شاهين تركى أو بيجو إيرانى أو إسبيرانزا صيني(نقلا عن سبعاوى)
همممم، والله وهو سؤال صعب، انا لو بشترى واحدة من دول هاقف محتار
نمسكهم واحدة واحدة:
المحرك:
الشاهين 1600محركها فيات ذو كامة واحدة و 8 صبابات ، يستخرج قدرة قصوى مقدارها 96 حصان عند 5400 لفة للدقيقة، اداء المحرك بوجه عام ممتاز فوق ال1800 لفة فى الدقيقة، تسارعها ممتاز، والمحرك هادئ وطيع، لكن تحت 1800 لفة للدقيقة يكون المحرك غير مرن ويفتقد الى حد كبير للطواعية، ولذلك هى سيارة تحب إستخدام عصا الفتيس بكثرة حتى نبتعد بها عن منطقة الRPMالمنخفضة
الإسبيرانزا:محرك 1600 من شركة إسمها AVLذو 2 كامة و16 صباب، قدرته القصوى 110 حصان ، المحرك هادئ جدا فى كل السرعات ويظهر صوته بعد 3500 RPM لكن المحرك كسول جدا تحت 2000 RPM ولذلك فهذة السيارة ايضا تحب استخدام عصا الفتيس بكثرة، برغم كون المحرك غير خشن فى السرعات البطيئة لكن السيارة مابتسحبش غير لما توصل ل 2000 RPM
البيجو: المعلومات المتاحة لى تقول ان المحرك 1600 سى سى و 82 حصان ، غير مؤكد إذا كان من بيجو او شركة تانية، لم تتح لى بعد فرصه تجربته على الطريق لكى استططيع تحديد معاملات الأداء له
الشاسيه والعفشة وآلات الجر:
الشاهين تعتمد على شاسية وعفشة وآلات جر الفيات 131 ، وبالتلى فهى تعتمد على شاسيه قوى وآلات جر خلفية تتميز بالمتانة القوة التحمل، آلات الجر ذات نسب تخفيض قليلة، وبرغم ان هذة ميزة للتسارع داخل المدينة حيث تعطى عزم تسارع ممتاز للسيارة لكنها تقلل من السرعة القصوى للسيارة (عند سرعة 150 يكون المحرك على 5000 RPM)
بالنسبة للعفشة فهى تعطى للسيارة درجة ثبات عالية فى الطرق ومتانة فى مواجهة المطبات
الإسبيرانزا غير واضح مصدر الشاسية الخاص بها ، وإن كان نظام التحميل وآلات الجر بها تشابه الى حد كبير نظام جنرال موتورز، بالنسبة لآلات الجر فنسب تخفيضها عالية (110 كم ساعة عند 3000 RPM) ولكن هذة النسب العالية مع محرك الإسبيرانزا الكسول فى السرعات المنخفضة تؤخر تسارع السيارة فى بداية الحركة، فى حين انها تؤدى بشكل ممتاز فى السرعات العالية وتعطى مدى افضل لسرعة السيارة القصوى
بالنسبة للبيجو: كل معلوماتى ان الشاسيه بتاعها هو شاسيه سيارة جر خلفى من شركة إيرانية اسمها بيكان وغالبا هو احد موديلات رينو القديمة حيث ان بيكان هذة تحصل على موديلاتها من رينو (السيارة ال405 ذات الجر الخلفى المطروحة فى مصر قرأت عنها هذا التعريق على احد المواقع التى تهتم بالسيارات الإيرانية: السيارة بيكان التى إستعارتها شركة خودرو والبستها الرداء الخارجى للبيجو 4005) ، لكن للأسف لا اعرف اكثر من ذلك عن اداء الشاسيه والعفشة وآلات الجر
بالنسبة للصالون: تتفوق الإسبيرانزا بلا منازع فى مستوى الصالون والفخامة وتنوع واناقة التجهيزات، تليها البيجو وتأتى الشاهين فى المؤخرة
بالنسبة لسهولة القيادة: الإسبيرانزا سهلة ةسلسة جدا فى القيادة، البيجو معرفش، الشاهين محتاجة تتعود عليها علشنا تسوقها، مع ملاحظة ان الإسبيرانزا ضايقنى منها البوش الواضح فى عصاية الفتيس، وكذلك خبط علبة الديريكسيون
الحجم: الإسبيرانزا اكبرهم، تليها البيجو فالشاهين
الإعتمادية : تأتى الشاهين فى المقدمة فى مسألة الإعتمادية، يعنى لو نازل وراك مشوار فى مكان اول مرة تروحه ومعاك شاهين مش ها تسال نفسك إذا كان ينفع تروحه بالعربية وللا لأ، لو معاك إسبيرانزا هاتفكر 100 مرة ، بالنسبة للبيجو برضه لسة معرفش
العمر الإفتراضى المتوقع: الشاهين ممكن تتوقع منها 250 ألف كيلومتر بدون مشاكل تذكر، طبيعى انك هاتغير حاجات فى العفشة بسبب شوارع بلدنا العجيبة بس ده ينطبق على كل السيارات
الإسبيرانزا : لا تزال قصة العمر الإفتراضى مش واضحة
البيجو لسة معرفش عنها حاجة
ببساطة: لو عايز عربية piece of mind تشتريها وتشترى دماغك معاها تبقى الشاهين
لو عايز عربية عالية فى مستوى التجهيزات والفخامة ومتقبل فكرة انك بتغامر فى مسألة العمر الإفتراضى تبقى الإسبيرانزا
لو عايز عربية وقلبك جامد لمغامرة كبيرة ممكن تكسبك عربية رائعة بسعر معقول وممكن برضه تطلع عربية وحشة جدا بيقى البيجو
مع ملاحظة ان دى تركى تقفيل مصرى ودى إيرانى ودى صينى تقفيل مصرى (يعنى متديش ودنك قوى للى هيقوللك بيجو وتكنولوجيا فرنساوى والكلام دا لأن ببساطة الشاهين برضه بتكنولوجيا فيات والإسبيرانز بتكنولوجيا شركات العالم كلها، لكن الخامات وضبط الجودة كلها بضمان دول صف تانى وبالتالى المنشأ هنا لا يعتد به لأنه متساوى)
نصيحة: حط الفيرنا ضمن اختيارتك
سبعاوى