السلام عليكم ورحمة الله وبركاته
عندي سؤال مهم.
هل ممكن اغير بضات المقصات بس من غير ما اغير المقص كله فى الانوس, اصل انا عارف ان البيضة بتبقى متبرشمة فى المقص والصنايعى حيفك البرشام ده عند الخراط و يركب البيضة الجديدة بمسامير عادية الكلام ده صح ولا اييه؟
وعليكم السلام ورحمة الله وبركاتة
بص ياباش لو البيضة فعلا عندك متثبة في المقص ببرشام هتلاقي العلبة بتاعة البيضة الجديدة فيها مسامير وفعلا العفشجي بيفك المقص ويبعته عند الخراط يفور البرشام وبعد كدة بيركب البيضة عادي بالمسامير وده انا عملتة في عربيتي لما غيرت البيض
لكن في عربيات بتكون البيضة جزء واحد مع المقص يعني ملهاش برشام ولاينفع تتفك اصلا وفي الحالة دي مش هتلاق ليها بيض بيتباع علشان البيضة بتكون جزء من جسم المقص وبالتالي لو البيضة باظت المقص بالكامل بيتغير.
انا مش عارف الانوس بقى انهي نظام فيهم بس أكيد العفشجي لما يشوفها هيقولك او حتى بتاع قطع الغيار لو هي مش بتتفك مش هتلاقيها بتتباع اساساً
الف شكر على الرد, فعلا العفشجي قالى نفس الكلام اللى انت بتقولو بس انا كنت عاوز اتاكد ان كلامه صح, الانوس ممكن تشتري بيض المقص لوحده.
ممكن تشترى بيض المقص لوحده ولو عندك برشام بيتفور عادى خالص
والبيضتين عاملين 70 جنيه ماركة ctr
اللانوس على ما اذكر البيض بتاعها الاصلي بمسامير مش برشام يعني ممكن اوي متحتاجش الخراط من اساسه
ماتنساش تركب مسامير صلب و ورد جروفر او مشرشر و صواميل كونتر برقبة علشان تتربط صح و ماتفكش من المطبات