الموضوع: الحمد لله اشتريت الساجا

الف الف مبروك يا باشا .. ربنا يبارك لك فيها

الله يبارك في كل من هنأ او قال كلام جميل

والف شكر لكل أعضاء المنتدى الجميل ده الل افدني كتير
اولاً انا بعتذر عن عدم رفع الصور اليوم لإني لسه راجع من الشغل والوقت للأسف بالليل وأوعدكو بإذن الله بكره هرفع الصور

نيجي للمهم

انا نزلت معرض العربيات القريب مني اتفرج على اللوجان وكان معايا أخويا, أول مشفناها أخويا قال إيه التقفيل الزبالة ده .
للأسف أنا كنت متحمس جداً للوجان من كلام الناس عنها لكن بعد مشفت التقفيل صرفت النظر عنها.

واحنا لسه هنمشي من المعرض أخويا لمح عربية حلوة في مكان مميز من المعرض سألنا ايه دي قالولنا دي بروتون ساجا وسعرها 65000 جنيه (سعر المعرض مش الوكيل)
عجبنا السعر بس قلقت من 1300 , روحت البيت ودخات على النت لقيت ناس أجانب عاملين ريفيو ليها وبيشكروا فيها جداً وفوجئت بحكاية 94 حصان يعني أقوى من معظم العربيات 1500 و 1600 اللي من نفس فئتها السعرية (أغلى كمان) , نزلت تاني يوم المعرض واتفرجت بجد وكان سهم الحب الذي اخترق قلبي رحت مستلف جزئ واتصرفت في جزئ وبيعت ام العيال شوية الدهب اللي حيلتها ويومها اشتريتها وانا زي المنوم مغناطيسياً , وهقولك دلوقتي ليه. بس كفاية ان الناس بيبصوا بدهشة للعربية مش عارف ليه لدرجة إن واحد لقيته طلع راسه من العربية وهو سايق بيتفرج (يمكن عشان جديدة؟ )

اقولك ليه دلوقتي العربية دي تستاهل:

الشكل الخارجي :

أول متبص على العربية ترتاح لشكلها , جذاب من غير تعقيد وأحلى من اللوجان أو اللانوس أو الفيرنا (وجهة نظري طبعاً) بس تحس انها ملمومة شوية في العرض وده اللي هيسببلك المفاجأة لما تفتح العربية

الشكل الداخلي:

تفتح العربية تفاجأ انها واسعة من جوة يعني اللي سايق يرجع الكرسي براحته واللي وراه قاعد مرتااااااااااااااااح
الفرش مريح وانت سايق تحس بالألفة كده تحس انك تعرفها من زمان (بجد والله)

التابلوه جميل والدريكسيون شكله لذيذ ,الكلاكس في الطارة بعكس اللوجان زرار في دراع الإشارة
الخامات الداخلية كويسه وأنضف من عربيات كتير (معرفش مين اللي كان بيفتي ويقول الخامات مش قيمة ؟ تقريباً كاب بيقارنها ب BMW?)

الكنبة الخلفية مريحة وفيها 3 أحزمة أمان

تشغل العربية الصوت مش عالي مقبول للسمع بس لما تزود بنزين يبقى زي مقال البروتونية في نايل موتورز (زئير وليس أنين) مش هقول زي التربو بس فيه إيقاع جميل تحب تسمعه.
الشنطة مساحتها كويسة جداً مش ضيقة

التنك والشنطة طبعاً بيتفتحوا من جوه

الكاسيت سي دي كلاريون نضيف جداً وفي حامل أكواب أمامي في التابلوه وخلفي في الأبواب

زجاج كهرباء للأبواب الأمامية ومرايتين كهرباء

انا جيبتها مانيوال لإني مبحبش الأوتوماتيك

عصاية الفتيس طويلة مش قصيرة بس مبتتهزش زي بعض العربيلت

العربية مزودة بكمبيوتر رحلات TRIP والشاشة فيها مؤشر حرارة وبنزين .....إلخ

الإضاءة الداخلية في منتصف سقف السيارة وقوية تغطي السيارة بالكامل

الكشافات الأمامية قوية وإضائتها ممتازة وكشافات الشبورة قوية جداً مع اني كنت مستصغرها في الحجم

العربية مزودة بجهاز انذار( مبيشتغلش بالاهتزاز للأسف بس لو أبواب أو شنطة أو كبوت العربية اتفتح السرينة تشتغل) وحسب مفهمت من الكاتالوج ان كل مفتاح ليه شفرة ترسل لاسلكياً للسيارة وليه ID معين ومش ممكن العربية تشتغل بمفتاح تاني حتى لو كان نفس الشكل وفتح كونتاكت (قاطع دائرة الكهرباء أو حاجة زي كده)

جنوط سبور

بارك سينسور

وسادة هوائية للسائق

عجبني قوي ان العربية ليها حلقتين حديد تتشد منها من قدام وليها حلقة بتركب ورا ممكن تشد انت بيها

طبعاً العربية لسه بتلين مقدرش اقرص قوي عليها علشان اشوف اقصى سرعة والتكييف والكلام ده بس بجد انا بحاول أحكمها لإني بحس ان العربية بتشد جامد زي متكون عايزة تجري لوحدها

العفشة محترمة جدااااااااااااااااااً مش هقولوكو انا رحت بيها فين بس فعلاً شارع كله تكسير زي المرجيحة ومع ذلك العربية ناعمة جداً متحسش بخبط أبداً وتحكمها سلس جداً

ارتفاع العربية عن الأرض مناسب (مش زي اللانوس ولا الفيرنا)

فيها مزيل ضباب للزجاج الخلفي

انا روحت أمون العربية كان البنزين على أول شرطة low مونت 31.5 كده يبقى التنك مش أقل من 35 لتر تقريباً

ده اللي جه في بالي انقلهولكوا في الفترة القصيرة دي

لو كنت نسيت حاجة أو حد عنده أي استفسار أنا في الخدمة يا شباب

نسيت أقول ان الأبواب بتفتح 90 درجة كاملة