ايه الازدواجية اللى احنا عايشين فيها دى؟؟
الاهلى
تعليق: hf, ulhv بتاريخ: 11/24/2007 11:33:00 AM
الاهلى عمهم وحابس دمهم *لاتنسوا ذكر الله
++++++++++++++++++++++
الجزء اللى فوق ده من تعليقات احد القراء على موقع مصراوى والاخ بيعلق على تغريم معتز اينو 300 الف جنيه لصالح المالك وانا هنا مش هتعرض للخبر لانه لايهمنى انما هتكلم على الازدوجية اللى كلنا بنعيش فيها. الازدواجية دى اللى تخلى كاتب التعليق يشمت فى الزمالك وعلى الماشى كدة ينصح الناس بذكر الله. الازدواجية دى اللى تخلى سواقين الميكروباص وعمال المحلات يشغلوا قرآن فى بداية اليوم علشان البركة (كأنه بخور لاسمح الله) وبعد كدة يسبوا الدين للى رايح وجاى ازدواجية الناس اللى فى الشات بتاع قنوات الاغانى الفاضحة وهم بيكتبوا ذكر وايات من القرآن والقنوات بتعرض اغانى كلها عرى واباحية، ازدواجية واحد بيشاور على واحدة لابسة هدوم كاشفة ويطيل النظر ليها بينتقدها انها تثير الشباب. ازدواجية واحد بيصلى كل الفروض فى الجامع ويزكى ويعمل خير كتير ومع ذلك يكذب ويسرق ويغش وياكل مال الناس.......
اللهم ارحمنا يارب من كل مظاهر الازدواجية واجعلنا محافظين على المعاملات والعبادات.
دى بس حاجة استفزتنى فقلت افضفض معاكم.