ماهى التعديلات الواجب عملها فى الشاهين الزيرو؟

عندى شاهين 2006 سمعت انه يجب تغيير المساعدين الامامى والكاوتش واليايات.ياترى ايه مدى صحة الكلام ده؟خاصة انى بدأت اعانى من عدم اتزان العربية وهى عاملة دلوقتى17.000 كم؟ افيدونا افادكم الله.

الكلام ده فعلا صح ومغيرش الكاوتش وتجيب مصرى برده هات حاجه مستوردة أضعف الإيمان GT

شكرا للأخ الكريم.ارجو من عنده معلومات اضافية يفيدنى وشكرا

شوف يا أستــاذ رامى
الشاهين من السيارات التى لاتحتاج صيانات كتير وقطع غيارها معمرة ورخيصة بس طبعا كل ده يرجع لطريقة قيادتك للسيارة
بالنسبة للمساعدين انت بتقول ان العربية موديل 2006 وعامل بيها 17000 يعنى ياراجل العربية لسه جديدة ومش محتاج انك تغير المساعدين دلوقتى خالص واللى يقولك غير يايات ومقصات وبتاع كل ده كلام فاضى لأن الشاهين اتغيرت عن زمان خاااالص وابتداء من موديل 2003 العربية بقت زى الفل ومافيهاش عيوب أبدا وكلامى ده عن تجربة يعنى مش مجرد فتوى
وانا ماغيرتش المساعدين اللى عندى الا من شهر تقريبا جبت مونرو وسبب التغيير ان المساعد الشمال كان محجر شوية نتيجة خبطة جامدة عشان كده غيرته
بالنسبة للكاوتشات طبعا لازم تتغير لأن الكاوتش النسر اللى فيها ناشف جدا جدا وهيضر العفشة لو سبته وأنصحك تغيره فى أقرب فرصة بنوع مستورد زى هانكوك او كومهو او ماكسيس او جى تى دول أفضل الانواع للشاهين
ولو حاسس بعدم اتزان اعمل ضبط زوايــا وان شاء الله العربية هتثبت معاك

معلش يا شريف انا هختلف معاك شوية فى موضوع المساعدين ، انا متفق معاك فى كل ما قلته عن جودة العربية، انا كان معايا شاهين 2003 وعملت بيها 100000 كيلومتر فى اربع سنوات(مئة الف كيلومتر، الرقم مضبوط ولا يوجد اى خداع نظر فى الموضوع) وتقريبا مغيرتش فيها اى حاجة غير حاجات بسيطة جدا ، ورغم كدة لما بعتها اكثر من واحد من معارفى كانوا هيموتوا عليها لأن حالتها كانت زى الزيرو تقريبا:

لكن بالنسبة للمساعدين انا مساعدين العربية حجروا معايا بعد 8000 كيلومتر فقط وغيرتهم ، برغم انها كانت 2003 الشكل الجديد، وطبعا الكاوتش النسر ده مكانه صفيحة الزبالة، عموما انا هحط هنا لستة بكل الحاجات اللى انا غيرها فيها وتمنها ومواعيد تغييرها:

1- 4 كاوتش جى تى على 7000 كيلومتر ،800 جنيه، وبعت النسر اللى كان فيها ب 400 ، يعنى دفعت 400 فرق ، وطبعا اتغيروا تانى على عمر 80 ألف بعد ما عمرهم خلص
2- عدد2 مساعد امامى مونرو، على 8000 آلاف كيلومتر، تمنهم 450 جنيه
3- طرمبة مياه ، ايطالى: غيرتها على 30 آلف ، تمنها 100 جنيه، وغيرتها حسوكة لأن صوتها كان مش عاجبنى، لكن معملتش معايا اى مشاكل
4- مساعدين خلفى: مونرو، تمنهم 270 جنيه، غيرتهم على 50 ألف، لأن المساعدين ورا ضربوا زيت
5- مقصات امامى: مايلى المانى، غيرتهم على 50 ألف ،تمنهم 230 جنيه شامل طقم الكاوتشات، علشان العربية كانت بتعوم
6-علبة ديريكسيون: غيرتها على 95 الف ، تمنها 200 جنية، سيزماك تركى، برغم انها تركى لكن احسن من الأصلية اللى كانت فى العربية سواء فى خفة الديريكسيون او زاوية الدوران، لدرجة ان اللى اشترى منى العربية كان راكب شاهين قبل كدة، بيقول لى هى العربية دى باور وللا إيه
7-لمبات امامية: غيرت اللمبتين بلمبات 100-260 وركبت كتاوت تقوية علشان نور العربية كان ضعيف، تمن اللمبات + الكتاوت 60 جنيه
8- بليه عجل خلفى: على 40 الف، غيرت بلية كان صوتها عالى، تمنها 50 جنيه

9- بلى دينامو: غيرته مرتين مرة على 40 الف ومرة على 80 الف، لأنى كت مركب تكييف فى العربية فكان بيحمل طبعا ، على دايرة العربية وبيهلك الدينامو بسرعة، تمن البليتين 30 جنيه

10- كتاوت دينامو: برضه غيرته مرتين وتقريبا على نفس الأعمار ، لنفس السبب السابق، تمنه 30 جنيه

11-بيك سلانسيه كهرباء، غيرته على 70 الف ، بس ده غير موجود فى عربيتك لأنها حقن الكترونى


دى كل الحاجات اللى انا فاكر انى غيرتها، طبعا غير الصيانات التقليدية، ولو بصيت عليها هتلاقى ان كلها كلام فضى جدا وفيه حاجات كتير منها انا غيرتها حسوكة مش اكتر، لكن العربية الشاهين عربية من احلى العربيات اللى هتركبها فى حياتك ، ويوم ما ربنا يكرمك وتركب سيارة احدث هتترحم على ايام الشاهين الجميلة

اقتباس:

---

لكن العربية الشاهين عربية من احلى العربيات اللى هتركبها فى حياتك ، ويوم ما ربنا يكرمك وتركب سيارة احدث هتترحم على ايام الشاهين الجميلة

---

I FULLY TRUST IN YOU SAB3AAWY :lol: :lol: :lol:

انا مره كنت سافرت اسكندريه بعربيه شاهين1600 موديل 2002 ... وكان لسه يادوب عامله 10 الاف
كنت واجهت مشكله في أن العربيه بتسخن جامد جدا
وكان السبب تقريبا في ان الفيوز بتاع المروح بيضرب كل شويه
و في الاخر اشتريت شويه فيوزات و خليتهم في العربيه
لغاية ما رجعت بيها
وما فكرتش اني اركب شاهين تاني من يوميها
المهم انهم قالو ان المروحه المفروض يركبلها كتاوت تقويه للمروحه .....بس خلاص

طب انا يا جماعة عندي شاهين 2006 1400سيسي وكنت عايز اعمل اي تعديل في الموتور بحيث يزودلي الهورس بور..يعني ممكن في حرق الوقود ...او... في دخول الهواء للموتور....وصحيح ممكن استبدل رشاش البنزين بتاع ال1400 ببتاع ال1600

عموماً.. ماتغيرش حاجه الا لما تبوظ .. و التركيبه المتبعه في الشاهين .. كل الشاهين الجديد بيتركبلو مساعدين مونرو بتاع الموديل القديم (بتفرق بين انجكشن و عاده ) و هاتحتاج يايات تقريباً في الحركه دي ..
التركيبه المعتاده في الشاهين .. مساعدين مونرو .. سواء ورا او قدام .. و طنابير بريمبو اللي في الكرتونه الحمرا دي قدام .. و تيل نضيف و كمل .. و ماتغيرش حاجه الا لما القديم يبقي علي الله السلام فيه .. نفس النظام لو مش عاجبك الانجكشن و عاوز تغيره ... نفس النظام لو عاوز تغير اي حاجه تاني