الموضوع: فوقوا يا مصريين، المشكلة مش في الجزائريين

المشاركة الأصلية كتبت بواسطة emsadeck

ياباشا لو التصرفات دي كانت فردية أو على الأقل قوبلت بالرفض من الجانب الرسمي لرفضنا المساس بأي شخص لمجرد جنسيته ولكن الصورة الواضحة حتى الأن أن كل ما يحدث من إعتداءات وإهانات يتم برضاء وموافقة بل ومباركة القيادة الجزائرية

أنا معاك تماماً. بس فين رد الخارجية؟
ولو رد الخارجية ضعيف وهزيل (زي ما هو متوقع) يبقى نحاسبهم ازاي؟

الست دي قالت اللي أنا عايز أقوله بالظبط، وبكل بساطة.

YouTube - ‫ط§ظ… ظˆط§ط®طھ ظ…طµط±ظٹط© ط§طھظ‡ط§ظ†طھ ظپظٹ ط§ظ„ط³ظˆط¯ط§ظ†‬‎

المشاركة الأصلية كتبت بواسطة egyegy

انا كمان فعلا حزين جدا من دعوات القتل دي، وكأننا همج وبربر وبندعوا لدبح فراخ ولا خرفان للعيد مش بني آدم، بدون اي وعي ان كل العقائد السماوية وحتى الوضعية تحرم وتجرم مثل هكذا افعال.

الغضب اعمى الجميع عن المتسبب الحقيقي فيما يحيط بنا، المصريين في الاساس بيحاربوا بعض داخل بلدهم.

العلاقات الإجتماعية بين المصريين في أسوء .. أسوء ما تكون، مظاهرها واضحة في كل حته وفي كل مكان، لايمكن تسمية هذه العلاقات تحت أي مسمى سوى كلمة حرب.

الامن الشخصي للفرد المصري معدوم تماما وعلى المتضرر اللجوء للجريمة كي يصحح بها الجريمة التي ارتكبت ضده.

الاسلوب الشخصي للتحدث بين المصريين اصبح كله سُباب وكلمات نابية وبذيئة، والعقول التي تصيغ تلك الكلمات لنتطق بها الالسنة في غياب مطلق.

المرأة عندنا لما بتنزل للشارع بتنهش ان لم يكن بالأيدي فالألسنة، فإن لم يكن فالنظرات الدنيئة تلاحقها في كل مكان.

إستبحنا اعراضنا فأستباحنا الآخرون.

كل يوم احنا بننضرب في بلدنا، ولاحد رفع صوته.

ومحدش يقولي ان احنا الايادي اللي بتضربنا هنا مصرية، والأيادي هناك لم تكن مصرية، الكرامة الإنسانية لا تتحمل التفريط او التهوين سواء من مصري او من غير مصري.

انا آسف جدا إن انا انضربت هنا في بلدي كتير ومعرفتش آخد حقي، وبقولها بصريح العبارة، ولا مرة عرفت آخد فيها حقي، كان المفروض آخد حقي هنا الاول ومنذ زمن.

يا جماعة اللي انتوا بتعملوه ده، كأنكم بتطلبوا من سجانيكم انهم يضربوا ليكم مساجين تانيين، ومحدش فكر ان السجان هو اول من جلدني وهو العائق الاول امام الحرية والكرامة، إحنا بقينا نحب ننضرب وننجلد أكتر ما بنحب الحرية، وكأن السجن هو الحياة الطبيعية والحياة خارج السجن هي اللي بقت شذوذ عن الطبيعي.

وفي الآخر نشكر السيد علاء مبارك، عجيب جدا هذا الشعب فعلا عجيب.

أرجوكم سيبكوا بقى من السلبية دي وحاولوا تتغيروا.

لا تجعلوا بأسكم فيما بينكم

لا تجعلوا بأسكم فيما بينكم

لا تجعلوا بأسكم فيما بينكم

يا ريت يا جماعة اللي مقراش المشاركة دي يقرأها كويس قوي.

مكنتش حعرف أوصل اللي أنا عايز أقوله بطريقة أحسن من كده.

المشاركة الأصلية كتبت بواسطة itsonlyme

أنا زي أي مصري حفرقع من الإهانة والضرب والإرهاب اللي اتعرض له المصريين في السودان.

لكني برضو حفرقع أكتر من رد فعل كل الناس في المنتدى.
الدعوة لقتل أي جزائري بقت عياناً بياناً في المنتدى.
الكل عايز يضرب أي جزائري يشوفوه ويحرق العلم ويطرد السفير ويعلن الحرب.
الكل كفر بالعروبة، الكل أعلن كرهه لكل الجزائريين. التعميم الأعمى طال أكثر الأعضاء بصيرة.

كل ده ومفيش حد فكر حصل فينا كده ليه؟!
د. أحمد سمير اتكلم في الموضوع ده وحصر السبب في سوء إدارة القوة.
أية قوة يا دكتور أحمد؟

السبب هو اننا قبلنا الذل في بلدنا، مش عايزين المصريين يتهانوا في كل بلاد العالم؟

سمعتنا عند الخليجيين ان رجالنا قواد ونسائنا ساقطات. ومن لم يكن لا هذا ولا ذاك فهو أجير ذليل يلهث وراء مالهم (أي الخليجيين) سواء هنا في مصر أو هناك في الخليج.

أفلامنا تصور بناتنا على أنهم جميعاً على شاكلة منة شلبي وسمية الخشاب ورجالنا ببلاهة اللمبي.

"دبلوماسيتنا" الحكيمة جعلتنا عملاء في نظرهم. "خارجيتنا" أساءت لنا بقدر ما أساءت لنا "داخليتنا".

المصري مهان داخل بلده، يقبل الذل والهوان والفقر والمرض ولا يحتج. فكيف تنتظر أن يعاملنا الآخرون بعزه؟

وبعد كل ده الناس تثور وتغضب وتاخدها الحمية عشان ضربونا وحرقوا علمنا ومحدش ثار وغضب على كل الهوان اللي بنشوفه في بلدنا؟

فوقوا بقى. فوقوا!

أنا احساسي بالإهانة مضاعف، الاهانة من همجية وعنف الجزائريين (بعضهم ولو كثروا) وتعاطف السودانيين معهم. والاهانة من رد فعل المصريين اللي مش شايفين غير تحت رجليهم.

ماتبقاش زي اللي غضب واتحمق عشان واحد رمى عليه طوبة وماتحركش لما واحد انتهك عرضه!

لو إدارة المنتدى حذفت الموضوع ده بحجة انه يتعرض للسياسة وتركت الشتائم بل والتحريض الصريح بالقتل في حق الجزائريين في عشرات (بل مئات بدون مبالغة) من مشاركات الأعضاء في المنتدى، احساسي بالذل والعار اللي أنا أصلاً حاسس بي هيبقى غير محتمل.
للا سف دى الحقيقه
أرجو عدم الحذف!!!