طلب مساعدة فى أيجاد وظيفة لشاب مجتهد
السلام عليكم ورحمة الله وبركاته
كل عام وأنتم بخير
الشاب ده مسؤل عن أمه و عن أخته الأصغر سناً و اللى لسه بتدرس فى معهد.
الشاب ده أنا أعرفه من حوالى 10 سنين و كان شغله كله بينحصر فى حاجتين
بيقف سايس قدام كافيه فى مدينة نصر و بيشتغل سواق على عربية بتاعة طيار مدنى.
من حوالى 3 شهور الطيار ساب شغله و سافر شركة تانية فى الأمارات و بقى مقيم هناك....و طلب من وائل ( أسم الشاب ) أنه يروح معاه الأمارات و يشتغل سواق له هناك.
والدة وائل متقبلتش الموضوع ده لأنه الولد الوحيد ليها و كمان هو العائل الوحيد ليها هى و بنتها.
المهم بناءً على رغبتها وائل رفض السفر و هو يكاد يبكى.......المرتب اللى كان معروض عليه هناك كان 3000 جنيه فى الشهر و أكله و شربه و أقامته على الراجل......و دول بالنسبه له تحل له مشاكل كتير.
المهم من حوالى شهر ونص كده الكافيه أتقفل و بقى وائل من غير شغل خالص.
وائل على مدار معرفتى بيه لاقيته أنسان كويس و أمين ( و الله أعلى و أعلم ) لدرجة أن واحد صاحبى كان عرض عليه من سنتين شغل بمرتب أعلى من اللى بياخده من الطيار لكن وائل رفض....و لما سألناه عن السبب كانت أجابة بصراحة أذهلتنى:
قبل الموضوع ده بسنة كان الطيار جاتله سفرية طويلة شوية ( 3 شهور ) و فضل يدفع لوائل مرتبه فى ال 3 شهور دول عادى كأنه شغال معاه و عشان كده وائل كان شايلهاله و مرضاش يروح شغل بمرتب أعلى 300 جم فى الشهر و هو فى أمس الحاجة ل 100 جم.
أنا عن نفسى من فترة للتانية كنت برتب معاه و بخليه يروح يعمل صيانة للعربية بتاعتى فى التوكيل عشان ظروف شغلى.........و بستأمنه على عربيتى و بصراحة سواقته كويسة ( فى أفضل الظروف مش بيعدى 80 كم )
وائل معاه رخصة عادية مش مهنية.
يا ريت لو فى حد يعرف يلاقى شغل لوائل يبقى جزاه الله خيراً عنه و أسف للأطالة.
