الموضوع: مخاوف الافراط في تملك السيارات الجديدة دون دراسة

اخى العمليه معقده جدا وليست بالسهوله التى تتخيلها فى انى انظم ذلك العمليه محتاج مئات السنين ليتم ذلك وليس فقط بل علاوه على ذلك لابد من ان تراعى مايلى

1- توفير الدوله لوسيله نقل امنه ومريحه وبسعر غير مرهق

2-توفير الوقود بسعر مدعم وخصوصا اننا دوله لديها بترول بالفعل وعدم رفعه كل شويه والثانيه

3-اذا كان ولابد من عدم اصدار تراخيص فمن باب اولى ان يكون لمن يمتلك عدد معين من السيارات

4- توفير شبكه طرق امنه مش زى اللى عندنا

5- تطبيق قوانين المرور على الكبير قبل الصغير مش كل واحد يعلق لوحه سوداء ويقول انت مش عارف انا مين


ولكن مايحدث للاسف فى مصر سئ جدا جدا جدا واحنا ماحصلناش اى دوله متخلفه بالعكس بقينا احنا المتخلفين فى كل شئ

اما بخصوص تملك السياره فعندما يتحقق ذلك سوف تجد انه سيقل

فانا شخصيا لم اكن انوى شراء سياره ولكن هذه الفتره حلم حياتى هو امتلاك سياره ومش مهم نوعها او جودتها بقدر ماتكون وسيله نقل لى وللاولاد تنقلنا لشغلنا ومدارسهم

لانى بلاقى زل وعذاب فى المواصلات ناهيك عن تحكم سائقى التاكسى

فمثلا ممنوع اننا نلاقى تاكسى ينقلنا لمنزلنا لو كنا بالخارج فى يوم من الايام وذلك بسبب رفض التاكسى عندما يعرف احنا رايحين فين والسبب ان المكان بالنسبه له بعيد وغير مجدى وسيادته بيريح دماخه ويخليه فى المضمون

اذن العمليه معقده جدا ولها جذور مش مسأله امتلاك سياره وخلاص بهدف الامتلاك بقدر ماهو حل لمشكله موجوده

فان استطعت حل المشكله فلن يكون هناك سبب لسعى الناس للامتلاك

انا من الناس اللى فعلا شاغلاهم جدا مسألة الطرق والزحمة دى وكل ما افكر فيها الاقى حلول، ممكن تؤثر سلبا على البعض لكن هتساهم كتير فى حل مشاكل المرور

يعنى مثلا:

بالنسبة للسيارات:

1-منع السيارات موديل ما قبل 80 مثلا من السير فى القاهرة، ويتم ذلك فى خلال سنة،بذلك يبقى احنا هنقلل الخسارة على صاحبها، لأنه هيكون مسموح بترخيصها فى محافظات اخرى وبالتالى يستطيع بيعها حتى ولو بسعر اقل ، ويمكن تعويض صاحب السيارة القديمة اذا اثبت انها ملكه منذ اكثر من سنة بعقد رسمى والترخيص بإسمه انه ياخد موافقة استيرادية لشراء سيارة مستعملة من الخارج بنفس شروط المعوقين، وفى خلال خمسة سنوات تالية يتم رفع الموديل تدريجيا حتى سنة 90 ويصبح النظام بعد كدة ان اى سيارة عمرها اكثر من 25 سنة غير مسموح لها باستعمال شوارع القاهرة

بالنسبة للطرق

2- يتم مراجعة جميع المحاور الرئيسية وخلق حلول لنقط الإختناقات: فمثلا ، كوبرى 6 اكتوبر شريان الحياه للقاهرة له اكثر من حل لفض الإشتباك الحادث فيه يوميا منها على سبيل المثال:

أ- اغلاق مطالع عبد المنعم رياض فى اتجاه مدينة نصر ومصر الجديدة من الساعة الواحدة ظهرا وحتى السابعة مساء، وعلى من يرغب فى التوجه الى شرق القاهر من وسط المدينة استعمال نفق الأزهر،

ب-إغلاق مطلعى شارع بورسعيد رمسيس فى اتجاه وسط المدينة والجيزة من السابعة صباحا وحتى الواحدة ظهرا

ج-توسيع الكوبرى فى المسافة من رمسيس وحتى عبد المنعم رياض من من ناحية المتجه من رمسيس الى عبد المنعم رياض، حتى لو استدعى الأمر هدم مبانى وتعويض اصحابها، ونقل الجزيرة الوسطى حارة واحدة لخلق 3 حارات فى الإتجاه من عبد المنعم رياض الى رمسيس

د- خلق محور طرد من وسط المدينة بديلا عن كوبرى 6 اكتوبر عن طريق انشاء نفق عميق للسيارات تحت شارع عبد الخالق ثروت او شارع عدلى يبدأ من شارع رمسيس ويلتقى مع نفق الأزهر مما يسهل نقل الحركة الخارجة من ميدان التحرير الى خارج وسط المدينة

ه- وهناك مشروع آخر لو اتعمل هيحل كتير جدا بس انا مش عارف ممكن يمشى فين، ، يتعمل نفق للسيارات ياخد من كوبرى اكتوبر عند غمرة ويسلم فى عبد المنعم رياض ويبقى اللى فوق اتجاه واحد راجع واللى تحت اتجاه واحد رايح، ولو مافيش مكان للنفق يمشى فيه يبقى يتعمل دور تانى فوق كوبرى اكتوبر فى المسافة دى ويبقى دور اتجاه رايح ودور اتجاه راجع

المكان التانى اللى محتاج يتعمل فيه شغل هو الطريق الدائرى:

1-الطريق الدائرى محتاج يتوسع عند نزلة الطريق الصحرواى، ودة هيسهل الحركة فيه جدا وهيغرى ناس كتير انها تسيب المحور وتاخد الدائرى فى الإتجاه الى اكتوبر

2-مشكلة التانية الضخمة فى الطريق الدائرى هى نقاط تفتيش الشرطة اللى قافلة 3/4 الطريق وتترك حارة واحدة للسيارات فقط للعبور، واخص منها بالذكر كمين الوراق فى الإتجاه من الجيزة الى القليوبية، وكمين السلام فى الإتجاه من القليوبية الى القاهرة، وكمين المنيب فى الإتجاه من الجيزة الى القاهرة وكمين المنيب الآخر فى الإتجاه من القاهرة الى الجيزة، ولو الأكمنة دى اتعمل لها مكان مناسب ومحترم ويليق بجهاز الشرطة خارج حرم الطريق، على ان يتم قفل الطريق فقط فى ظروف الطوارئ وفتحه فى ظروف الكثافات المرورية ، حال الدايرى هينصلح كتير جدا

3-ما المشكلة الثالثة للطريق الدائرى فهى عربيات النقل المحملة التى يصر سائقوها على السير يسارا ويتعطل سير الطريق كله ويختنق عندما يقرر سائق سيارة نقل ماشى 50 كم/ساعة انه يعدى من سائق سيارة اخرى ماشى 40 ، وعليها نص ساعة على ما يخلصوا من بعض، لابد من الحسم فى هذة المشكلة حتى تتيسر الحركة فى الدائرى ويصبح جاذبا للحركة المرورية ليخف كاهلها عن وسط المدينة

4-استكمال الوصلة الباقية من الطريق الدائرى من طريق الواحات وحتى المنصورية لخلق محور حركى خارج كردون القاهرة للقادم من الفيوم واكتوبر واسكندرية الصحراوى الى شرق القاهرة


بالنسبة لمترو الأنفاق:

لو امكن انشاء جراجات متعددة الطوابق ذات كثافات عالية عند مجموعة من المحطات الرئيسية للمترو ، هنخف عدد كبير جدا من السيارات من الذهاب الى وسط المدينة لأن اصحابها هيلاقوا اسلوب آمن لترك سياراتهم والذهاب الى عالهم بالمترو، فمثلا لو امكن انشاء جراجات فى النقط التالية:حلوان، المعادى، السيدة زينب، غمرة، كوبرى القبة، عين شمس ،المطرية، المرج ، المؤسسة، شبرا، الدقى، جامعة القاهرة، مديان الجيزة ، المنيب هنخف حمل كبير جدا عن وسط البلد

بالنسبة للمواصلات العامة:

اين تاكسى العاصمة، لماذا لا ينتشر مع انه مشروع اعتقد انه مربح، ليه حتى هذة اللحظو مافيش غير 3 شركات كل واحدة منهم تملك عدد محدود من السيارات، فيه ناس كتير جدا عندها استعداد تدفع تكلفة استعمال تاكسى العاصمة فى مقابلاراحة دماغهم من السواقة، تاكسى االعاصمة يمكنه ببساطة ان يكمل الدائرة التى تبدأ بسيارة خاصة من البيت الى المترو، ثم المترو الى وسط المدينة، ثم تاكسى العاصمة من محطة المترو الى مقر العمل

اين الأوتوبيس المكيف، لم يبقى منه سوى ذكرى غير عطرة، بدأ كمشروع محترم يستطيع الكثيرون الإعتماد عليه بديلا عن السيارة وانتهى بالإهمال الى شئ قذر لا يحمل من الأتوبيس المكيف سوى إسمه فلا هو مكيف ولا هو حتى اتوبيس، محاولة استعماله هى مضيعة للوقت لا آخر لها الى جانب حالته المتردية

لو الإصلاحات دى كلها حد فكر فيكها ممكن يكون لنا مخرج، لكن اللهم قد بلغت

أستاذ سبعاوي أتفق في معظم ما قلته و أختلف في بعض النقاط
المشكلة مش في توسيع الطرق .......... المشكلة في طريقة السواقة نفسها
طيب مثلا في انجلترا .......... كل الطرق الداخلية و أعني و أقصد كل الطرق الداخلية حارة واحدة رايح و حارة واحدة جاي ........... و مع ذلك لا يوجد أي أختناق
و الطرق الدائرية كلها حارتين فقط لا غير .......... أو ثلاثة على الأكثر و لكن غالبية الطرق حارتين و مع ذلك لا يوجد أي أختناق على الأطلاق
مشكلة مصر الأساسية هي الفوضى المرورية و الفوضى في كل شئ بوجه عام

ثانيا التكدس في مكان واحد و هو مدينة القاهرة ......... يجب الخروج من القاهرة و بناء مدن جديدة تبعد عن القاهرة بمسافة كبيرة و يكون بها جميع الخدمات بحيث إن سكانها لا يحتاجون إلى الذهاب إلى القاهرة لأي شئ
و طبعا الموضوع يحتاج إلى البحث و التحري و الدراسة لحله و لكن هذه بعض الأفكار الأساسية