الموضوع: حساس الشكمان المشكله ؟ والحل الامثل

أبو فارس شغلك جميل وكما انت فنان بس في شوية أسئلة رد عليها علي مهلك
1- هل رائحة البنزين من العادم اختفت تماما.
2- هل فعلا سحب العربية تحسن.
3- هل استهلاك البنزين (تحديدا داخل البلد) تحسن واصبح كام كم/صفيحة.
4- جربت تنضف حساس الشكمان بالتسخين علي حرارة عالية (حرارة تشغيلة 600 درجة ) ورشة بمنظف مذيب قوي مثل منظف الكاربيراتير مع أخذ الإحتياطات اللازمة طبعا عمرك ما هتفك الحساس تاني وخاصة ان المكان في اللانوس ضيق ولازم تفك المروحة وخلافة بس انا اعتقد ان ممكن إزالة طبقة الكربون المترسبة علي الحساس من الداخل.
5- تذكر ان سبب تلف الحساس قد يكون او في الغالب سوء حالة الرشاشات (تسييل) وبالتالي سوء الخليط ومن مضاعفاتة تلف حساس الشكمان علشان كدة عاوزك تختبر الرشاشات قبل حدوث ضرر للحساس الجديد (دي وجة نظر عاوزين رأي الخبراء بخصوصها)

اولا شكرا ليك

ثانيا الاجابات بالترتيب
1 مكنش فيه ريحة بنزين نى ولو موجود يبقى موضوع تانى ( ريحة العادم وحشه ) لان نسبة الخليط الداخل للمكنه ( بنزين الى هواء ) مش مظبوطه لان قرايات حساس الشكمان ملخبطه
2 اكيد طبعا لازم يتحسن ( لاكن وارد طبعا لو كان الحساس البايظ بيرمى بنزين بزياده بسيطه تلاقى العربيه بتجرى على الحساس البايظ ( ذى بالظبط مانحط باك واسع شويه فى العربيات الكربيراتير علشان تجرى ) بس تستحمل بقه البنزين )
3 استهلاك البنزين موضوع نسبى وفضفاض اوى اذاى ؟ يعنى لو بتكبس على العربيه او بتمشى على rpm عالى فوق 4 الاف لفه او بتسيبها دايره على الفاضى فى الاشارات او بتهدى كل شويه او حتى لو بتحملها اوزان كتيره كل ده يخليها تاكل بنزين بغباوه وطبعا العكس صحيح
ولاكن فى المتوسط لو ماشى بالعقل جوه البلد الصفيحه تعمل معاك 250 كيلو
وعلى طريق سفر من نقطه 1 الى نقطه 2 بشرط بدون كبس وسرعتك القصوى متعديش ال100 كيلو على الخامس الصفيحه هتعمل 350 كيلو عن تجربه من دمياط لبورسعيد
4 مجربتش لان الحساس نفسه هو اللى بيبوظ مش مسألة انه متغطى باوساخ ( بدليل انت عمرك ما هتوصله لدرجة الحراره اللى هو بيبقى فيها وهو راكب ) وبعدين لو لمبه اتحرقت لو نضفناها هتشتغل تانى ؟ ( برده ابقى جرب وقولى انما انا معنديش استعداد اركب واشيل تجربه ده عزاب ياعم )
5 عيوب الحساسات معروفه ومفيهاش مغالطه يعنى لو عندى حساس او اكتر بايظ هعرف على طول مش هستنى يعنى لما يبوظ حساس الشكمان علشان اعرف ( علاماته واضحه اوى )
وبعدين عربيتى 2008 من ساعة مجبتها مشفتش غير ال92 وساعات كمان ال95 يعنى ملحقتش تبوظ لا رشاشات ولا حساس شكمان بس هنقول ايه ( نصيب وغش بنزين )

ارجو ان اكون افدتك

وسلامى لك وللجميع