الموضوع: حد يطلب الإسعاف

حد يطلب الإسعاف

كتب على سلامة ١٥/ ١١/ ٢٠٠٩



هذا المسلسل برعاية ورق العنب

والقطنة ما بتكدبش

لكن آبن آدم كداب..

واتكلم براحتك

وأنا مالى

مش إنت اللى ها تدفع الحساب..

وقول للغلط لأ

بس ما تقولش إن أنا اللى قلتلك

ولا تجيبش سيرتى ف النيابة

مهما كانت الأسباب..

ولو قلقان كلمنى

أنا بسيب النور والع

عشان بخاف

م القطط والكلاب..

وخلى حد يطلب الإسعاف

واحسبها صح

واقتل عيالك عشان توفر

والحكومة ترتاح..

واطفى النور

ودارى الجراح..

ف جيب البدلة القديمة

المتعلقة ف الدولاب..

وقدم إقرارك الضريبى لعشماوى

وما تسألوش جاب نمرتك منين

وقول له وأنت بتعيط

نفسى قبل ما أموت

فى نص كفتة وربع كباب..

ولازم تعرف أن الاستثمار

هو اللى شغل الواد سعيد

ابن اختك أنهار عند فريد النصاب..

ولو عايز تعرف أنت مين

ده عنوان السرايا الصفرا

اسم الدلع لمستشفى المجانين

خد تاكس

واستنانى قدام الباب..

ولو عايز تخس

اتصل بالنمرة دى

أما لو عايز تحس

ده بقى موضوع تانى

مش موجود ف الكتاب..