يا فندم انا معايا نوفا ريجاتا 1989 سافرت بيها من القاهره حتى طما (اول مركز فى سوهاج بعد اسيوط) 3 مرات فى شهر واحد فبراير 2009 رايح جاى (لظروف عمل معينه) و كل اللى اخذته السياره فى كل سفريه تفويله بنزين و نصف لتر مياه خضراء بشرط ان حاله العربيه تكون كويسه
انصح حضرتك بالاتى :
خذ الطريق الصحراوى الغربى من المدخل اللى بعد ميدان الرمايه (بيسموه احيانا اول طريق الفيوم)
و لا تستخدم الطريق الزراعى اللى من المنبيب مهما حصل لانك لو اخذتها زراعى و نزلت الصبح هتوصل بعد بكره (الطريق سيىء جدا و ضيق جدا و على شمالك ترعه الابراهيميه الشهيره و على يمينك هتمر على كل قريه مصريه من الجيزه الى اسوان هذا بخلاف الحوادث و عطله الطريق و الكماين بين كل محافظه و الثانيه)
الطريق الصحراوى الغربى واسع و جميل و منور بالليل و فيه كذا استراحه و كذا بنزينه لكن الخوف فيه من سواقين النقل المساطيل + الرادار فيه لغايه 120 + فيه كمين فى مدخل المنيا (بلد اسمها سمالوط) بيوقوفا الملاكى و يفتشوا العربيات فيه غلاسه
المهم الطريق اخره اسيوط (هتوصلها فى 4 ساعات لو ماشى على 100 و ريحت فى النص فى اى كافيتريا) و بعدها هتمسك الرزاعى لمده ساعه هتلاقى نفسك فى سوهاج
و تروح و تيجى بالسلامه ان شاء الله