الموضوع: تجربه مع نصابين

موضوع مفيد جدا..

انا كمان هقول تجربتي مع واحد منهم.. ميكانيكي ورشته في منطقة زينهم جنب موقف الاتوبيسات صاحب الورشه اسمه عاطف شعلان لكن ابنه اسامه هو اللي ماسك الورشه ..

اول ما جبت عربيتي كان سحبها جميل وصوت الموتور غير مسموع لكن كان خرطوم الفايظ متشال من العمه عشان بيدخن علي خفيف..

اول ما اسامه اتفرج علي العربيه شكر في الموتور وقالي انه محتاج بس طقم شنبر علشان الدخنه بتاعت الفايظ ولازم تتعمل بسرعه قبل الشنبر ما ياكل في الشمايز وقعد يحلف ان الموضوع مش هيتكلف اكتر من 200 جنيه وهتخلص في يوم وقعد يزن عليا علشان اعمله فقلت اعمل طقم الشنبر علشان العربيه مايبقاش فبها اي حاجه..

بعد ما فك وبدا يشتغل قعد يدلع وبعد اسبوع كتبلي لسته بقطع غيار تمنها 800جنيه منهم طقم دبرياج رغم ان العربيه كان سحبها حلو جدا عير انه قال وش السلندر الميه واكلاه ومحتاج يروح للخراط علشان يتملي الومنيا ويتمسح ويتعمله كاوتش صباب ودلايل وروديه وجابلي فاتوره من الخراط بمبلغ وقدره اكتشفت بعد كده انها مضروبه ده غير 10 جنيه تاكسي * 4 مرات رايح جاي علي الخراط وطبعا كله كدب وبعد التقفيل حصل الاتي..

* العربيه ما بتاخدش غيار. ليه يا اسطي ؟ اصل الاسطوانه لازقه .. المهم قعد يرزع في عصايه الفتيس علشان يديها غيار بالعافيه لما حسيت ان التروس هتتكسر واتخانقت معاه وفي الاخر قعد يهوي مسامير الدسك من فتحه في الفتيس وقرط علي الموتور علشان يفك لزقة الاسطوانه لما الاسطوانه طلعت شرار وال ار بي ام وصل للريد زون وبرضه قعدت ازعقله علشان الموتور لسه ملينش وهو كده بيبوظ اللي احنا عملناه ده غير انه كان غاسل الموتور ببنزين والشراره اللي طالعه من الاسطوانه مع البنزين ممكن تولع في العربيه وهو ياوح ويقولي انا عارف شغلي كويس متخافش!!!

* رغم انه كان حالل البلوك الا انه بعد التركيب الطبه اللي ورا الفتيس بقت بتجيب ميه وفضت مية الريداتير في 5 دقائق وطبعا سبت العربيه علشان يفك ويغير الطبه..

* تاني يوم قالي انه غير الطبه وطبعا طلب فلوس تاني واما دورت العربيه لقيت الشكمان بيطلع دخنه بيضه ما كانتش موجوده قبل كده وطبعا قعد يحلفلي انه زيت علي البساتم من التركيب وهيروح بعد 10 كيلو بالكتير.

* العربيه خدتها مشحمه من جوه (كراسي وفرش ابواب) ولما كلمته قال مش فيه شغل في العربيه يا بيه وطبعا هزقته وقلتلو شغلك في حوض الموتور ايه اللي بيدخلك الصالون؟ ده حتي كنت حاطط زجاجة برفان في التابلوه خلصها

* البيه لما شال الفتيس حطه بزيته في شنطة العربيه علي الموكيت وطبعا لقيت الموكيت عايم زيت غسلته لحد دلوقتي 3 مرات بجاز وكلور وجميع المنظفات ومفيش فايده وطبعا الشنطه دلوقت ما بأقدرش احط فيها حاجه..

حسيت بصوت في الفتيس مش طبيعي بعد ما استلمت العربيه بيومين فخفت ليكون فيه حاجه ووديتها لميكانيكي تاني وكانت المفاجئه. لقينا مفتاح 13 جوه الفتيس؟!! الاسطي لما كان بيهوي مسامير الدسك وقع منه المفتاح اللي بيهوي بيه جوه الفتيس وطبعا بدل ما يفك الفتيس تاني سابه وجاب مفتاح غيره وكمل عادي جدا.. وده كلفني مصنعية فك فتيس وكمان تغيير طقم دبرياج تاني..

* العربيه لحد دلوقتي عامله اكتر من 10000 كيلو والدخنه بتزيد والموتور بياكل زيت..

وفي النهايه دفعت اكتر من 1700 جنيه قطع غيار ده غير ال400 جنيه المصنعيه اللي خدها الاسطي الدكتور واللي خدهم قبل ما اتحرك بالعربيه او اجربها بحجة انه عايز يحاسب الصبيان اللي في الورشه وممعاهوش فلوس..

يعني اكتر من 200 جنيه والعربيه بقت اسوء من الاول بمراحل.. حسبي الله ونعم الوكيل وربنا ينتقم منه هو واللي زيه....