باركولى يا ماروتيه ,, جددت القرموطى 3 سنين
االسلام عليكم يا ماروتيه ,, ازيكم يارب يكون كله تمام
من اواخر شهر 10 اللى فات و رخصه العربيه كانت خلصت (كانت سنه واحده ) و انا عاوز اجدد بس كنت مستنى جواب البنك لأن العربيه قسط
من فتره قريبه رحت و دفعت باقى المبلغ اللى فاضل و اتبعت جواب للمرور برفع الحظر عن العربيه
الموضوع خلص فى المرور على يومين اول يوم كان قبل العيدبيومين ,, والتانى كان امبارح
اول يوم رحت لقيت ان الجواب لسه موصلش فخلصت الحجات التانيه ,, دفعت الضريبه 3 سنين + غرامه تأخير لأنى كنت بحسب ان الواحد مبيمشيش فى اى اجراءات الا لما الجواب يوصل ( بتكون تلت الضريبه المفروضه على العربيه فى سنه واحده ) 500جندى+ التأمين الأجبارى 163ملطوش + ملف الفحص 40 بندق ( على ما اتذكر )
طلعت على نيابه المرور عشان اجيب المخالفات و الحمد لله طلعت زيرووو ( مفيش مخالفات ) و كان فى ناس هناك مايعلم بيهم الا ربنا اللى عليه 1000 و 2000 و حجات لوزه ,, بعد ما خدت الشهاده (رمقونى ) بشويه بصات خلتنى خدت بعضى وطرت !
رجعت عشان افحص كان قدامى عربيتين بس ,, و لكن صديقى الصدوق ( سووء الحظ ) لقيت الراجل قام و قال مش فاحص تانى النهرده و تعالو بكره ,, طبعا انا خدت الورق اللى عملته و رحت مروح و قلت هابقى اروح بعدالعيد تكون الدنيا راقت شويه و اكون ضمنت ان الجواب وصل عشان اخلص الباقى كله
تانى يوم اللى هو امبارح رحت غسلت العربيه غسله محترمه و طلعت ع المرور رفعت البصمه و دخلت الفحص ( كلام فاضى ) قلب نور يابنى (قلبتله ) طيبشغل المساحات ( شغلتله ) طيب ارفع الأزاز ( رفعتله ) و لقيت عسكرى بينقض علي الطفايه اللى كنت حاططها جمبى و ربع دقيقه ورجعها ,, بس كده يا اخواننا ؟؟ لقيت صوت جهورى جاى من ورايا اططططططططططططططلع روحت يا فكيك على بره ,,, اتارينى كده خلصت الفحص وانا اللى حاطط فى دماغى فحص يعنى عادم و بتاع ,, و غالبا مصدرالصوت الجهورى اياه كان العربيه اللى ورايا كانت نقل تريلا ( زمانه كان بيبصلى قدامه ونا بافحص بيقول فى نفسه سبحان الله " و يخلق مالا تعلمون " ايه العربيه دى ؟؟!!)
بعد ما وصل ورق الفحص للشباك و شويه الحوارات الروتينيه دى طلعت استلم الرخصه من اوضه الحاسب الألى ( ال يعنى ) و بعد بتاع ساعه و نص خدتها و رحت مكتب كده جمبهم خدت المثلث و شنطه الأسعافات ( شكل الشاش اللى فيها فوطه المطبخ بتاعت امى انضف منه - ده غير انه مش شنطه ولا بتاع ده كيس كده و خلاص !)
خدت الحجات دى وطلعت ع العربيه لزقت البادج و حطيت الرخصه فى جيبى و اتشاهدت ونا طالع من المعتقل و انا بقول فى نفسى مش جايلكو (ان شاء الله ) الا بعد 3 سنين يا غجر
خلاصه : الموضوع قفل بالأكراميات حوالى 700 وشويه
حاجه اخيره : عاوز اشكر حبيبى اللورد عادل لأنى كنت استشرته فى الحوارات دى و ساعدنى و الراجل كان جدع جدا معايا ,, ميه سلام وتحيه يا دولا :)
يلا عاوز كله يبارك ,, و اى استفسار انا تحت الأمر
