنا هنقعد فى البيت علشان شوية اشكال ضالة لأ بس فى اصول ودين .. احاول انا مروحش للمشكلة بنفسى

و الله لا اخفي عنك مدي دهشتي في كل مرة اسافر بها الخارج، و خاصة بعد استقراري خارج مصر، كان دايما يدور بذهني: سبحان الله احنا ماشيين كده في الشارع علي رجلينا عادي ؟؟ محدش ليه دعوة بينا ولا بيبص علينا، ناهيك عن الاحساس المتواصل بالامان، و الله بشوف سيدات و فتيات ماشيين في الشارع لوحدهم في اوقات متأخرة جداً بدون ان يجرؤ مخلوق واحد ان يتعرضلهم حتي و لو بنظرة.....

كفاية كده، علشان انت قلبت عليا المواجع كتير و لو فتحت في الكلام مش هخلص النهاردة

لو اتكلمنا فى النقطة دى بالذات هنتكلم كتيير , هنتكلم على قلة اخلاق ودين وتربية وظروف اقتصادية منيلة وانعدام الامن و................................
وانت شكلك زهقت من الكلام وانا بنام وانا قاعد وشكلى مش هصحى للشغل بكرة :)))

انا بكرر اعتذارى وارجو انك تتقبلة