تجديد وإحلال الملاكى وتكهين السيارات القديمه

**mido_seyana** · 24-11-2009 12:34 AM

بسم الله الرحمن الرحيم

أرجو التثبيت للأهميه.

تردد فى الأونه الخيره موضوع إحلال الملاكى وإبداله بسيارات جديده تبدأمن موديلات 2008 على حسب ما تردد .

وهنا أسئله تطرح نفسها ألا وهى:

ماهى الموديلات التى سوف تدخل فى الإحلال( ستينات، سبعينات ، ثمانينيات )؟
متى يبدأ المشروع ؟
هل أسعار السيارات للموديلات المذكوره سوف تنهار؟
ماذا سيكون رد فعل الناس خاصة وأن أكثر من 70% من سيارات مصر تحت سنة 1990
ماذا يفعل أصحاب هذه السيارات الأن وهل ستبدأ موجه بيع جماعى؟
ماذا يفعل من يريد شراء سياره مستعمله وحدوده الماليه موديل ( سبعينات أو ثمانينيات)

لو حدث هذا الشىء الغير مرتب له وجائت الحكومه بقرار فجائى فى نشرة الأخبار أن المرحله الأولى من الإحلال ستبدأ قريبا .

رأيى الشخصى أن الحكومه لن تصغى لأصوات الشعب الكادح والذى لا يملك من دنياه إلا سيارته القديمه التى ورثها أو إشتراها بعد طول عناء وستصغى فقط لأصحاب رأس المال الذين سوف يستفيدون من هذا المشروع امثال ( أحمد عز ) تاجر الحديد المعروف وصاحب شركة (حديد عز) والذى إستفاد من مشروع إلغاء المقطورات وأخذ حق إستبدالها للناس بتريلات مع تقسيط الفرق........( ملحوظه المقطورات ملكيه خاصه )

رأى بعض الناس أن هذا المشروع صعب لكون الملاكى ملكيه خاصه ولا يستفاد أصحابها بعائد مادى مثل التاكسى كأجره.
وأرد على ذلك بأن الحكومه ستستفيد من ذلك المشروع بالأتى:

تشغيل البنوك المصريه والأجنبيه فى مصر مع معارض السيارات وهى ظا هره لاحظها الناس فى الأونه الأخيره وهى تعامل كثير من المعارض مع البنوك للتقسيط ولا ثيما بنك كريدى أجريكول.
إستفادة أصحاب رأس المال من مشروع الإحلال بحديد السيارات وقطع غياره والتى ستعود عليهم برخص التراب.
تشغيل عجله رأس المال بالبيع والشراء فى البلد وضخ كميه من المال فى السوق المصرى لإنتعاشه ومنعه من الركود من تداعيات الأزمه العالميه كما حدث فىمشروع إحلال التاكسى والذى ظهر أثره بنسبه بسيطه نظرا لأن التاكسى نسبته ضئيله بالنسبه للملاكى.
تدعيم صناعة السيارات فى مصر وزيادة نموها بنسبة 70% وهو الرقم التقريبى لتداول السيارات القديمه فى البلد.

ونظرا لما سبق يجب علينا كمنتدى أن نبدأ بالتنبه لهذا المشروع ولا نغفل عنه ونبدى رأينا بأن هذا المشروع ليس مرحب به وأن نبدأ بأنفسنا لأن هذا سيحدث عاجلا أو أجلا .

أرجو من الساده أعضاء المنتدى وضع أرائكم فى هذا الموضوع كما أدعو من لديه أية معلومات مؤكده عن هذا الموضوع أن لا يبخل بها على هذا المنتدى الرائع ليستفيد الجميع.

كما أدعو إدارة المنتدى إلى تثبيت الموضوع لأهميته.

ولكم منى جزيل الشكر
أخوكم / محمد عبد السلام

**husseinoo** · 24-11-2009 01:24 AM

السلام عليكم ورحمة الله وبركاته

اهلا وسهلا بحضرتك

انا راى الشخصى ان الموضوع ده لا يمكن يحصل ... موضوع الاحلال للسيارات الملاكى لا يمكن ان يطبق لعدة اسباب منها :

1- اولا خلال عام يبدأ السباق الرئاسى والانتخابات ... يعنى الحكومة لا ترغب فى اجراء اى عمل مثير يؤثر بأى شكل على شعبية واجراءات الانتخابات "بدون تفاصيل"
يعنى امامك على الاقل سنتين حتى تنتهى عملية الانتخاب وقول كمان سنة ده لو بدأو يفكروا بجد فى الموضوع ده "وموش هايحصل"

2- بالنسبة للسيارات الأجرة ... يوجد منها فى مصر اكثر من 400 الف سيارة تحتاج الى التكهين والله أعلم بصحة الرقم .... ولكن إذا ركزت الاسبوع الماضى تجد أنه تم عمل او مطلوب عمل "مزاد" لبيع عدد 16000 الف سيارة اجرة تم عمل احلال لها .... يعنى بقالهم اكثر من سنة منذ طرح فكرة الإحلال ويادوب عملوا احلال لـ 16000 الف سيارة فقط ... يعنى على ما ينتهوا من سيارات الاجرة فقط بهذا المعدل يبقى امامك موش اقل من 30 سنة على ما يخلصوا الموضوع ده هههههههههههه

3- كمان من كتر العربيات اللى اتسحبت ولا يوجد امكانية لتوفير اى سيارات جديدة لاخوانا السائقين اعتقد انه تم وقف العمل بهذا القرار ... او "على اقل تقدير سوف يتم وقف العمل بهذا القرار"

4- انه تم اللجوء لهذه الفكرة الشيطانية لحل ازمة البنوك والركود والازمة العالمية ... والحمد لله الازمة العالمية ومشاكل البنوك فى طريقها للحل

5- لا يوجد رجل اعمال عنده استعداد انه يسلف سواق تاكسى فلوسه عشان يرجعها له بعد 7 سنين وعليها فوائد تافهة وكمان السائق يأخذ دعم 15 الف جنيه ... الحداية "موش هاترمى كتاكيت"

6- نرجع بقى لقصة ان السيارة الخاصة .... دى ملكية خاصة ولا يستطيع احد انه يسحب سيارتك بدون "حكم قضائى" .... استحالة

7- أن السيارات القديمة يوجد الكثير منها "تزيد" قيمتها كل ما السيارة تقدم ... .زى ما اتعلمنا فى كلية تجارة ... انه يوجد سلع تزيد قيمتها مع الوقت ... مثل السيارات القديمة والخمور "الله يحرقها" و اللوحات الفنية والتحف ... الخ

8- الكثير من الناس لا يملكون من حطام الدنيا "إلا سيارتهم القديمة" ... ولا يوجد عندهم اىاستعداد لدخول سباق شراء سيارة جديدة ولا يوجد اى امكانية لتحمل اعباء جديدة اضافة للبيت وكفاية عليهم عربيتهم انها بترحمهم من المشاوير ... يعنى من الآخر لازم تبعد عن إثارة الجماهير العريضة

9- اذا علمت انه يوجد فى مصر حوالى اكثر من 4 مليون سيارة منها مليون سيارة على الاقل تقدر تقول عليها "قديمة" .... طيب اذا كان هناك حوالى 400 الف سيارة اجرة موش قادرين يغيروها ما بالك بحوالى "مليون" سيارة ملاكى قديمة

10- يوجد الكثير من العاملين فى مجال السيارات الكثير ... سواء تجار ... مستوردين ... صنايعية وميكانيكة وصبيان ...آلاف الورش والخراطين والتجار والعمال ... كل آكل عيشهم يعتمد على السيارة القديمة .... طيب لما تجيب له عربية جديدة موش هاتحط فيها مسمار قبل 7 سنوات ... الناس دى تروح فين آلاف البشر يروحوا فين ... تزيد البطالة تزيد المشاكل ... الخ

11- اما لو حسبتها ماديا ... مين المجنون اللى عنده استعداد انه يسلف راجل غلبان فلوس عشان يشترى عربية والغلبان ده ماعندوش فلوس تكفى "بيته" اساسا ... قلنا قبل كده مافيش راجل اعمل اهبل وهايرمى فلوسه ... راجل الاعمال عايز يضرب ويلم بسرعة ... ِشقة مثلا تكلفه 30 الف او بالكثير 40 الف يبيعها بالتقسيط مثلا بـ 110 الف على 15 سنة ربح حلو ومضمون وزى الفل ... موش تقول لى سيارة بالقسط على 7 سنين

12- مجرد التفكير فى مناقشة هذا الموضوع يثير البلبلة فى سوق السيارات ... وكثير من الناس تخسر فلوسها بسهولة ... يا راجل دى العربية البيجو الـ 504 اللى كانت من سنة بحوالى 45 الف جنيه اليوم تجيبها بـ 30000 الف جنيه ده كله بسبب احلال التاكسى ... ما بالك بآلاف السيارات الملاكى ... يعنى تبقى ناوى تخرب بيت الناس ... مثلا واحد عنده سيارة 131 شاريها بـ 22000 الف جنيه وشغالة مية مية ... تقول له خلاص هانخليها خرده ولازم نأخذها منك ... اكيد الراجل هايجنن ويولع فى اى حد يقرب من عربيته

13- الموضوع ده ممكن يحصل فى حالة واحدة فقط ... هى انك يكون عندك مصنع سيارات مصرى ينتج سيارة مصرية بايدى مصرية موش سيارة تجميع فقط لا غير ... وكمان تكون السيارة رخيصة فعلا مثلا سيارة صغيرة مثل الـ 127 او الـ 128 بحوالى 18000 وكمان بالقسط ... اقول لك ماشى ممكن اسلم عربية بـ 5000 آلاف جنيه ... والباقى قسط على 7 سنين هاتمشى العملية وتبقى مية مية .... لكن تجيبلى عربية اسمها "نانو ولا تاتو" وتبيعها لى بحوالى 25000 جنيه ...طبعا حرام ... واكبر حرام انى اشترى "توك توك" بالمبلغ ده خصوصا ان الجميع عارف ان السيارة "النانو" بتتباع فى بلدها بـحوالى 10000 جنيه .

اخيرا احنا كفاية علينا السبوبة السريعة ... شوية عربيات مضمونة 2010 تتباع للناس اللى معاها فلوس ... والتاجر يلم فلوسه على السريع .... او شقة فى مدينة جديدة ... وحاجات كده ... اما تقول لى ناس غلابة وناخد منها وديها فلوس وعربيات والكلام ده ... اعتقد صعب وموش هايحصل ولو حصل لازم يكون عندك ضمانات كافية

والله اعلم

مع اطيب التمنيات
اخوكم حسين غزالة

**the-hero** · 24-11-2009 07:11 AM

لما يخلصوا الاجرة الاول يبقى يتنفذ فى الملاكى
اعتقد انه مشروع مشبوه هيدبس الحكومة والشعب لصالح اللى وكلنها ولعه ربنا ينتقم منهم
قولوا امين

**hesham22822** · 24-11-2009 07:29 AM

والله كلامك معقول خالص يا أخ حسين و شكرا

**redawilliam** · 24-11-2009 08:42 AM

مش عارف يا جماعة انتو نسيتوا اهم حاجة ان العربية ملاكى يعنى ملكية خاصة محدش يقادر يجبرك على بيعة او استبدلة يعنى القرار فى ايدينا
يعنى احنااللى ممكن ننجاح المشروع او نخلية يفشل انتو لية نستوا رايكو كبشر و لا خالص بقنا ننتظر الاوامر عشان نقول علية امين
مع العلم ان الحكومة ممكن توقف الترخيص للعربيات فى الموديلات اللى هيى نوية تجددة و طبعا مجلس الموافقة عندنا ميعرفش غير موافقة و عمرنا ما سمعنا كلمة لا تحت القبة و دة لو حصل يبقى اعتداء على المواطن و ياريت لو فى محامى فى المنتدى يدرس الموضوع من الجهة دى
ربنا معاكو جميعا و يكون ليكو راى ء

**husseinoo** · 24-11-2009 01:17 PM

اللهم صل على محمد وعلى آله وصحبه أجمعين

كل عام وحضراتكم بخير

بالنسبة للأخوة اللى بيقولوا والله موضع احلال الملاكى ده جميل
أنا آسف أنى اقول لهم معلهش "لما تمتلك فلوس عربية" يبقى يتكلم
لأن فى الغالب العربية بتاعت "بابا" ... عشان كده هو بيكلم على مزاجه

ما يعرفش ان فى ناس كثيير فى غنى عن وجع الدماغ وموضوع العربية الجديدة ... يفكر فى مصلحة ورزق "عياله" الاول ولا يفكر يغير العربية ... خصوصا ان عربيته القديمة زى ما بيقولوا "تؤدى الغرض المطلوب منها" وبدون مشاكل وترحمه من المواصلات وقلة الأدب ... ايه اللى هايخليه يغير العربية ويزنق نفسه

كمان لما يكون "الأجر" اللى نأخذه فى العمل مناسب مثل اوروبا يبقى نغير العربية "وندلع نفسينا" مافيش حد غاوى "فقر"

نيجى بالنسبة للاخ غبور او اباظة او اى رجل اعمل من العيار التقيل
كل دول بيجهزوا نفسيهم عشان السيارات الأجر "المضمونة" ... مضمون ان فلوسه ترجع مع المصلحة والفوائد
خصوصا لما تفتح العملية فى سيارات السفر البيجو 504 معروف انه موجود فى مصر تقريبا 80% من سيارات السفر بيجو 504 والله اعلم
يعنى لما العربيات دى تتسحب لازم يوجد البديل
امامك موش اقل من 10 سنوات على ما الموضوع ده ما يخلص

اما بخصوص رجال الاعمال
عمرهم ما يساهموا فى اعطاء مواطن عادى عربية "لجمال عيونه"

يا راجل ده الماروتى اللى هى "ثلاثة سلندر" 900 سى سى بتتباع بـ 35000 الف جنيه

والنانو ولا التاتا "خطى العتبة" هههههههههههه بتتباع بـ 25000 الف جنيه عربية 600 سى سى "يعنى بموتور اقرب الى الموتوسيكل

اما المواقع الشهيرة
فهى حكايتها حكاية
اهم حاجة يعمل شوية "بلبلة" عشان الناس تدخل الموقع وتشوف الاعلانات والسبوبة تمشى
موش مهم عندهم "القلق" اللى بيعملوه للناس
ووقف الحال فى الأسواق
ووقف عملية الشراء والبيع
أهم حاجة السبوبة حتى ولو كانت على مصالح الناس

تقرأ العنوان وتلاقى كلمة "احلال"
تدخل عشان تقرأ الخبر المهم
تلاقيه بيكلم مع واحد ويقولك ده مهندس فى شركة موش عارف ايه وتوقعاته واحلامه ورؤيته وافكاره ... وفى الآخر تلاقى العنوان غير المضمون وكله تضييع وقت وإثارة وجذب انتباه الناس عشان تدخل الموقع موش اكثر

للأسف اننا نضيع كثير جدا من وقتنا ... بدلا من الاستفادة من خبرتنا وكل اللى احنا اتعلمناه فى حياتنا مع بعض
بدل ما نتواصل ونستفيد من وقتنا
كل موقع يكتب خبر زى ده
يخلى الراجل موش عايز يشترى عربية
ويعطل مصالحه اكثر من 3 شهور
فى انتظار ان "الحداية" ترمى كتاكيت

معقولة يعنى واحد مرتبه لا يتخطى الـ 1000 جنيه وعنده اسره وسكن ومدارس "وبلاوى" زرقة هايروح يورط نفسه فى سيارة ومين المجنون اللى هايسلفه على وضعه "التعبان" ده ههههههههههههههههه

أنا عن نفسى لو لاقيت حد مجنون عنده استعداد انه يسلفنى عربية جديدة .. هاقوله هات يا حبيبى ... ما عنديش مانع ... ولما يحصل اى حاجة واتعثر فى السداد "يبقى يسلم لى على التورماى"

لازم يكون عنده ضمانات عشان فلوسه لا تضيع

والضمانات موجود فى الأجرة فقط .... عشان الناس دى بتشتغل

كانوا حلو لنا مشكلة الاسكان .... لما هما حلويين قوى كده
خصوصا ان الحديد سعره اقل من 3000 جنيه
وبقاله اكثر من 6 اشهر فى الإنعاش

ولا ايه رأيكم

مع اطيب التمنيات
اخوكم حسين غزالة

**yoozrnem** · 05-12-2009 01:59 AM

انا اعتقد انا موضوع الاحلال هحصل هيحصل بس ممكن يكون اختيارى مش اجبارى

**husseinoo** · 05-12-2009 01:37 PM

بسم الله الرحمن الرحيم

لو رحت اى موقف عشان تسافر خصوصا يوم الخميس او الجمعة
استحالة تلاقى عربية تسافر فيها بسهولة

ناس زى "الرز"

ولو كل واحد عنده عربية مثلا "بيجو 504" وشغالة مية مية ومطلوب منه انه يغيرها بعربية احدث ... هات لى عربية واحدة تقدر تسد مكان البيجو

ما فيش غير عربية واحدة وهى "التيوتا" الميكروباس .... الى حد ما ممكن تسد
لكن ثمنها كام

هانفترض ان سائقين الاقاليم قرروا انهم شتروا سيارة ميكروباس "تيوتا"
يبقى محتاجين كام عربية إن شاء الله

هو ده اللى رجال الأعمال مركزة عليه
هو ده المضمون لمدة موش أقل من 10 سنوات
جمع العربية بسرعة وبيع للسائقين وخليك فى المضمون

لو نظرت الى بلد مثل الهند سوف تجد ان اكبر مصنع سيارات عندها بينتج تقريبا حوالى 20 الف سيارة سنويا ده لو اشتغل بأقصى طاقة ممكنة

هافترض اننا هاننتج 20 الف سيارة مثل الهند "سواء جمعتها او استوردتها" ... وانت عندك اكثر من 400 الف سيارة محتاجة تغيير .... يعنى انت تحتاج على الاقل موش 10 سنين انت محتاج 20 سنة على ما تغطى الاجرة فقط ..... المسألة مسألة امكانيات موش أكثر

اما بالنسبة للاخوة مالكى السيارة الشعبية 128 او 127 خصوصا المتهالك منها "طبعا هما يتمنوا ان الموضوع ده يحصل"
لكنه لو حصل عمرهم ما هايستفيدوا منه ليه :

التاكسى اخد دعم حوالى 15000
+
ثمن العربية 5000
ووضع اعلان على العربية اجبارى
وقسط مدة طويلة عشان يقدر يسد

اما الملاكى طبعا لن يأخذ دعم
يعنى من الآخر تعتبر عربيتك مقدم لسيارة
هات لى عربية بأسعار دلوقتى ينفع تدفع لها مقدم 5000 جنيه
مافيش غير "الماروتى" على سبيل المثال
لو هاتقدر تدفع 700 جنيه كل شهر ... وتخصمهم من مرتبك ... "خلاص اتوكل على الله" ... واشترى

الخلاصة: رجال الأعمال تلعب على المضمون ... وتستعد بكل قوة لإستغلال موضوع إحلال الأجرة الذى صدر بشأنه قرار رسمى .... وكل التركيز وتجميع الاموال وتجديد المصانع وتوسعاتها الهدف منه تغطية السيارات الأجرة لمدة 10 او 15 سنة على الأقل

اما الملاكى : ده لو حصل هايكون اختيارى ... وبدون اى الزام ... وبدون اى قرار من مجلس الشعب ... عايز تسلم عربيتك وتعتبرها مقدم لسيارة جديدة اهلا وسهلا ومرحب بك فى الاقساط ... وادفع يا حبيبى "بدون ان تسبب اى احراج للحكومة وبعيد عن الحكومة" ... منك الى رجال الاعمال ومعارض السيارات

على فكرة فى كثير من اصحاب السيارات الاجرة "طالبين احلال" ... لكن مافيش عربيات ... وتقريبا قرارا الاحلال متوقف مؤقتا ..... مافيش فلوس عشان يسلفوا السائقين .... يعنى فى الآخر العملية "وش على الفاضى"

مع اطيب التمنيات
اخوكم حسين غزالة