السنتر لوك فى الواجا 2009

**ahmadelsaeed** · 02-12-2009 01:36 PM

السلام عليكم,

بحمد الله إستلمت و رخصت البروتون واجا ..... العربية ما شاء الله كويسة جدا و انا مبسوط من أدائها (و شكر خاص لأيمن و مهاب على مساعدتهم ).

طبعا هيبقى فيه تقييم بعد الألف كيلو إن شاء الله.

بس أنا عندى كام سؤال:
1. السنتر لوك أنا مش فاهمه الصراحة - أحيانا و أنا ماشى ألاقيه بيقفل و يفتح لوحده مع تبديل الضغط على البنزين و الفرامل - و الكلام ده بيحصل كذا مرة ... إيه تفسير ده و أعالجه إزاى ؟

2. و أنا ماشى طوالى , الدركسيون بيبقى حاود سنة شمال (يعنى علامة بروتون مش فى السنتر بالظبط) فده يبقى محتاج ضبط زوايا و لا إيه ؟

3. فى الصيانات أروح فرع أبو رواش و لا فرع العجوزة ؟

أنا كده كده ناوى أجمع كل المشاكل دى و أظبطها فى صيانة الألف ... بس قلت أستفيد بخبراتكم الأول

شكرا مقدما على الرد

**ahmed_h_g** · 02-12-2009 05:11 PM

الف مبروك وربنا يباركلك فيها وكلها حاجات بسيطه وتتحل فى صيانة الألف ان شاء الله .
بالنسبه للسنتر شوف الموضوع ده يمكن يفيدك

http://www.nilemotors.net/Nile/107560-autolock.html

**waleedfesal** · 02-12-2009 05:55 PM

الف مبروك على العربيه

ربنا يديك خيرها ويكفيك شرها

وبالنسبه للمشاكل اللى قابلتك

ان شاء الله تكون بسيطه وتتحل فى اول صيانه

**ahmadelsaeed** · 02-12-2009 06:10 PM

المشاركة الأصلية كتبت بواسطة eslamkasem

السنتر مع اول دوسة فرامل بيقفل لوحدو
وبعدين عندك في التابلوه بتاع العربيه اول زارا من ناحيه الشمال دوس عليه هيفتح اللوك عادي
انا بقي كان الدركسيون بيحدف يمين وكنت عمله في الملاحظات في صيانه الالف والحمد لله اتظبط بس معرفش عملو ايه
وعلي فكره انا ملاحظ حاجه غريبه في الواجا الصاج بتعها ضعيف جدا مش عارف قولي رايك في الصاج وحسه قوي ولا ايه ظروفه
وانا معيا بردوا واجا 2009

أيوه ما هو بيقفل فى أول فرامل و بعد كده بيقفل و يفتح كذا مرة و إنت ماشى

قصدك الزرار اللى بنور و يطفى ده ؟ مش شغال عندى

ربنا يطمنك على الدركسيون

لا الصراحة يا إسلام أنا شايف الصاج كويس جدا ... بس إوعى تكون بتقارنه بالألمانى زى الأوكتافيا و كده ... بس أنا شايف إنه أحسن من الكورى و اليابانى الصراحة ... دى وجهة نظرى المتواضعة.

ممكن يا إسلام تبعتلى نمرتك على الخاص ؟

شكرا

**eslamkasem** · 02-12-2009 06:32 PM

لا مش احسن من اليباني يا عم خالص كان معيا تيرسل 94 تويوتا كانت جامده جدا ولو حاجه حكت فيها ميبنش فيها ولا تدخل جوا زي الي حصل معيا في الوجا بصراحه يا جماعه ومنغير زعل الناس هنا بتنفخ في البروتون لدرجة الواحد تخيل معها انو معاه عربيه خرافيه ومع اول حاجه تحصل بجد حسيت اني اتصدمت فيها اوي ...هيا اه ماتور قوي وكدا كدا بس العفشه ناشفه والصاج مش قد كدا والشكل الي حد ما مميز بالنسبه للوجا الكلام دا عشان محدش من بتوع الجين ولا البرسونا يمسك فيا

**ehab49** · 02-12-2009 07:24 PM

المشاركة الأصلية كتبت بواسطة eslamkasem

لا مش احسن من اليباني يا عم خالص كان معيا تيرسل 94 تويوتا كانت جامده جدا ولو حاجه حكت فيها ميبنش فيها ولا تدخل جوا زي الي حصل معيا في الوجا بصراحه يا جماعه ومنغير زعل الناس هنا بتنفخ في البروتون لدرجة الواحد تخيل معها انو معاه عربيه خرافيه ومع اول حاجه تحصل بجد حسيت اني اتصدمت فيها اوي ...هيا اه ماتور قوي وكدا كدا بس العفشه ناشفه والصاج مش قد كدا والشكل الي حد ما مميز بالنسبه للوجا الكلام دا عشان محدش من بتوع الجين ولا البرسونا يمسك فيا

بس ان مختلف معاك في الكلام الصاج الوجا اقوي من اليباني بكتير ممكن في اختلاف في بروتون الجديدة اصل المعي 2006 مش 2009 معرفش الاختلاف الي في الموتور فقط اول مرة اعرف موضوع الصاج

**eslamkasem** · 02-12-2009 07:26 PM

اه فعلا حمايا معاه واجا 2006 بصراحه الصاج قوي جدا غير الي معيا خالص والله يا جماعه

**mahmoud_magdy** · 02-12-2009 08:05 PM

الف مبروك يا استاذ احمد
يارب تكون لسه فاكرني من يوم المقابله
الحمد لله انك استلمت على خير ورخصت كمان
ربنا يباركلك فيها ويعطيك خيرها ان شاء الله
بخصوص المشاكل اللي قابلتك
المفروض ان السنتر بيقفل وانت ماشي مع اول دوسة فرامل (الموضوع ده عندي في الجين )
اما انو بيقفل ويفتح لوحدو كدا محتاج يتظبط في التوكيل
اما الدركسيون المفروض انو يكون في اتجاه مستقيم ومعدول
بس هو العربيه بتحدف منك شمال مع الدركسيون ؟؟
اما في الصيانه اول صيانه زي ما انت عارف روح فرع ابو رواش وحاول تكون مع المهندس مدحت او المهندس أحمد لانهم أحسن الموجودين على ما اظن
طبعا مبروك مره تانيه ومستنيين تقرير عن انطباعك عن العربيه

**mahmoud_magdy** · 02-12-2009 08:09 PM

بخصوص الصاج واساسيات العربيه عموما
كان معانا في المقابله المهندس هاني وكان بيشتغل في بروتون وبعد كدا راح ستروين
قال حاجه مهمه اوي
ان الجوده في التصنيع في موديلات بروتون الجديده اقل من الموديلات القديمه
وطبعا السبب علشان السعر
متتخضوش اوي من ناحية الصاج
الصاج مناسب جدااا وكفائته كويسه
ربنا يحفظلكو عربياتكو