الموضوع: ماذا تفعل لو كنت مكانه

السلام عليكم ورحمة الله وبركاته

الموضوع ده حصل لصديق ليا فى شارع الطيران و بالصدفة بالحتة كنت واقف فى البلكونة عند واحد صاحبى تانى مستنين صاحبنا ده.......شفت اللى حصل من بعيد و مكنتش عارف أنه صاحبى.

صاحبى ده معاه لانسر كحلى......ماشى على الشمال خالص و جنبه عربية تانية فولكس فاجن صغيرة شوية ( غالباً بوينتر أو باراتى ) لونها غامق برضه......عسكرى خدمة عدى الشارع من قدام صاحبى ومن قدام العربية اللى جنبه و جه موتوسيكل دليفرى عليه فردين خبط العسكرى على سرعة أعلى من سرعة العربيتين.....مش أقل من 70 كم مثلاً و طبعاً فى لحظة كان العسكرى و الأتنين اللى على الموتوسيكل كلهم على الأرض.

العربيتين كملوا طريقهم عادى.....و العربية الفولكس كانت سايقاها بنت.....صاحبى كان هيقف على اليمين بعد الخبطة بشوية و لكن بيقولى لقى نفسه لا أرادياً بيبعد أكتر و أكتر لف يو ترن و وقف الناحية التانية من الشارع............بعييييييييييي ييد و نزل يشوف اللى حصل.

أكتر أصابات كانت فى العسكرى طبعاً و مكنش دارى باللى بيحصل من كتر الألم.....البهوات اللى خبطوه بالموتوسيكل قالو للناس اللى أتلمو أن عربية خبطتهم هما ال 3 و مشيوا.....صاحبى كان لسه هيفتح بقه و يقولهم لأ أنتو اللى خبطتوه....بس تانى لقى نفسه لا أرادياً بيسكت.

أول ما الأتنين بتوع الموتوسيكل خلصو الكلام واحد من اللى واقفين سأل الجمع اللى واقف يخدم.....محدش شاف العربية اللى خبطته أيه ؟؟؟

واحد قال أنه مشافش بعينه بس صاحب كشك قريب قاله عربية هيونداى
و واحد تانى واثق من نفسه قوى قاله لأ.......دى كانت لانسر سودا !!!!!!!!!!!!!!!!!!!

و طبعاً هاتك يا شتيمة فى اللى كان سايق اللانسر......صاحبى

صحابى لم نفسه و فضل واقف مع الناس لحد لما الأسعاف جت و خدت التلاتة.....و بعد كده جالنا بيهر......

تفتكروا اللى عمله ده صح فى البلد دى......و لا كان لازم يتكلم و يحكى اللى حصل و هو و نصيبه فى البهدلة ؟؟؟؟؟

ماذا تفعل لو كنت مكانه ؟؟؟؟

المشاركة الأصلية كتبت بواسطة dodino2006

انا اعتقد ان السكوت كان هو الحل، و خصوصاً ان العسكري مش في وعيه، و لو كا اتكلم كانت الناس مش هتسيبه و حلني علي العسكري لما يفوق و يا عالم هيفتكر مين اللي خبطه ولا لأ، ومش بعيد الشيطان يوزه و يحسبها يلاقي انه مش هيستفيد من صاحب الموتسيكل، و الاستفادة هتكون اكبر من صاحب العربية، و يلبسله القضية... و لو ان البحث الجنائي ممكن يثبت مين اللي خبطه و يثبت ان عربية صاحبك مفيش عليها اثار اي اصطدام، بس برضه مفيش حاجة مضمونة

بحث أيه يا باشا ؟؟؟؟

قولتلى حضرتك بقالك قد أيه برة مصر ؟؟؟؟؟

عموماً على ما يتحرك اللى حضرتك قولت عليه ده يكون صاحبى فطس ( إن جاز القول )

المشاركة الأصلية كتبت بواسطة Tyler_Durden

أنا لو مكانه مش هاقف أصلا
هو مش طرف في الحادثة من قريب أو بعيد و مش شايف مبرر للخوف

هو صاحبى متعود دايماً أنه لو شاف حادث يقف و يشوف أذا كان يقدر يساعد بحاجة.