الكربراتير و الاستهلاك

**Dojuar** · 17-11-2009 02:55 PM

بسم الله الرحمن الرحيم

كتير مننا بيعاني من استهلاك البنزين و يقعد يدور و يسأل. المشكلة انو احيانا بيفتكر انو حل المشكلة و لكن الحقيقة انو اخد مسكِن.

انا مثلا لما اشتريت عربيتي بدأت احس ان الاستهلاك مش طبيعي لغاية ما ابتدت تبطل مني لما ارفع رجلي من دواسة البنزين. رحت للميكانيكي بتاعي قاللي كله هايتحسن لما نفك الكربراتير و ننضفه بالتينر.

المهم ابتدى الاستهلاك يزيد فعلا (8 في الليتر) و اتهيألي ساعتها ان ده آخر العربية.

لحد من شهرين تقريبا بقيت افول كل 180 كيلو!!

لحد ما قريت موضوع عن تنظيف الرشاشات (مع ان عربيتي مش انجكشن) و الاخ madawbs الله يكرمه ما بخلش بالنصيحة
http://www.nilemotors.net/Nile/71111-a-8.html

المهم انا ماحستش انا بتاع شبرا المشهور ده هايخلصني بسرعة خصوصا اني سمعت ان زباينه كتير و خفت برضو يكروتني.

المهم و انا بدور لاقيت و احد حاطط اعلانه على النت اتصلت بيه و رحتله على طول ووجدنا الاتي:
- كان فيه باب مقفول و الباب التاني فيه تآكل
- غير البكات
اسيبكم مع الصور في المرفقات و اعتذر لاني كنت عايز اعرضها بشكل احسن في الموضوع.

هاتلاحظو اني عامل علامة بتبين سبب الستهلاك الكبير ده (الباب اللي فوق هوا اللي باين فيه التآكل ده)

المهم الراجل بعد ما غير الباب ده و صلح الباب المقفول, غيرلي البكات و بعدين غسل كل حاجة في البنزين (طبعا انا نسيت اقول ان غسيل الكربراتير بالتنر غلط جدا).

بعد كده ركب الكربراتير و قعد يظبط العربية, المهم ان هالخصلكم المزايا و العيوب اللي انا صادفتها يعد التجربة و الي محتاج استشارتكم فيها:

المزايا:
- طبعا الاستهلاك اتحسن كتير (200 في الصفيحة)
- صوت العربية بقى اوطى
- مجرد اما ادور بالمفتاح سنة بسيطة العربية تلقط معايا

العيوب:
- مش من اول مرة تدور معايا بالذات الصبح , لازم اشعر بنزين و ده مكنش ظاهر معايا الاول
- ساعات لو بعمل مشاوير بسيطة العربية تبطل مني

انا بستنتج السبب في العيبين دول ان بيك السلانسية مقفول عمدا, صح و للا انا غلطان؟

ارجو اني اكون قدرت اشرح الموضوع كويس و اي سؤال هاكون سعيد جدا لاجابته.

مرة اخري اشكر الاخ madawbs و كل الاخوة اللي شاركو برأيهم.

**H.ibrahim** · 17-11-2009 06:04 PM

شكرا على الموضوع - واتمنى انك تكتب عنوان المكان و تليفونه و اسم الورشة وصاحبها حتى تعم الفائدة للجميع و هل هو متخصص فى الكربرتير فقط ولا ميكانيكى .
اشكرك مرة اخرى على مساهمتك فى تقديم النفع بالمنتدى

**madawbs** · 18-11-2009 07:46 AM

المشاركة الأصلية كتبت بواسطة dojuar

بسم الله الرحمن الرحيم

العيوب:
- مش من اول مرة تدور معايا بالذات الصبح , لازم اشعر بنزين و ده مكنش ظاهر معايا الاول
- ساعات لو بعمل مشاوير بسيطة العربية تبطل مني

انا بستنتج السبب في العيبين دول ان بيك السلانسية مقفول عمدا, صح و للا انا غلطان؟

ارجو اني اكون قدرت اشرح الموضوع كويس و اي سؤال هاكون سعيد جدا لاجابته.

صباح الفل والف مبروك على الاستهلاك (بس ماقلتش 200 فى الصفيحة فى البلد ولا على الطريق السريع وعلى سرعة كام )
بالنسبة للدوارة ممكن يكون السبب من المارش او البطارية او ممكن يكون الراجل حب يكرمك فحطلك بيك بنزين مقاس اصغر شوية علشان يحسن الاستهلاك فده ممكن يخليك تحتاج دوسة بنزين قبل ماتدور بس ياريت تقاصيل اكتر عن العيب الثانى علشان مش واضح قصدك ايه بمشاوير بسيطة منين لفين وهل يتكون مسخن العربية ولا لأ وهل بتكون طالع من غير تسخين وتاخد الدائرى مثلا وتجرى فالعربية تقطع وتبطل ولا ايه ؟؟ وياسيدى لا شكر على واجب

**alhourriah** · 18-11-2009 09:39 AM

مبروك ان العربية مش فيها مشاكل تانية وأن المشكلة اتحلت. نفس السؤال هي بقت تعمل معاك 200 على الطريق السريع. لأنه برأيي اذا كان كده فده مش كويس .. وده بيرجع لحسب نوع العربية.

**Dojuar** · 18-11-2009 04:27 PM

المشاركة الأصلية كتبت بواسطة h.ibrahim

شكرا على الموضوع - واتمنى انك تكتب عنوان المكان و تليفونه و اسم الورشة وصاحبها حتى تعم الفائدة للجميع و هل هو متخصص فى الكربرتير فقط ولا ميكانيكى .
اشكرك مرة اخرى على مساهمتك فى تقديم النفع بالمنتدى

في حارة كده ناحية مرور عبود. بس لازم تكلمه الاول و تربط معاه عشان تعرف تروحله.

اسمه حماده و موبايله: 0124698043 و هوا تخصص كربراتيرات بس و كان قاللي ان متخرج من ورشة شبرا اللي جب السيما.
الراجل ده انا كنت متخيل انو في ورشة كبيرة و كده بس هوا فاتح ورشة صغيرة

المشاركة الأصلية كتبت بواسطة madawbs

صباح الفل والف مبروك على الاستهلاك (بس ماقلتش 200 فى الصفيحة فى البلد ولا على الطريق السريع وعلى سرعة كام )
بالنسبة للدوارة ممكن يكون السبب من المارش او البطارية او ممكن يكون الراجل حب يكرمك فحطلك بيك بنزين مقاس اصغر شوية علشان يحسن الاستهلاك فده ممكن يخليك تحتاج دوسة بنزين قبل ماتدور بس ياريت تقاصيل اكتر عن العيب الثانى علشان مش واضح قصدك ايه بمشاوير بسيطة منين لفين وهل يتكون مسخن العربية ولا لأ وهل بتكون طالع من غير تسخين وتاخد الدائرى مثلا وتجرى فالعربية تقطع وتبطل ولا ايه ؟؟ وياسيدى لا شكر على واجب

بالنسبة للاستهلاك فهو 200 بالنسبة لجوة البلد اما على طريق سريع فلسا ملقتش الفرصة اجرب.

بخصوص الدوارة هيا مش من المارش لانه هوا هوا, و البطارية جديدة من شهرين.
وهوا فغلا قعد فترة يدور فيها على البيك الاصغر.
العيب ده يكاد يتلاشى لو العربية عمله مشوار تقيل انما لو سخنتها و لسه طالع بيها دقيقتين و تطفي.

نسيت اقولكم على عيب تاني ظهر بعدها: انه نور العربية و التابلوه بيضعف لما اشيل رجلي من دواسة البنزين.

شكرا لاهتمامكم.

**future_aya** · 18-11-2009 11:56 PM

فقط المطلوب انك تعلى السلانسية شوية
لان عدد اللفات R P M حسب وصفك قليل عن الطبيعى
راجع الفنى الذى ضبط الكربراتير لسيارتك وهو سيعياد الضبط فقط فى اقل من دقيقة وشكرا

**reamoz** · 23-11-2009 03:54 PM

المشاركة الأصلية كتبت بواسطة future_aya

فقط المطلوب انك تعلى السلانسية شوية
لان عدد اللفات r p m حسب وصفك قليل عن الطبيعى
راجع الفنى الذى ضبط الكربراتير لسيارتك وهو سيعياد الضبط فقط فى اقل من دقيقة وشكرا:ta_clap[1]:

100% مظبوط الكلام دة