الموضوع: موقف بوظ اعصابي ... ازاى احمى نفسي من حدوثه مره تانيه

هاي يا شباب

امبارح بالليل حصلى معايا موقف بايخ وزعلنى ووترنى وضايقنى خالص

انا كنت ماشي فى شارع ابو قير فى الاسكندريه، اول حاجه بدءت اخد بالى ان مؤشر الحرار قرب من النص جدا وده ما كانش بيحصل وشميت ريحه كده شبه الزيت وافتكرت ان ده الاوتوبس اللى قدامي .... المهم بعد 500 متر كده لاحظت ان المؤشر زاد عن النصف ودى عمرها ما حصلت، والكلام ده كان بالليل جنب بنزينه التعاون فى منطقه جليم، المهم ركنت العربيه وفتحت الكبوت وكنت هاعمل غلطه انى افتح ابص على مياه الاربه وبدئت الاحط ان فيها ضغط شديد قوى فقفلتها تانى ولقيت الحراره بتزيد، فبطلت العربيه ووقف جنبي اثنين بيحالولوا يساعدوني، لاحظت وجود زيت حوالين الموتور وصوته كأنه بيغلى قاموا صدموني وقالولى ان العربيه جابت وش سلندر علشان الميه نقصت

مع الملاحظه انى بتابع الميه اسبوعيا، طبعا استنيت العربيه تبرد وبصيت كويس بكشاف لقيت خرطوم كده ورا غطا التاكيهات حصل فيه فتحه كبيره وهو اللى مطلع الزيت - الحمد لله - بدءت اتطمن والناس قالتلى الموضوع كده بسيط.

المهم كلمت ولدى نزل الازاريطه اشترى زييه وكلمت صديق ليا وجه ركبه معايا والعربيه اتشغلت تانى الحمد لله بعد ما غلبنا فى تركيبه.

دي صور الخرطوم والقطع اللي فيه وعاوز بقه اعرف شويه استفسارات





* ليه المشكله دي حصلت مع انى كنت مطمن على الميه قبلها بكام يوم.
* ليه الميه اختفت من القربه بعد المشكله دي وبلعت حوالى 4 لتر.
* انا حطيت ميه عاديه علشان الميه الخضرا خلصت منى، ياترى فيه مشلكه والعلاج ايه.
* هل فى طريقه سهله لتركيب الخرطوم ده ؟
* هي يتباع منه الاصلى، علشان اللى اشتريته عادي ب 15 جنيه.
* هل الموضوع ده يأثر على كفاءه الموتور ؟ واعرف ازاى ؟

شكرا جدا ومعلش انا عارف انى طولت عليكم المرادى، بس انا ماليش غيركم بتفيدوني كويس.