انا دمى محروق و ممكن ارتكب جريمه انهارده

**zozza** · 25-11-2007 12:31 PM

بقالنل كام شهر كده بنشوف خناقات في الشارع تحت بيتنا ... كل منزا ابص الاقي واحد ماسك البواب اللي في العماره اللي جمبنا عمال يشتم فيه.

الموضوع اتكرر كتير فسألت واحد منهم مالك يا عم الحج .... قالى شوف قلة الادب نزلت لقيت فانوس مكسور .... و مره مرايه مكسوره .

لحد انهارده الصبح و انا نازل لقيت المساحتين بتوع عربيتى متنيين من الدراع وواضح اوى ان اللى تناها قاصد يبوظهم (يعنى مليون فى الميه مقصوده) ... و مش بس كده ... كمان لقيت عربيتين جمبي بنفس المنظر.

دمي فار و محستش بنفسي الا وانا جوا العماره اللي انا راكن امامها بجيب البواب من قفاه
قعد يحلفلي ميت يمين انو ميعرفش ايه اللي حصل و قالي ان فيه حد في العماره اكيد هو اللي بيعمل كده عشان مش عايز عربيات غريبه تركن تحت العماره (يعنى عايز ملاك العماره بس اللي يستعملوا الركنات اللي حولين العماره)

سبت البواب الغلبان و رحت الشغل و دمي فاير لحد دلوقتي خصوصا ان المساحت مبقوش ينفعوا و سألت على الجداد لقيت الفرده ب 150 جنيه.

ان شاء الله هركب الجداد انهارده و هركن العربيه فى نفس المكان و هبات طول الليل اعمل كمين لأبن ال... ده و اول ميقع هسيح دمه و بعد مشبع فيه ضرب هطلب البوليس و بلغ اني لقيت حرامي بيسرق عربيتي ومش هيهمني اذا كان اللي هيقع في ايدي ده راجل كبير بقي و للا عيل صغير و للا حتي تكون ست. ان شاء الله مش هيفلت من ايدي.
-------------------------------------

ملحوظه ان الناس اللي معندهاش دم بقوا كتير اوي الايام دي و الاخلاقيات بقت تحت الصفر ... انا هطلع كل غلي من اللي انا شايفه من الزحمه و الاشارات و الناس اللي بتمشي عكسي الخ الخ ... هطلع غلي نم كل دول في البيه اللي هأفشه اناهرده انشاء الله

**ahmedsamir79** · 25-11-2007 12:37 PM

معلش هدي أعصابك
الناس فعلا مبقاش عندها دم
حسبس الله ونعم الوكيل

**GoldenManEye** · 25-11-2007 12:41 PM

إهدا يا باشا شويه وإتاكد انه هيتعمل فيه أنيل من كده. انت بس متنساش تدعى عليه كويس.

فعلاً حركة تحرق الدم الاول كانو بيفضوا الكاوتش! دلوقتى تلفيات مكلفة .. تقريباً الناس إتهبلت :shock:

المفروض البواب ياخد باله من العربيات اللى راكنه مش إنت اللى هاتعد تحرس العربية. :-?

**CryptonX** · 25-11-2007 12:52 PM

حقك تزعل , بس متضيعش حقك و نفسك بعصبية ملهاش لازمة .

طب انت واحد عمل معاك كدة

انا بقى حصلي كدة :) :
http://www.nilemotors.net/Forum/view...=120873#120873

**HESHAM AMIN** · 25-11-2007 01:04 PM

خليك ريلاكس بدل ما تجيب لنفسك مصيبة
واتعامل مع الموضوع بحنكة وصبر

**sab3aawy** · 25-11-2007 01:04 PM

بص يا سيدى الفاضل

بحر الأذى واسع

لو انت عملت اللى انت بتقول عليه ده متستبعدش ان الشخص ده بعد كدة يولع لك فى عربيتك

الحل ببساطة انك تعرف الشخص ده ، ومتخليهوش يعرف انك عرفته ، واستناله انه يغلط ويركن تحت عمارتك، ويوم ما يعملها ابقى اتنططله على الكبوت والسقف وكسر القزاز والفوانيس وقطعله الأربع فرد كاوتش ورشله العربية اسبراى اسود وادلق زيت فرامل على بوية العربية واخلعله الباكيتات ودش له المرايات ويبقى ساعتها بحقك طبقا للمبدأ اللى هو حاططه ومايقدرش يفتح بقه