الموضوع: صيانة 30000 كم

الإخوة والأصدقاء
أعضاء منتدى البريليانس الأعزاء
تحيه طيبة مباركة وكل وانتم بألف خير بمناسبة عيد الأضحى المبارك
الحمد لله فعلا ان ربنا أكرمنى بالعربية FRV فهى فعلا عربية محترمة جدا جدا وتستاهل الفلوس اللى ادفعت فيها
واستطيع أن أحكم بلا شك وبعد 30000كم وفترة من 29/1/2009 وحتى اليوم 26/11/2009 خلال 10 أشهر بأن تلك السيارة رااائعه والحمد لله وربنا يبارك فيها لى وللجميع.
يوم الثلاثاء كان ميعاد الصيانة 30000 كم الوافق 24/11/2009
وعلى فكرة بقى في رقم مختصر للحجز مركز خدمة عملاء للبريليانس رقمه 16224 تتصل بيهم للحجز او الإستفسار وخاص بالبريليانس فقط(بيظبطونا)
على فكرة الحجز كان فى فرع أبو رواش وانا بحب أحجز فى الفرع ده رغم انى ساكن فى المقطم وجانبى مفيش 10 دقائق فرع القطاميه لكن الحجز هناك محتاج وقت علشان الضغط بجانب ان أعرف ناس فى ابورواش بس للحقيقه هما ناس افاضل جدا مش محتاجين اى واسطة.
المهم الميعاد كان الساعة 11 رحت فى الميعاد بالظبط وصلت لقيت مهندس الإستقبال جنب العربية سلم عليا وانا اعرفه من قبل كده حتى الراجل اللى بيستلم العربية سلم عليا وعمل محضر استلام ووقعت عليه وكلهم محترمين .
ولاقيت مهندس الإستقبلال (م /أحمد عسل) شخصيه محترمة جدا ومتعاون فتح الكبوت ودخل جوه العربية ودورها وشغل التكيف وبص على العددات فحص ظاهرى كده وبعدين طلع بره العربية وقالى اخبارها ايه معاك طبعا قلتله العربية تمام وزى الفل بس كانت عندى شكوى من ان عداد السرعة بيعلق من اسبوع وده بيعمل برجله فى عداد الكيلومتر وقلتله عايز تربيط عافشة وده لأنى بسافر بالعربية كتير وبحملها وبمشى فى طرق مكسرة المهم اخد ملاحظاتى وطلب منى ناخد جولة بالعربية المهم ركبنا السيارة واتحركنا بيها وكل االى راح فرع الصيانة ده عارف ان المدخل بتاعة من طريق مصر اسكندرية الصحراوى قبل البوابات بعد امارات مصر علطول اخدنا الطريق ده رايح جاى والطريق ده مكسر جدا اختبار بس صعب للعربيات .
المهم هو شغل التكيف وفقفل الزجاج ومشينا بالعربية وبدأ هو يسجل ملاحظاته(فنى بقه) المهم رجعنا مركز الخدمة ورحنا مكتبه قالى حنغير زيت وفلتر وصيانة 30000كم وتربيط عفشة وكشف على الكهرباء والتكييف والمساعدين والدبرياش فحص كلى وقالى المفروض فت تغير فلتر تكيف قالى ده مش لازم مش حتحتاجه اجله دى نصيحته هو.
بجانب تغيير ماكينة سرعة فى الضمان(وهنا ملحوظة مهمة جدا كل اللى يروح مركز الخدمة ياخد كتيب الضمان علشان هما فى الصين مشددين عليهم فى الموضوع ده كل عربية تغير شئ فى الضمان لازم وجود كتيب الضمان) بس الناس كانو محترمين وبرغم عدم وجود الكتيب معايا هما حلو الموضوع وعلى فكرة هما ما بيبخلوش بأى شئ خالص ومن نفسهم بلا طلب.
المهم قالى التكلفة 437 جنيه وافقت وقالى استريح وقالى انهم حيتأخرو شوية نظرا لظروف الضغط قبل العيد.
طلعت الإستراحة قعدت فيها من 12:30 تقريبا حتى 4:30 دقيقه ميعاد الإستلام طبعا كنت صايم معرفتش اشرب حاجه قعدت اشتغلت على الكمبيوتر بتاعى رفيقى فى الرحلات شوية على النت وشوية اتفرج على الدش عندهم المهم الوقت عدى لا قيته طلعلى وقاله كله تمام...
حاسبت على الشغل ونزلت لاقيت العربية مغسولة وزى الفل والمهندس بيسلمنى المفتاح وقالى راجع على كل حاجه والحمد لله العربية زى الجديده بعد الصيانة ....
وانطلقت بزوزة زى ما بسميها وعلى فكرة هى بتحب الإسم ده جدا حتقولولى ازاى حقلكم معرفش ؟؟؟
بس يمكن لأنى قبليها بيوم الإثنين بالتحديد كنت رايح بيها شغلى كالعاده يوميا فى أكتوبر وأنا فى طريق الصبح حاسس زى مايكون فى زلطة فى الكاوتش الأمامى المهم مخدتش فى بالى وصلت الشغل وركنت ونزلت ابص على الكاوتش ايه اللى فيه لاقيت فيه مسمار قلت كده زى الفل جيت قايلها يا زوزة معلش استحملى بقه لغايت مرجع بيكى باليل نشوف حل فى المسمار ده المهم خرجت من الشغل بيها الساعة 4 عصرا من اكتوبر للممقطم وصلت 5:30 تقريبا رحت بيها للعجلاتى طلع المسمار طوله 5 سم قلاووظ سمك 2مم مسمار شكله يرعب ورغم طول الفتره إلا انها استحملت والعجلة مريحتش ومعرضتنيش لأى موقف والحمد لله
زوزة دائما اصيلة والحمد لله
طولت عليكم بس فعلا هى عربية محترمة جدا
وكل عام وانتم بألف خير
وعيد سعيد
MeshMesh78
مصطفى