الفترة الماضية بدأت كفائة التكييف عندى تقل جامد عن الأول لدرجة انى النهاردة كنت سايق وقت الظهر و مشغل التكييف على آخره و المروحة على رقم 3 و حاسس ان الدنيا حر ... قبل كدة كان نفس الوضع دة فى نفس فترة الظهيرة بيخلينى سقعان ... فكرت أروح أكشف على الفريون رغم عدم اقتناعى انه ممكن يكون ناقص لأن العربية بقالها معايا سنة واحدة فقط ... و بعدين قلت أجرب تنظيف فلتر هواء الصالون الأول (يوجد فلتر فى دورة التهوية لتنقية الهواء الداخل للصالون من الأتربة و عوادم السيارات) ... الفلتر دة بالنسبة للهوندا سيتى موجود خلف درج التابلوه السفلى و فكه سهل جداً (مشروح فى الكتالوج) .. ممكن مكانه يختلف من سيارة لأخرى لكن أكيد مكتوب فى الكتالوج ... المهم قمت بفكه فى أقل من دقيقة و رحت لأقرب ورشة كاوتش و اديته للفنى ينظفه بالهواء ... طلع كمية تراب مهولة لا يمكن تخيلها (هو دة الهوا اللى بنتنفسه فى شوارعنا!) و اديتله 2 جنيه و أخدته ركبته تانى و جربت التكييف ... ثلاجة! و عند درجة 1 أو 2 فقط ... حل بسيط و سهل جداً و مبيتكلفش حاجة ... جربه الأول قبل ما تبدأ تشوف قصة الفريون و الكلام دة كله