احبائى... زى ما عودتونى تطمنونى دايما هاحيلكم انا على اللى عملته وعليكم انكم تقولوا لى الحلول
اولا السيارة لانوس 2008 كاملة عاملة 42000 كم
اول موضوع: انا غيرت الجنوط الاصلية بجنوط 14 مع تغيير الكاوتش بنوع ايطالى اسمه فيرسو ولما رحت ارصص الفنى سال على الرينجات اللى جاية مع الجنوط قلتله ممعهاش حاجة قال يبقى تعملها فى الخرطة ودى بتتكلف 80 جم وماينفعش ترصيص من غيرها. هل ممكن ينفع الترصيص بدون الرينجات دى ولا لازم اعملها؟
تانى موضوع: انا عملت مشوار للقاهرة من كفرالشيخ حوالى 170 كم رايح وزيهم جاى بدون ترصيص وكان راكب معايا واحد جنبى واتنين ورا العربية جميلة جدا فى الجنوط مع هزة فى الطارة عند 90-100 كم واللى غاظنى جدا بقى ان الكاوتش بيحك فى ايه مش عارف مع كل تعريجة فى الطريق ويدى صوت مزعج كدة. يا ترى هو بيحك فى الترابة ولا الفجوة وهل فيه حل ولا لا؟ وايه اخطار الموضوع دة؟
تالت موضوع : انا غيرت اللمبا بلمبات فيليبس 60/55 extreme power ورحت مشوار القاهرة دة وقبل قليوب بخمسة كيلو ركنت 5 دقايق ورجعت دورت العربية لقيتها فاصلة تماما ودة لاول مرة تعملها معايا..المهم جبت كهربائى من الطريق اكتشف ان البطارية نايمة وع الزق دارت ورحنا الورشة زود 3 زجاجات ماء نار صغيرة ووضع البطارية على جهاز شحن ربع ساعة ودارت السيارة بس هو توقع ان البطارية ضعيفة وعاوزة تتغير وفعلا بعد ما خلصت المشوار وجيت ادور العربية ما دارتش غير بالزق.فهل ياترى اللمبات الجديدة لها علاقة بموضوع البطارية ولا دى صدفة ان البطاريه عمرها خلص اليوم دة؟ ولو حبيت اجيب بطارية جديدة ايه احسن الانواع الموجودة واسعارها ايه؟
معلش انا تعبتكم فى القراءة بس يا ريت حد يفيدنى الله يكرمكم