سيتروين c4 موديل 2005 ولا رينو ميجان موديل 2005 ؟؟

**egawady** · 29-11-2009 11:10 PM

عاوز أعمل مقارنة بين العربيتين دول اللى قدامى :
سيتروين c4 موديل 2005 جميع الكماليات مانيوال فابريكه مطلوب 65000
رينو ميجان موديل 2005 جميع الكماليات اوتوماتيك فابريكه مطلوب 65000

انا عن نفسى انا عاجبنى قوى شكل الـ c4 ... بس للأسف الواحد بيسمع كلام كتير عن مشاكل الوكيل بتاعها وأسعار الصيانة العالية والبعض بيقول ان فى بعض قطع الغيار صعب الواحد يلاقيها بسهولة .

من ناحية تانية الميجان حلوة برضو مفيش شك بس البعض بيقول ان موديل 2005 ده بذات كان فيه بعض العيوب اللى تم تداركها فى الموديلات اللى بعد كده ...

ياريت الأخوة الأعضاء اللى ركبوا وجربوا العربيتن دول يقولولنا عن تجربتهم .. واية رأيهم فى العربيتين دول ... ولو هما مكانى يختاورا أنهى فيهم ؟؟؟

وشكراً جزيلاً

**gebreel** · 29-11-2009 11:21 PM

ال C4 معرفش عنها حاجة لكن الميجان سعرها قليل عليها
بالنسبة للمشاكل فهي مش بس تم تداركها في الموديلات اللي بعدها لكن تم تداركها في الصيانات الدورية كمان يعني اشهرهم كان حاجة مرتبطة بالبوجيهات مش فاكر اسمها دلوقتي كانت ب500 جنيه الواحد و كان فيها عيب صناعة بيتم تغيرهم في الضمان على طول
البطاريات بردو كان بيتم تغيرها فورا
وكيل رينو مبيسبش حاجة في عربياتو كعيب صناعة لحد ما العميل يشتكي لكن بيطبق الضمان بحذافيرو وكيل محترم بجد
فانت تعمل ايه دلوقتي تاخد العربية على التوكيل و بكررها التوكيل نفسو مش مركز معتمد و تكشف على العربية هناك الكشف بحوالي 500 جنيه بس بيجبلك تارخ حياة العربية من الالف للياء
لو الراجل ده مواظب على الصيانات الدورية بتاعتها و بيعاملها كويس يبقى ارشحلك الميجان بدون كلام
و استنى رد باقي الوحوش
و ده لينك فيه كل عيوب الميجان من ملاكها فيه خبراتهم مع العربية
http://www.nilemotors.net/Nile/12198-a.html
و طمنا عملت ايه يا باشا

**egawady** · 01-12-2009 12:36 AM

الف شكر للأخوة اللى ردوا ....
المشكلة ان انا لسه مخدتش قرارى النهائى .... لأن انا راكب لانسر كريستالة حالياً 1300 اوتوماتيك .. العربية شغالة معايا زى الفل ومفيش أى شكوى منها .... لكن انا بصراحة زهقت منها ، وعاوز أغير ...
عاوز أركب موديل حديث و يفضل اوتوماتيك وفى نفس الوقت فرق السعر يكون بسيط ، وطبعاً مانزلش فى المستوى ... عشان كده فكرت فى الميجان والـ c4 ، بس انا لسه مستنى الأخوة الأعضاء اللى ركبوا الـ c4 يقولوا رأيهم ...
وربنا هو الموفق و المعين ....

**SeiffoZ** · 02-12-2009 02:43 AM

السيتروين هتتعبك فى الصيانة جدا جدا ...
بلاش منها أحسن

**egawady** · 05-12-2009 12:31 AM

المشاركة الأصلية كتبت بواسطة relentless_mayhem

السيتروين هتتعبك فى الصيانة جدا جدا ...
بلاش منها أحسن

شكراً للأخ الكريم ...
أنا فعلاً سمعت كلام كتير عن مشاكل الستيروين فى الصيانة ....
بس انا عاوز أسمع من الأخوة مالكى الاستيروين ... اية رأيهم فيها .. واية اخبار الصيانة وقطع الغيار ... وهل بيعملوا الصيانة فى التوكيل ولا بيعملوها بره ؟؟
ورأيهم عموماً فى العربية ....

وشكراً جزيلاً