مهزلة في مودرن سيرفس مصر الجديدة
بداية السلام عليكم جميعا !
عايز بس احكيلكم على موضوع حصل معايا عشان أي حد تسول له نفسه يروح لمودرن سيرفس يقرأ موضوعي عشان يتعظ.
كنت ماشي في شارع المطار فكسرت عليا عربية مسرعة فخبطت في الرصيف والحمد لله الخبطة جت في أسفل العربية في العفشة وتجريح في جنب العربية وفي العتب. وبما اني مأمن على العربية (النترا2009) عملت معاينة ومقايسة في مودرن سيرفس اللي في النزهة جنب سور المطار وقال المهندس ان المقص الشمال لازم يتغير وشوية سمكرة ودوكو يعني حوالي 2000 جنيه شركة التأمين وافقت وبدأوا العمل وادوني 10 أيام للاستلام.
بعد عشر أيام روحت أستلم لقيت التالي:
1. انتظرت أكثر من ساعتين في الشارع لحد ما يجيبوا العربية وقالي المهندس ان المكان حواليهم زحمة ومفيش مكان مخصص لركن العربية فبيركنوها في شوارع جانبية وكان في عربية قافلة عليها!!!!!!!!! ما علينا!!!
2. العربية مردومة تراب قالي متقلقش حنغسلهالك ولقيت واحد عامل جاي بجردل وفوطة معفنة وراح ماسحها وقالي استلم يا بيه!!!!!!!! قولت ما علينا أوديها مغسلة !!
3. العربية كلها لزق وأثار رش مبتطلعش قالي ثوان ونعملهالك وراح جايب تنر وقطنه وقعد يحك فيها وقالي لما تروح المغسلة ادفع تبس كويس وهما يظبطوها!!!!
4. وطبعا أنا بحسن نيه قولت مش مهم الحاجات البسيطة دي أهم حاجة الجوهر لقيت الحكة اللي في الجنب اللي مهندسة التأمين وافقت عليها وصورتها وحطتها في الملف متعملتش قالي احنا لقيناها مش ماضية عندنا ومش مثبوتة فمعملنهاش. اتنرفزت لكن قولت يالله مش باينه قوي المهم مشكلة العفشة!!!!
5. المفاجئة ان المقص اتغير وكان مثبوت في المقايسة تغيير حامل اكصدام أمامي شمال لكن مغيروش الحامل ولزقوه بسيليكون اسود!!!!
6. المصيبة ان المقص بعد ما اتغير العربية لما سقتها مش مضبوطة بتحدف شمال والدريكسيون وانت سايق عدل مايل ناحية اليمين وبتصفر في الملفات وبعد ال100!!!!
7. طبعا نسيت أقولكم أني قبل ما أستلم العربية دفعوني ال2000 جنيه وقالولي العربية زي الفل!!!!
8. بعد يومين رحت تاني أتخانق وأقول انكم ولا توكيل ولا زفت دا أقل صنايعي في الحرفيين بعمرهم . قابلني مهندس اسمه محمد مصطفى تقريبا وقالي عيني حاعملك كل حاجة وطلع معايا صنايعي معاه عدته وقالي حاضبطهالك على الطريق وقام نازل تحت العربية ولاعب في الزوايا وقالي الدريكسيون تمام معدول مع السلامة لكن أي حاجة تانيه صعب تتعمل فسألته ينفع العربية تطلع من التوكيل وهي مش مضبوطة كده؟ قالي أقولك على الحقيقة جهاز ضبط الزوايا بايظ بقاله كام يوم واحنا ضبطناها على إيدنا !!!!!
9. للأسف لأني كنت مسافر خدت السيارة وقولت الحمد لله انها جت على قد كده ومشيت لكن العربية بتحدف وكانت حتتقلب بيا أنا وعيالي في ملفات بنها !!!!
10. رجعت تاني لهم بعد كام يوم لقيت نفس المهندس بيقولي ان الجهاز اتصلح واحنا حنضبط الزوايا وحتبقى العربية زي الفل سألته ليه الاستهوان في العمل وفي حياة الناس كان أسهل حاجة تضبط الزوايا في أي بنزينة أو في الحرفيين جنبك مردش عليا وضبط الزوايا وطلع جرب لقى فيها حدفة بسيطة شمال غير ملحوظة قالي ده أخر ما عندنا!!!!!! (مركز معتمد لهيونداي من غبور)
11. لحد دلوقتي العربية مش مضبوطة بعد العيد ناوي لما افضى أوديها لحد في الحرفيين أو بريدجستون وحسبي الله ونعم الوكيل في الغشاشين واللي اداهم الفرصة واعتمدهم عشان يغشوا الناس!!!!
أسف اني طولت عليكم لكن لازم نتعظ ونقاطع أمثال المراكز دي.