Yes, We Can! Ya Man! E-G-Y-P-T
هذا الموضوع بعيداَ عن ماتش الجزائر غداَ رغم إنني أكتبه من صالة المطار في طريقي إلي السودان للوقوف وراء منتخبنا و رفع العلم المصري علي أرض السودان إن شاء الله و الفرحة .
الموضوع بخصوص اللي شفناه يوم السبت قبل الماتش و اللي هنشوفه تاني بكرة .. علم مصر معلق علي تقريباَ جميييع السيارات .. حتي الموتوسيكلات و العمال البسطاء كل واحد معلق علم و ماشي .. محلات الأحذية الإيطالية الماركات و محلات عصير القصب .. حتي أديداس و تيمبرلاند معلقين علم مصر .. لم أذهب إلي مكان لم أر فيه العلم .. الناس دي معلقة العلم ليه ؟
لسببين .. أول حاجة لتشجيع منتخبنا و عشان نقول أيوة إحنا نقدر بعد ما كنا بنسبة 80% خارج التصفيات .. السبب التاني هو حاجة الناس للشعور بالإنتماء لشئ ناجح ذو قيمة .. و ده تمثل في نجاحات المنتخب .. الناس عايزة تقول "إحنا" كسبنا .. و "إحنا" الأبطال بعد إنتكاسات عديدة يعيشها المجتمع المصري .. تمثل هذان السببان مع حب الناس لكرة القدم فتفجرت الشوارع ببراكين من المشجعين و الأعلام المصرية .. و تقريباَ بسبب نموذج نجاح المنتخب أصبح مفيش بيت مصري يخلو من العلم المصري .. و لذلك ..
أرجو من كل واحد نازل من بيته بكرة .. سواء له في الكورة أو ملوش .. مهتم بالماتش أو لأ ... إنه يعتبر كل الناس دي معلقة الأعلام له هو ! عشان تقوله أيوة إنت تقدر .. تقدر تعمل تغيير حتي و لو بسيط .. تقدر تحسن من وضعك و وضع غيرك و وضع شارعك و وضع بلدك .. تقدر تكون أحسن في شغلك و تقدر تسيبه و تشوف شغل أحسن .. تقدر تكون إنسان أحسن و تعيش زي ما إنت عايز! بعد تعب .. بس اما تنجح هتكون منوذج ناجح يلتف حوله الجميع و سبب فرحة للكثيرين .. صحيح إحنا ناسنا مش متحضرين بشكل كافي و مش مثقفين و مبيعرفوش يسوقوا و الفساد مستشري و لكن تبقي بارقة أمل .. فرصة بعد أن ظننا أن هذا البلد لن تقوم له قومة .. أننا نبدأ في الظن إننا نقدر ! و منيأسش.
لو عرفت أسافر هأرفع العلم من أجل كل مصري في مصر .. و لو معرفتش هكون موجود في الشارع رافع العلم برضه بإيدي و علي عربيتي من أجل كل مصري بجانب المنتخب .
بغض النظر عن المباراة و عن نتيجتها ..
بكرة هو يومك .. إنت .. إستمد منه الأمل قد ما تقدر .. شوف الأعلام و إبتسم علي قد ما تقدر .. لأن بكرة مصر كلها هتقول يا مصري إنت تقدر !
http://photos-h.ak.fbcdn.net/hphotos..._8302695_n.jpg
