الاول لازم نشرح ببساطة نظرية عمل المحرك عشان نفهم اختبارات الكبس دى بتعبر عن ايه...
دلوقتى البستم بيتحرك جوة الشميز فى حركة ترددية من اعلى الى اسفل... و عالى نقطة فى الشميز حنسمية النقطة الميته العليا و اوطى نقطة حنسميها النقطة الميتة السفلى (اسمها نقطة ميتة عشاان فيها بتبقى سرعة البستم صفر استعدادا لتغيير اتجاهة 180 درجة)
نظرية عمل محرك السيارة بتعتمد على دورة اوتو... و دى بيحصل فيها اربع اشواط لتحقيق دورة كاملة... و المقصود بالشوط هنا هو تحرك البستم من احدى النقاط الميتة الى النقطة الاخرى
الشوط الاول بيبقى اسمة شوط السحب و بيبداء من النقطة الميتة العليا الى النقطة الميتة السفلى... و فيه بيبقى صباب السحب مفتوح و صباب العادم مغلق و خلالة البستم بيملا غرفة الاحتراق بخليط هواء و بنزين من خلال التفريغ اللى بتعملة حركة البستم لاسفل
الشوط التانى بيبقى اسمة شوط الضغط و بيبداء من النقطة الميتة السفلى الى النقطة الميتة العليا... و فيه بيبقى صباب السحب مغلق و صباب العادم مغلق و خلالة البستم بيضغط خليط الهوا و البنزين... النسبة بين حجم غرفة الحريق فى النقطة الميتة السفلى و النقطة الميتة العليا بتسمى نسبة انضغاط المكنة...
الشوط الثالث بيبقى اسمة شوط القدرة و بيبداء من النقطة الميتة العليا الى النقطة الميتة السفلى... و فيه بيبقى صباب السحب مغلق و صباب العادم مغلق و خلالة بتتولد قدرة المحرك نتيجة حرق خليط الهوا و الوقود... شرارة البوجية بتبداء موجة اشتعال داخل غرفة الحريق و الضغط بيرتفع جدا و بيوصل الى حوالى 1500 كيلو للسنتيمتر المربع و الضغط دة بيدفع البستم الى اسفل و من هنا بنحول الطاقة الحرارية الناتجة عن حرق البنزين الى طاقة ميكانيكية متمثلة فى حركة البستم
الشوط الرابع بيبقى اسمة شوط العادم و بيبداء من النقطة الميتة السفلى الى النقطة الميتة العليا... و فيه بيبقى صباب السحب مغلق و صباب العادم مفتوح و خلالة البستم بيطرد غازات العادم خارج غرفلحريق استعدادا لاستقبال شحنة هواء ووقود خلال شوط السحب التالى
اختبار الكبس اللى بنعملة بيقيس ضغط الغازات و البستم فى النقطى الميتة العليا فى شوط الضغط....و دة بيدل على مدى كفائة احكام غرفة الحريق او زى ما بنسمية كفائة الكبس... لو فيه ضعف فى قراية الضغط دة معناة ان فيه تسريب من غرفة الحريق...
بالتالى الغازات المضغوطة حيهرب بعض منها اثناء الكبس و بالتالى الضغط يقل و قدرة الموتور تقل و لما يحصل الاشتعال و الضغط يعلا جدا التسرب حيزيد اكتر و بدل ما الغازات تضغط على البستم و تحركة حتهرب من اماكن التسرب و تعتبر قدرة مهدرة
اختبار الكبس بيحدد الضغط اللى جوة البستم... و الضغط دة لازم يتقارن مع القيم الصحيحة اللى المفروض الموتور يولدها... كمان بيتم مقرنة قياس الضغط للبساتم الاربعة مع بعض لمعرفة اذا كان فيه بستم معين فيه مشكلة ولا المشكلة نتيجة الاستهلاك الطبيعى للمكنة
التسريب ممكن يجى من الشنابر او الصبابات او الاتنين مع بعض... ممكن تفرق بين النوعين من خلال اعادة اختبار الكبس بعد اضافة شوية زيت من فتحة البوجية... لو نتيجة اختبار الكبس اتحسنت جدا و بقت شبة طبيعية بعد الزيت يبقى المشكلة فى الشمبر... لو مفرقتش حاجة تبقى المشكلة فى الصبابات... لو فرقت بس مش فرق كبير يبقى الاتنين فيهم تسرب
الفيديو دة حيوضح تماما اشواط دورة اوتو بالتفصيل عشان تقدر تتخيل الدنيا عاملة ازاى جوة الموتور
http://www.youtube.com/watch?v=60QX5...eature=related
MMamdouh
المفضلات