تقرير صيانة ال 15000 للجن 2 2009
السلام عليكم يا شباب
بقالي فترة كبيرة مش بشارك. مطحون في الشغل بعيد عنكم
المهم حبيت أشارك بتقرير صيانة ال 15000 اللي عملتها لعربيتي الجين 2 2009
طبعاً حجزت ميعاد الصيانة بالتليفون قبل العيد بيومين وكان الميعاد يوم 1/12/2009 الساعة 10 صباحاً (أول يوم عمل بعد أجازة العيد)
في اليوم ده الصبح بالصدفة مشغل الراديو وبحاول أوطي الصوت من المالتي فانكشن بس بيعمل ميوت؟؟؟ بدوس على زرار الميوت بيعلي الصوت؟؟؟؟ الزرار اللي بيعلي الصوت هو اللي كان شغال كويس..قلت إيه الصدفه دي !!! في نفس يوم الصيانة .
كنت هناك على 9 ونص كدة وكان قدامي تقريباً 4 عربيات
جت المهندسة إيمان عشان تكتب تقرير الصيانة وكان معاها المهندس مصطفى
أنا طبعا مسبتش أي حاجة غير لما قولتلهم عليها وكانت الملاحظات كالتالي:
1. دواسة الفرامل بتزيء
2.باب تنك البنزين مش بينطر
3.صوت في شنطة العربية
4.تغيير فانوس الصالون (من صيانة ال 5000) عشان السويتش بيعلق
5.صوت العفشة (كان صوت مزعج بحس إن الكاوتش الأمامي حيتخلع خاصة في المطبات الصغيرة)
6.التخريفة الجديدة في المالتي فانكشن
7.يفحص المؤشر بتاع البنزين والعوامة عشان في مرة كدة المؤشر نزل لل0 والمؤشر بتاع البنزين نور ومشيت شوية بعدها لقيت المؤشر علي عن ال 0 والمؤشر طفى وكمان أكتر مرة فولت فيها كانت 41 لتر من ساعة ماجبت العربية من 5 شهور
8. المراية بتتهز الي جانب السواق في السرعات بعد ال90 كيلو هزة خفيفة
9.إيريال راديو بدل اللي كسرته
المهم قالولي الساعة 4 العربية حتكون جاهزة، رحت الشغل عندي في القرية الذكية (الميزة الوحيدة إنها قريبة من التوكيل)
بين الساعة 11 و 12 كلمتني إيمان بتقولي تيل الفرامل الأمامي محتاج يتغير تحب تغيره؟ بكام؟ قالتلي 380 بالتركيب والضريبة قلتلها ماشي غيروه بس أنا عاوز التيل اللي كان راكب أخده قالتلي حنسيبهولك في الشنطة.
على الساعة 3 ونص كلمتني قالتلي العربية خلصت روحت شفت التيل لقيته فعلاً متاكل وقرب يوضل للحديد بس الغريبة ماكنش بيصفر معايا!! وقالتلي إن العوامة عاوزة تتغير بس مش متوفرة والمالتي فانكشن حيتغير بس مش متوفر والفانوس بتاع الصالون مش موجود والإيريال مش موجود!!!!! قلت عادي دة المتوقع
المهم جربت العربية مع المهندس مصطفى ودي الحاجات اللي اتزبطت:
1.ركب سوستة لباب تنك البنزين ب 6 جنيه وبقى ينطر
2.صوت التزييء اللي في دواسة البنزين إختفى
3.صوت الشنطة إختفى (شيكارتون على الدراعات بتاعت الشنطة)
4.صوت العفشة أقل بس لسة موجود وسمعه المهندس مصطفى وقالي حنشوفعا تاني
5. المراية معاملوش فيها حاجة وحلها إنها تتغير بس مش تبع الضمان! (قلت خلاص مش مشكلة الهزة مش مضايقاني)
رجعنا الورشة تاني عشان موضوع الصوت بتاع العفشة ورحت أحاسب والفاتورة كانت:
1. الزيت 96
2. فلتر الزيت 45
3. السوستة 6
4. تيل الفرامل الأمامي 255
6. المصنعية 240
7. ضرايب 40
المجموع كان 705 جنيه وقابلت المهندس آمر ووافق على الخصم ال 10% بتاع NileMotors على قطع الغيار بدون الزيت كان حوالي 30 جنيه وقلتله على الفانوس والمالتيفانكشن والعوامة المحجوزين لية قالي إزاي مفروض عندنا الفانوس والمالتي فانكشن ونده لواحد هناك وقاله ركبولوه الحاجات
الراجل جاب الفانوس وركبه بس قال مقيش المالتي فانكشن والمهندس آمر قالع لحقت تخلص كلها (كان جليب كمية كبيرة قريب) قالي في طلبية كبيرة من قطع الغيار جاية الشهر دة قبل السنة الجديدة تابع مع داليا عشان العوامة والمالتي فانكشن
روحت بالعربية لقيت المالتي فانكشن إتعدل وشغال زي الفل
صوت العفشة لسة موجود ومضايق منه وإحتمال أعدي عليهم تاني أنا شاكك إنها مش عفشة بش مش عارف ممكن تكون إيه؟؟؟
في صوت تزييء خفيف ناحية الكاوتش الأمامي اللي عند السواق وأنا ماشي مش عارف من إيه؟؟؟ ليه علاقة بالتيل ولا لأ؟
المالتي بعد كدة بقى يشتغل كويس مرة ويعلق مرة
أنا حاسس إني طولت عليكم قوي سامحوني بس حبيت أكتب التقرير بالتفصيل لللإفادة العامة.
كنت عاوز أسأل ممكن الائي الأيريال متوفر عند مين؟؟؟؟
تحياتي