الموضوع: سؤال من اسكندرانى .. ازاى اروح من التحرير للتوفيقيه ؟؟

لو انت رايح التحرير من المهندسين يبقى هتاخد كوبري اكتوبر
وبلاش تنزل نزلة التحرير
انزل النزلة اللي بعدها على طول بتاعة رمسيس
أول ماتنزل منزل الكوبري اركن عربيتك في أي حتة
وخش أول يمين أو تاني يمين على رجلك
هاتلاقي الناس فارشة عالارض ومحلات بالعبيط كلهم اكسسوارات مبروك بقيت في التوفيقية !!!
===========================
لو الوصفة اللي فاتت دي صعبة عليك
روح ميدان التحرير زي مانت متعود تروح
لف الصينية بتاعة الميدان لحد ما يبقا مجمع التحرير في ضهرك
وامشي على طول
هاتلاقي تقاطع فيه إشارة - سيبك منه
هاتلاقي إشارة تانية وفيها اتجاهين
يمين رمسيس - شمال ميدان عبد المنعم رياض ومطالع كوبري اكتوبر
هاتخش يمين على اتجاه رمسيس
هاتلاقي نفسك ماشي وجنبك منزل الكوبري اللي قلتلك عليه فوق
أول ما المنزل يخلص اركن عربيتك
وخش أول أو تاني يمين على رجلك ومبروك برضه بقيت في التوفيقية
===========================
لو الكلام اللي فوق ده كله ماعجبكش
من ميدان التحرير اسأل أي حد على اتجاه رمسيس
ولما تلاقي على يمينك منزل كوبري - اركن عربيتك
وخش أول أو تاني يمين بعد المنزل مباشرة

خد بالك لو دخلت التوفيقية بالعربية مش هاتعرف تقف في حتة وهاتلاقي نفسك طلعت غصب عنك وتضطر تلف لفة كبيرة أوي عشان ترجع تدخلها تاني
لأن شوارع التوفيقية للمرور فقط ومافيهاش أي مكان للانتظار بسبب الباعة والمحلات اللي بيفرشوا بضاعتهم جوة المحلات وبرة المحلات وعالرصيف وفي الشارع وحتى بقا فيه منهم بيعلق بضاعته فوق الشجر !!!!!!!!! ربنا يعينك عالمشوار ده ...