GOO = Glasses' Owners Organization
TM
اسم المنطمة حقوقة محفوظة
السلام عليكم ورحمة الله وبركاته
ازيكم يا رجاله عاملين ايه
انا تانى اكتب الموضوع النت فصل وانا ببعته
هحكيلكم تانى
من شويه وانا بتفرج على ماتش الاهلى حصل حاجه جعلتنى امتلأ حقدا على هذا الشخص حكم المباراة
احمد فتحى فى لعبة الكوره عدت منه الخط الحكم حسبها عليه واحمد فتحى اقسم بالله انه الكوره ما طلعتش لكن لما اتعادت طلع انه الحكم هو الى صح واحمد فتحى طلع زينا نظره ضعيف وعنده استيجماتيزم شاف الخط قبل الكوره انا حقدت على الحكم فى اللحظة دى ازاى شاف الكوره من بعيد ولا حامل الرايه الى بيلقط الاوفسايدات مع انه فى اخر الملعب افتكرت وقت لما كنت بنزل العب كوره و يخلونى حكم كنت بتبهدل عشان كنت بحسب حاجات بالبركه لانى مش ببقى شايف اصلا و بيجى الكلام فى الاخر انى ماليش فى الكوره وظالم
الواحد كان زمان كويس ييجى من حوالى 7 سنين قبل ما ادخل المخروبه كليه الطب دى كنت بشوف مسافات وكنت استاذ فى لعب البلى دلوقتى خلاص
حتى وانا سايق ساعات باكل المطبات حتى وانا لابس النظاره و للاسف الواحد مع الوقت بيحس انه نظره بيقل او اتعود على النظاره وماعادش يقدر يستغنى عنها
فى الاونه الاخره كمان بدأت احس بالاضطهاد والقهر انه ناس كتير تقولى لو رايح تتفق على حاجه مع حد فى بيع وشرا ما تلبسش النظاره عشان الناس ما تضحكش عليك وخصوصا الصنايعيه ولما تيجى تتشاكل او تزعق مع حد اوعى تكون لابس النظاره برضه طب لما اجى اضرب اضرب ازاى
الموضوع استحفل يا ريس فكرت حتى ابعت جواب للريس زى احمد حلمى بس للاسف مش معايا رقمه ولا عنوانه و خايف ابعتله يطنش لانه مش بيلبس نظاره ماشاء الله شباب ده بيركب ببلاش اللهم خلى الزعيم القائد
ففكرت فى فوكيره على رأى رمزى ابن عم دولة يا هل لو ينفع نعمل مؤسسة للابسى النظارات و نلم تبرعات ليهم عشان لو النظاره اتكسرت نقدر نجيبله نظاره تانيه الشامبر بقى بالشىء الفلانى وكمان نبدأ الحمله فى انه نقنع كل الى مش بيلبس نظاره يلبس نظاره وانها بتعطى ستايل و برستيج وساعتها اخد نيابتى فى طب وجراحه العيون و افتح مشروع نظارات وهقسم طبعا مع حبايبى فى الاخر
الاول انا عايز اعمل احصاء عن لابسى النظارات فى المنتدى الناس الجدعه نشوف نسبة مين الى اكتر
لابس
مش لابس
ونكمل ونشوف وربنا يستر
واى حد بتقابله اى مشكله يقولها عشان نبدأ فى حلها من بدرى
بسم الله
نبتدى
برنس لابس نظاره يعنى : 1
مش لابس نظاره : 0 Zero