الموضوع: الانترنت بيتكلم عربي

المشاركة الأصلية كتبت بواسطة mahora

دى الخلاصة بغض النظر عن التفاصيل الفنية

قال (ووو.نايل موتورز.شبكة) قال

ومالو العربي؟

كلنا فاكرين أيام مكانش فيه محتوى عربي على الانترنت وكان موقع الأهرام عبارة عن صورة للنص لأن المتصفحات كانت لا تدعم العربية. ولم يكن أحد منا يستخدم اللغة العربية على الانترنت اطلاقاً.

دلوقتي المواقع الإخبارية باللغة العربية والمنتديات العربية مفيش أكتر منها.

الانترنت بيتجه يوم ورا يوم للمحلية في كل دول العالم. عدد المواقع والمجتمعات على الانترنت التي تستخدم اللغات المحلية في تزايد مستمر.

هناك ملايين في وطنا العربي لا يجيدون الانجليزية ولا يتكلمون غير اللغة العربية. النطاقات باللغة العربية هي آخر خطوة ليكون تعامل المستخدم مع الانترنت بالكامل باللغة العربية. وربما لا يحتاج لقراءة أو كتابة كلمة واحدة بالانجليزية. نظم التشغيل اصبحت معربة بالكامل منذ زمن.

نظام تشغيل معرب + انترنت معربة = تجربة عربية خالصة.

ح تقول لي، مين ده اللي في الزمن ده مايعرفش انجليزي؟
ح قول لك، أنا وأنت مهندسين ومحاسبين وأطباء ومهنيين على العموم. أعمالنا تتطلب الالمام بالانجليزية. ناس كتير لا تجيد الانجليزية ولا يحتاجوها في أعمالهم ومش لازم يحسوا بالعجز.

أنا شخصياً استحالة أقلب لغة المحمول بتاعي للعربية بس متفهم ان الغالبية العظمى من المصريين يستخدمون الواجهة العربية.

ملحوظة: من سنة ونص كنت استحالة اتخيل اني اكتب كل اللي أنا كتبته دلوقتي بالعربي في بضع دقائق. كان ممكن آخد ساعة كتابة :)

المشاركة الأصلية كتبت بواسطة mahora

حاجز اللغة مش هو اللى هيحل المشكلة و يخلى الفلاح فى الغيط يخش على الانترنت.... الحاجز اكبر من كده بكتير.... هو حاجز حضارى وتكنولوجى و علمى و طريقة تفكير و خلافه..... الخ

حكاية تعريب الانترنت عاملة زى حكاية تعريب الطب..... طالما انت لا تملك الريادة حاليا فانت لا تستطيع فرض لغتك..... و بما اننا فى موقع التابعين و اللاهثين وراء المتابعة فقط و ليس حتى اللحاق فى كافة المجالات العلمية، يبقى مش هيفيدنا الاغراق فى المحلية لان ده هيخلينا ننعزل عمن يحتل موقع الريادة.....

اعتقد يبقى احسن انه لما واحد عجوز ييجى يحاول يخش على النت انه يتعلمها زى ما العالم كله بيتعلمها بمصطلحاتها العالمية التى استقر العالم عليها..... يعنى بدل ما يقول ش.ع.ع (اختصار الشبكة العالمية العنكبوتية) يقول ... World wide ...... ... ده اذا ما كانوش هيخلوها فعلا و.و.و. اللى بالعربى مش عارف هتبقى ايه اصلا........

معاك ان المشكلة هي حاجز علمي تكنولوجي حضاري زي ما حضرتك قلت.

تعريب الانترنت لا يشبه تعريب الطب على الاطلاق. الطب علم ومهنة تطلب من الباحث والممارس الالمام باللغة الانجليزية لأنها اللغة التي يتم تطوير الطب بها.

أما الانترنت فهي مجرد تكنولوجيا ووسيلة لنقل المحتوى. نحن نملك المحتوى العربي في مجالات الحياة المختلفة التي يتم تداولها على الانترنت. كل ما يجب علينا هو تطوير التكنولوجيا لكي تسمح بتداول المحتوى العربي. فلنترك الالمام باللغة الانجليزية للمطور العربي في حين ان المستخدم العربي لا يجب أن يكون حاجز اللغة مشكلة له. لا ضرر في أن يكون المحتوى بالعربي وواجهة المستخدم كذلك.

بمنطق حضرتك يبقى من العبث طباعة الكتب والصحف باللغة العربية في حين ان المطابع وتكنولوجيا الطباعة يتم تطويرها في الغرب.