يا جماعة كفاية هجوم علي السيراتو !!!

**elmoski** · 07-12-2009 03:07 AM

السلام عليكم..انا بس عملت الموضوع ده عشان ادافع عن العربية اللي انا ملاحظ كمية كبيرة من الهجوم عليها من بعض اعضاء المنتدي..اولا انا مش عايز حد يزعل من كلامي بس اعتبروها وجهة نظر,, سمعنا احد الاعضاء بيقول العربية ولعت قلنا ماشي وعضو اخر يقول احذرو من السيراتو علشان بتحدف شمال,, وهتستغربو ا لو عرفتم اني دخلت وصوت ان العربية فعلا بتحدف شمال وده اكبر دليل اني محايد يعني محدش يقول عشان انا دافع دم قلبي في السيارة فلازم ادافع عنها والكلام ده...المهم ياجماعة اا عاوز اقول حاجة اولا مش لازم عشان بعض الكلام اللي بيتقال عن العربية تبقي وحشة يعني مثلا العربية اللي ولعت انا استحالة اصدق انها كانت ماشية علي 100 واتقلبت الا لو مثلا مقطورة دخلت فيها من الجنب او نقل اواكدة يعني ليه الاخ اللي كان سايقها ميكونش الخطأ منه علي العموم حمدلله بالسلامة عليه..المهم انا مش عاوز اطول عليكم لكن هوضح شوية حاجات كدة بالنسبة للحدفه اللي بعض الاعضاء بيقولو عليها هي عبارة عن ان تارة الدريكسيون حسيت انها بتروح شمال وبشكل غير ملحوووظ بالمرة والله العظيم ولكن انا نسيت الموضوع ده لانه فعلا مش محسوس وكانت المفجأة ليا لما ركزت اكتشفت ان العيب في الشوارع اللي زي الزفت هنا في مصر لاني ونا ماشي علي طريق ممهد انهاردة الدركسيون كان مظبوط والعربية ماشية لا بتحدف يمينولا شمال (فئة 103 توكيل) ثانيا موضوع السخونة في الكونسول دي انا سفرت مرتين لحد دلوقت والموضوع والسخونية عادية يعني مش هتحط ايديك هتتحرق وده انا بعتبره مش عيب في السيارة نعد نعمله مواضيع ممكن تكون ملحوظة صغيرة لكن مش عييب كبييير اوي كدة...تاني حاجة العفشة مش سيئة هي ناشفة شوية لكن مش بمشي بتألم..الخلاصة العربية كويسة والله يا جماعة محدش يقلق منها ولو موضوع الجنوط ده هو المشكلة هاتو الفئة اللي من غير جنوط وسعرها مناسب وتستاهلو العربية..وكفايا ارحموا العربية لانها بجد تقيمي ليها 8.5 من 10 واسف وجعت دماغكم ومحدش يزعل مني زي ما قلت دي وجهة نظري في السيارة.

**medo_sirion** · 07-12-2009 03:42 AM

بس كلام حضرتك بيدل ان العربية مفهاش عيوب

**aromr** · 07-12-2009 08:44 AM

انا معايا sx توكيل

لحد دلوقتي مافيش حدف في الدريكسيون
مرتاح في المطبات
لكن الحفر لازم اخدها على الهادي علشان العربية بتدب

**hobiko** · 07-12-2009 08:54 AM

بجد أنا مش عارف إلي بيحصل دة بيحصل ليه و لمصلحة مين أنا لما بشوف الكلام دة بفتكر القول المأثور كلمة حق يراد بها باطل

واحد عمل حادثة بعربية نزل بيها في نقرة و المساعدين عنده بايظين و كان ماشي عليهم بايظين حوالي ٥٠٠٠ كيلومتر و بعدين يطلع يقول إلي حصل دة كلو ذنب العربية و لما ناس تحلل الحادثة ميردش عليهم

و واحد تاني بيكلم عن مقص العربية قانو معمول من خشب مثلاً كأن الشركة دي معملتش عربيات قبل كدة ماشية و ناجحة في السوق المصري ذي ال-picanto و ال-cerato القديمة

و شوف التناقض في نفس الموضوع واحد يقولك التيجو الصيني زبالة زيها ذي السرت و يجي بعديه واحد تاني يالك لأ دي التيجو عفشتهة أحسن بكتير دي ال-cerato ماتجيش جمبها حاجة

دة غير إلي مصاحب و يعرف كل الناس في التوكيل و اكدو ليه إن العربية فيها مشاكل للصبح

أنا مش حقول اني راكب العربية و أخدت بيها نقر و مطبات كتير و أنا على سرعة عالية و محصليش حاجة

أنا مش حقول إن فيه ٢ اصحابى معاهم نفس الفئة و مقطعين بيها الدنيا و برضه لسة عايشين محصلهمش حاجة

في الأخر ذي ما بيقولو العجل وقع هاتو السكاكين

إلي بيحصل دة سبب للناس فوبيا من العربية بقى حتى إلي معندوش مشكلة بقى حاسس إن عنده مشكلة و ممكن يموت في أي لحظة

بالعقل كدة ازاي عربية فيها كل المشاكل ديه و ناجحة برة كدة إذا كان في أمريكا إلي هي أكبر سوق سيارات في العالم بيحسو بأي مشكلة مهما كنت صغيرة و كل يوم بنسمع عن عربيات في زيها هنا في مصر بتتسحب من أمريكا عشان عيوب احنا أصلاً مش حاسين بيها هنا في مصر ولا نعرف عنها حاجة

دة بجد بيفكرني بالافتكاسات إلي كنا بنسمعها على ال-megan و على الفورد فوكس إن لما ecu unit بتاعتها بتبوظ العربية بتتقلب

**mastr_n** · 07-12-2009 08:55 AM

يا جماعة بلاش تخافوا من كل الكلام الى بيتقال عليها واية الى يخلينا نسدق ان الكلام دة اصلا صحيح مش جايز المنافسين عاملين الكلام دة ومجندين ناس فى المنتديات على شان تقلل نسبة مبيعات العربية ممكن بل اكيد لان الدنيا خلاص ماعدش فيها امان
وانصح اى واحد معاة العربية يستمتع بيها ويقتنع بيها بس يستخدمها فى الخير وربنا هايباركلة فيها ان شاء اللة

**dr_k** · 07-12-2009 05:41 PM

انا شايف ان الموضوع زاد عن حده قوى الصراحة المؤيد متمسك برايه والمعارض متمسك برايه
وبصراحة انا بلوم على اخونا المهندس غازى انه نزل الموضوع ده او استعجل فيه لان سبب الحادثة مش مفهوم لحد دلوقتى بالتالى خلى الناس تحلل وتتفزلك واللى مش فاهم بتكلم ويجيب السبب ع العربية وبصراحة عمل رعب شديد
ومش معنى واحد عمل حادثة بعربية تبقى وحشة حتى لو كان السبب اهبل ومينفعش يطلع من العربية دى (مش نوع محدد)
وكمان اسلوب الكلام بقى غير لائق شكلا ومضمونا
نلاقى بعض الاعضاء بيتكلمو مع بعض زى ما يكون اعداء
ونلاقى ناس بتهاجم عربية هجوم شرس
مع ان اهدف من المنتدى مش كدة خالص
بصراحة المفروض النظام يكون كالتالى
لو بنتكلم على عربية نقول المميزات والعيوب بحيادية تامة ويفضل بشدة ان الكلام يكون من الاعضاء الملاك للنوع واللى جربوها كويس وفهموها
وياريت ما نقولش ان كذا ده عيب الا لو تكرر مع الملاك حتى لا تلتبس الحالات الفردية بالعيوب الشائعة
وحتى نصل للهدف وهو افادة اللى عايز يشترى عن طريق عرض المميزات والعيوب دون التاثير بالهجوم الشرس والتاييد المتشدد على راى القارئ لان دى فلوس ناس
اما لو واحد عنده شكوى ففى موضوع مخصوص للشكاوى يعنى ما نلاقيش واحد عامل موضوع يشتكى فيه من حاجة
والبنسبة للعيوب المشتركة عند الاعضاء تقديم شكوى جماعية للمختصين وانا شايف الصراحة ان الناس متجاوبة جدا فى توكيل كيا
اتفقنا؟
لكم خالص الاحترام

**waseemhesham** · 07-12-2009 05:44 PM

يا جماعة أنا معاكم فى كل
اللى قولتووه, انا معايا العربية sx , و الحمد لله مبسوط بيها جدا, بس انا بردو عايز الناس تعذر الاستاذ محمد غازى لأن اللى حصله كان حادثة جامدة و هو فى الأول و فى الأخر خايف علينا و أنا بجد بشكره لاهتمامه, الراجل محبوس فى كرسى بعجل و بيكتب باييد واحدة و مع ذلك دخل و شاركنا مشكلته عشان خايف علينا فشكرااا جدا له.

بالنسبة بقى للحادثة فأنا شايف ان لما المقص يتكسر على سرعة 100 أكيد الطبيعى العربية تتقلب, أما الناس اللى شايفة ان المقص يتكسر ده عيب فى العربية فده اكيد مش صح, الحفرة اللى العربية خدتها و بسرعة 100 أكيد ليها عامل كبير جدا و كمان مننساش ان قضاء ربنا أكبر من اى عربية و عشان اوصل و جهة نظرى هحكيلكم حكاية غريبة شوية ملهاش علاقة بالعربيات:

كان معايا موبيل نوكيا وقع من الدور السابع و محصلوش أى حاجة!!!! و موبيل نوكيا تانى وقع من ايدى و انا واقف فى الشارع و الشاشة اتكسرت!!! الفرق بس قضاء ربنا

حفرة بيمشى عليها عربيات كتييير كل يوم و من ضمنهم نيو سيراتو و محصلهمش حاجة و فجأة عربية واحدة بس المقص اتكسر على الحفرة, بس عشان قضاء و قدر !!!

**NoRmAl** · 07-12-2009 07:24 PM

[quote]الى راكب عربية غيرها بنفس الثمن ومافيهاش الكماليات والاوبشن دة هايجنن طب ازاى؟ واللى راكب عربية اعلى منها فى التمن وماعندوش الكماليات الى فيها بردة هايجنن طب لية؟/quote]
هو ده بالظبط الى حاصل

**elmoski** · 07-12-2009 07:25 PM

المشاركة الأصلية كتبت بواسطة medo_sirion

بس كلام حضرتك بيدل ان العربية مفهاش عيوب

حضرتك انا لو شايف ان العربية مفيهاش عيوب مكنتش اديتها 8.5 من 10 وثانيا مفيش حاجة كاملة 100% لكن العيوب اللي انا قصدتها متستاهلش كل الهجوم اللي علي السيارة...الحاجة الوحيدة اللي ملحوظة في العربية هي عفشتها ناشفة حبة ودي بتتظبط مع الوقت وكمان ليها حلول ممكن تقلل ضغط الكاوتش وتحط نيتروجين مش هتحس ساعتها بموضوع العفشة ده اطلاقا...لكن بقي تلاقي واحد يقولك سخونة في الكونسول وبتولع علي الطريق وبتعمل ارجوز بجد ده كلام فاضي وهقول تاني العربية ممتازة والي عاوز يشتريها ميترددش بجد.