انكسر الزجاج الامامي C3

**أحمد الدرعه** · 21-11-2007 07:56 PM

من يومين كنت راكن عربيتي في أمان الله (C3 مو 2004) ورجعت لقيت الرجاج الامامي مكسور كسر كبير جدا غالبا واحد ربنا يسامحه بأه رمي طوبه :shock: وكانت من نصيبي الحمد لله.
فرحت لفرع دكتور خالد -في 6 أكتوبر- فقالي تصليحها يكلف مقارب من 300 ج وفي نفس الوقت الكسر هيبان بعد التصليح فالافضل تغيير الزجاج
سالت عند عز العرب : الزجاج الاصلي 1500 ج .
عند دكتور خالد : الاتحاد الاوربي 1200ج.
جبت اسماء كذا محل من yellow pages عندهم زجاج دكتور جريش (من 480 ج الي 450 ج) وزجاج شركة اخري اسمها أمان ب 430 ج.
فأنا نويت أركب زجاج دكتور جريش لأني سمعت كلام كتير حلو عنه وبرضه الاصلي كده غالي جدا صراحه
فانا محتاج خبرتكم لاني يهمني التركيب أكثر من الزجاج وخايف اروح عند حد يعك العربية , قريت موضوع هنا عن واحد عنده كورولا راح لمصنع دكتور جريش وكان التركيب عندهم ممتاز حسب كلامه فهل المشوار يستاهل -لو يستاهل محتاج اعرف عنوانهم في العاشر- ولو في حد (جرب) ورشه أو مكان كويس بيركب زجاج دكتور جريش ياريت يقول ؟

**mohaismail** · 21-11-2007 09:48 PM

انا برضه الزجاج الخلفى بتاع عربيتى اتكسر بسبب طوبة واحد ابن حلال(صنى 2007) المهم اتصلت بالتوكيل قالى تقريبا 600 جنيه وهوه اصلا زجاج جريش الناس قالولى روح لجريش فى العاشر هيكون ارخص كتير المهم روحت وقلتله وفى 5 دقايق جابلى لوح زجاج مغلف تماما يعنى مبرشم ومكتوب عليه نيسان وسألته قالى ده اللى بيتبعت لمصنع نيسان وفعلا نفس الزجاج بالظبط المفأجأة بقى ان السعر بالتركيب كله كان 140 جنيه فقط فأنا انصحك تجيب منه لو زجاج السيتروين اصلا جريش
على فكرة المصنع فى العاشر فى اول المنطقة الصناعية انت روح هناك واسأل عن مصنع د جريش كل الناس هيدلوك والمكان ميتوهش سهل جدا انا روحت ومكنتش عارف حاجة ووصلت على طول وربنا يوفقك

**اسلام المصرى** · 21-11-2007 10:00 PM

ربنا يعوض عليكم خير ان شاء الله , قدر الله و ما شاء فعل.
صاحب الكورولا هو الأستاذ كريم منير و أكيد أول ما هيشوف الموضوع ده مش هيتأخر عليك بالرد و هو عارف مكان المصنع فين بالتحديد و يقدر يوصفهولك. و الله الموفق.

**Karim_Monir** · 22-11-2007 12:18 AM

انا صاحب الكرولا
مين بينده
:D :D :D :D :D :D :D :D :D
فعلا دكتور جريش بيعمل الزجاج زي الفل والتركيب هايعجبك اكتر من الزجاج نفسة ليه بقي
عشان بيركب الزجاج بسليكون اصلي الانبوبة منه تمنها ب 90 جنية
لكن بتاع الزجاج بيركبوا بسليكون الانبوبة ب 7 جنية فقط
شوفت الفرق
مكان دكتور جريش تمسك طريق مصر الاسماعيلية وتطلع الكوبري الاول وتنزل ولما تقرب على الكوبري التاني ماتطلعش الكوبري وتدخل من جنبة يمين وتدخل يمين في اول شمال
انت اول ما تدخل يمين هاتلمح يافطة كبيرة عليها اسم المصنع ولو سالت اي حد تحت الكوبري هايدلك
لما تروح ما تستغربش انك داخل حتة مش ممهدة وواقف في الهواء الطلق
المهم الزجاج والصنايعي اللي بيركب
حاجة تانية خالص
نصيحة بعد ما تركب وانت راجع مامشيش بسرعة عشان ضغط الهواء ما يبوظش السليكون لانه لسه طري
هما هايحطوا سليوتيب فوق السليكون ويقولك ما تجيبش عليها ميه لمدة يوم
نصيحة خلية يومين تلاتة عشان الجو بارد والسليكون مش هايعضم بسرعة
لو احتاجت اي مساعدة كلمني بدون تردد
موبايلي
0101263030
اخوك كريم

اخر حاجة شكرا لاخي احمد شاركي للي بعتلي على الخاص ينبهني لصاحب الموضوع

:lol:

**أحمد الدرعه** · 26-12-2007 12:35 AM

معلش اتاخرت عليكم
رحتلهم يوم 24 نوفمبر وغيرولي الزجاج الامامي ب 370 ج وفعلا زي ما كريم منير قال السيلكون المستخدم ممتاز وكنا يوم سبت فمكنش قسم الحسابات شغال فماخدتش منهم فاتورة ولا حاجه وقالي لو في اي حاجه في الازاز تعالي لنا بس وقلنا اليوم اللي انت غيرت الازاز فيه
المهم خلصت ومشيت بعدها لاحظت وجود تحدب زياده ناحيا اليمين في الازاز فكلمتهم قالولي تعالي واحنا نفحصها ولو كان عيب صناعه نغير الازاز وقعدت بيها شهر تقريبا وبعدين رحتلهم انهارده وانا في الطريق قبل ما اوصل واحد بتاع نقل محمل طوب وصابتني طوبه منهم وعملت نقرة في الازاز قلت الحمد لله علي كل حال بس خفت مايرضوش يغيروا الازاز في المصنع بس طلعوا ناس ذوق جدا وفحصوا الازاز وغيروه بواحد جديد بدون ما ادفع جنيه واحد.
علي فكره تليفونهم : 015410003
والموقع بتاعهم : http://www.drgreiche.com/contactus.htm