جين 2 الجديده ولا المستعمله

انا عايز اجيب جين 2 بس بصراحه مش عارف اجيبها زيرو ولا مستعمله
انا معايا 56 الف وممكن اتصرف في 15 تاني سلف بس خايف اجيبها زيرو واخسر جامد لما اجي ابيعها وده العيب الوحيد وميزيتها اني هكون اول شخص ياخد خيرها
تاني حاجه مقلق اني اجيبها مستعمله الا يكون الشخص اللي قبلي بهدلها او هانها وخد خيرها كله وده عيبها وميزيتها اني لو فكرت ابيعها خسارتها مش هتبقئ كبيره
ولو جيبتها علي التمن اللي معايا ممكن يجبلي موديل كام وتكون حالتها حلوه ولا لا
ولا اجيبها تقسيط ياريت تفيدوني عشان العربيه دي داخله دماغي جدا ولا اكنها بنت وبحبها والله :36_3_18[1]::rfds:

لو مستعملة اوك تمام بس حالة نضيفة و ماتستعجلش

باشا العربية اصلا لو جديدة من المحتمل حتى لو الاحتمال ضعيف ان يظهر فيها عيوب تقفيل حتى و لو عيوب بسيطة اوى .

فلو مستعملة ...... ؟؟؟

انا رأيى اضغط على نفسك و استنى شوية و خليك فى الزيرو . و الزيرو زيرو برده .

طبعا استعمال يكون حااله نضيفه
بس في المقوله المعروفه اللي تقول
الجديد جديد لا تعب ولا حاجه تدايقك ولاهتبقى في حاجه مستخبيه
كدا يعني

بص ياباشا
القاعدة أن الجين تو عربية شبابي زيها زي الجولف. فممكن يكون صعب أنك تلاقيها حاجة مستعملة منها مالكها مش قاسي عليها جري وفحت وخلافه.
ولكن ده مايمنعشي طبعاً أن لكل قاعدة شواذ....

مستعملة ودا راييييييييييييييييييييييي ييييييي

انا كنت عامل زيك كده بالظبط .. بس استقريت ع الزيرو

انا عارف يامحمد ان المستعمل احسن بس الخوف الا يطلع واحد فاحت وناحت ومبهدلها ونفسي الاقي عربيه مستعمله يكون ماتورها حلو ومش متهانه واللي قدامه اي حاجه كده يقولي واكون شاكر وشكرا لكل الاعضاء اللي ردوا

لو باصص لموضوع سعر اعادة البيع
هتشترى مستعمل وهتقول يا ريتنى ...
الجديد جديد .. متع نفسك وعيش بفولسك .

بص يا أيمن باشا لو أنت بتحب تغير عربيات كتير اشترى المستعمله عشان ما تخسرش وتكون حالتها تنظيفه ديه حاجه

لو انت ناوي تجبها وتخليها 5 أو 6 سنين أو أكتر للركوبه يبقا الزيرو أحسن

وتحياتى

مستعملة لو بتشتريها من واحد انت عارفه كويس وعارف استعماله وحالة ممتازة

غير كدة 56 ألف + 15 أكيد تحويشة العمر يبقا زيرو واستمتع بيهم من غير تفكير

الزيرو أضمن و بلاش تفكير هخسر فيها لما أبيع
كفاية بقى تفكير فى البيع قبل ما نشترى
طيب إيه رأيك تختصر و تجيب العربية اللى كنت هتجيبها بعديها أحسن أهو توفر وقت و فلوس
أنا آسف إذا كان كلامى فى نوع من التهكم بس أنا ما أقصدش أضايق حضرتك أنا بس بنتقد نوعية تفكير معينة فرضت نفسها علينا فى سوق العربيات و هى العربية هتخسر أد إيه لما تتباع و أنا أصلا لسه ما اشترتهاش

اقتباس:

---

المشاركة الأصلية كتبت بواسطة jisso82

الزيرو أضمن و بلاش تفكير هخسر فيها لما أبيع
كفاية بقى تفكير فى البيع قبل ما نشترى
طيب إيه رأيك تختصر و تجيب العربية اللى كنت هتجيبها بعديها أحسن أهو توفر وقت و فلوس
أنا آسف إذا كان كلامى فى نوع من التهكم بس أنا ما أقصدش أضايق حضرتك أنا بس بنتقد نوعية تفكير معينة فرضت نفسها علينا فى سوق العربيات و هى العربية هتخسر أد إيه لما تتباع و أنا أصلا لسه ما اشترتهاش

---

:Ta_clap[1]::Ta_clap[1]::Ta_clap[1]::Ta_clap[1]::Ta_clap[1]:

اقتباس:

---

المشاركة الأصلية كتبت بواسطة jisso82

الزيرو أضمن و بلاش تفكير هخسر فيها لما أبيع
كفاية بقى تفكير فى البيع قبل ما نشترى
طيب إيه رأيك تختصر و تجيب العربية اللى كنت هتجيبها بعديها أحسن أهو توفر وقت و فلوس
أنا آسف إذا كان كلامى فى نوع من التهكم بس أنا ما أقصدش أضايق حضرتك أنا بس بنتقد نوعية تفكير معينة فرضت نفسها علينا فى سوق العربيات و هى العربية هتخسر أد إيه لما تتباع و أنا أصلا لسه ما اشترتهاش

---

علي فكره حلوه اوي موضوع اني اشتري العربيه اللي بعدها والله فكره لذيذه بس مين يعلم الغيب ياباشا وفي نفس الوقت نفسي اتمتع بعربيه اول واحد يكون انا ومش عارف اجيبها كاش ولا تقسيط ولو تقسيط انا هدفع كل اللي معايا عشان مش عايز فوايد كتير ومش عارف اجيبها اوتو ولا منوال ناس كتير بتقولي الاوتو مش اي حد يصلحها وكده يعني عشان كده الواحد متلغبط ياجماعه دي تحويشه العمر فعلا والف شكر لردكم جميعا

طيب ما تجيب برسونا هاف اوبشن ؟

لا انا حابب الجين 2 اوي ومش دخله دماغي البيرسونا خالص

والله هيا اراء

انا شايف انها نفس العربية بالظبط....بس الهاف اقل شوية فالسعر عشان تبقي سهلة عليك

بس لو مش مرتاحلها متجيبهاش طبعا

لو قدامك مستعمل نظيف اركبها احسن بدل ماتضغط نفسك علشان العربية الزيرو

و بعدين لو زهقت منها او ماعجبتكش بيعها ساعتها خسارتك هاتبقى قريبة

اقتباس:

---

المشاركة الأصلية كتبت بواسطة ayman_83

علي فكره حلوه اوي موضوع اني اشتري العربيه اللي بعدها والله فكره لذيذه بس مين يعلم الغيب ياباشا وفي نفس الوقت نفسي اتمتع بعربيه اول واحد يكون انا ومش عارف اجيبها كاش ولا تقسيط ولو تقسيط انا هدفع كل اللي معايا عشان مش عايز فوايد كتير ومش عارف اجيبها اوتو ولا منوال ناس كتير بتقولي الاوتو مش اي حد يصلحها وكده يعني عشان كده الواحد متلغبط ياجماعه دي تحويشه العمر فعلا والف شكر لردكم جميعا

---

أتوماتيك من غير تفكير
الزحمة اللي كل يوم بتزيد لازم معها أتوماتيك

لا بالعكس

انا شايف انك تجيب مانيوال...

المانيوال هوا المتعة فالسواقة.....الاوتو حلو لو تيبترونك

اقتباس:

---

المشاركة الأصلية كتبت بواسطة drguevara

لا بالعكس

انا شايف انك تجيب مانيوال...

المانيوال هوا المتعة فالسواقة.....الاوتو حلو لو تيبترونك

---

انا اعرف الاوتو بس معرفش ايه ال تيبترونك ده ياريت توضح ياباشا
وهل الجين 2 فيها ولا لا

لا يا باشا للاسف

التيبترونك... نظام معين يمكنك من التحكم فالنقلات اذا اردت ... زي المانيوال الي حد ما... و فيه امكانية الاوتو العادي كمان

و موجود فعربيات كتيرة... زي الجراند بونتو و المازدا وحاجات كتيرة

لاسف الجين مفيهاش

بيبقي عن طريق زرار + و - موجود فالفتيس

هو بصراحه انا ركبت عربيات كتير بس الاوتو ملهوش حل ركبته في لانسر القرش واوكتافيا وماتريكس اريح بكتير من المنوال بس المنوال له شعور رائع يحسسك انك شغال وانت سايق وعليك مسئوليه زي شوماخر الكلام ده في الشاهين ها اخدلي بالك

اقتباس:

---

المشاركة الأصلية كتبت بواسطة ayman_83

هو بصراحه انا ركبت عربيات كتير بس الاوتو ملهوش حل ركبته في لانسر القرش واوكتافيا وماتريكس اريح بكتير من المنوال بس المنوال له شعور رائع يحسسك انك شغال وانت سايق وعليك مسئوليه زي شوماخر الكلام ده في الشاهين ها اخدلي بالك

---

:ma::ma:

ههههههههههههههههههههههههه

اه طبعا اخد بالي

بس صدقني المانيوال فالجيب بالذات رهيب جدا.... هوا مش ناعم اوي بس سبور ونقلات ضيقة و جامد جدا:B4_048::36_7_7[1]: