الموضوع: مميزات وعيوب عربياتنا الدايو لانوس

من عيوب الانوس انها بتسحب بنزين بمعدل عالى الى حد ما
الثبات بيقل بعد 120
ودى العيوب الى انا لاحظتها غير كده العربية زى الفل

انا معايا لانوس 99اوتوماتيك وعندى شويه ملاحظات على العربيه

-الفرامل بتاعه العربيه وحشه اوى انا كنت فاكر ان الموضوع ده عندى انا بس لاقيت ناس كثبر بتشتكى من الفرامل .
-الفتيس الاتوماتيك بتاع العربيه مش اد كده بيعمل مشاكل بس بيقضى الغرض وخلاص .
-استهلاك العربيه للبنزين عالى بتعمل حوالى كم150فى الصفيحه داخل البلد
فى ناس بتقول ان الانوس 1 استهلاكه للبنزين اعلى من الانوس2 بس انا مش عارف الكلام ده صح ولا خطأ.
- المتور صوته عالى شويه
-غير كده العربيه جميله جدا وشكلها كويس ومشاكلها بخلاف الفيس الاتوماتيك مش كتير وكمان قطع غايرها رخيصه للنسبه انها عربيه حديثه.
limo

انا كان عندى لانوس لمدة 3 سنوات جبتها اول ما اللانوس نزل:

العيوب اللى كنت بلاحظها فيها:

1-الصاج خفيف
2-كان فيه حاجة بترجرج فى جانب السيارة الايمن لما بآجى اطلع بالعربية (لحظة رفع القدم اليسرى من على الدربرياج) ومحدش عرف دى إيه ولا إيه حلها حتى فى التوكيل واتهمونى ان عندى تهيوات (بقت موضه حكاية التهيؤات فى التوكيل دى بس انا كنت pioneer (من الرواد يعنى)، إتهمت بالتهيوآت من 7 سنوات مضت)، وظلت السيارة بهذا العيب حتى بيعت
3-شداد التكييف اللى بيشغل الريسايكل او الفريش إير انقطع بعد 12 الف كيلومتر وصلحوهولى فى التوكيل بدون فلوس، وبعدها بشوية الشداد اللى بيغير خروج هواء التكييف (امامة، سفلى، على زجاج السيارة) انقطع بعد 20 الف كيلومتر، ورحت بيها التوكيل قالولى مش موجود سيب تليفونك وهانتصل بيك اول ما ييجى، سبت لهم التليفون منذ خمسة سنوات ولحد ديلوقتى محدش اتصل بيا ، صحيح انى بعت السيارة بعدها بفترة بسيطة بس انا مقلتلهمش :lol:
4- طرمبة البنزين ابتدت تطلع صوت جامد بعد 10 آلاف كيلومتر وغيروهالى فى التوكيل بدون فلوس
5- الكالون بتاع الكبوت الامامى باظ بعد 5000 كيومتر وصلحولى فى التوكيل بدون فلوس

مميزات العربية:

موتورها حلو وناعم جدا وبتسحب

1-بالنسبالى كانت ثابتة على الأرض حتى 150 كم/س لانى كنت مركبلها جنوط سبور مختارة بعناية

2-بتاخد 5 افراد مرتاحين بدون تأثير على السحب او العفشة او ارتفاع العربية

3-مش بتحك فى الأرض

4-شاسيهها محترم جدا، مرة نزلت بالعجلة اليمين اللى قدام كلها فى حفرة مواسير مية، وماطلعتش العربية غير لما الناس شالوها، رحت بعد كدة رفعتها كلها عند بتاع الزوايا ملقيتش فيه اى حاجة غير خرابيش فى الوبية بتاعة المقصات والزوايا محصلش فيها اى لخبطة

مع ملاحظة انى بعت العربية عاملة 25 الف كيلومتر فقط ، لكن بمتابعة العربيات فى الاعمار الاطول لاحظت ان فيه منها بيعمل مشاكل فى الشكمان وكذلك بعض اجزاء العفشة على عمر 60-70 الف كيومتر