الموضوع: واجا ولا برسونا

المشاركة الأصلية كتبت بواسطة samehrashed

وياريت يا جماعة لو أي حد سواء معاه واجا أو برسونا يخليني أقابله وأسأله بنفسي وأسمع صوت العربية وأركبها معاه علشان أحس بيها.. علشان فعلاً أقتنع 100% وما قولش يا ريتني.. دي عربية مش كيس مناديل..

انا معايا واجا 2009 ولو عايز تشوفها في أي وقت أنا تحت أمرك

المشاركة الأصلية كتبت بواسطة samehrashed

يا جماعة أنا كنت في معرض العجوزة النهاردة.. وشفت البرسونا 2010 والواجا 2009 علشان الـ 2010 لسة ما جاتش..
أنا عاوز رأيكم في الآتي:
1- لاحظت إن تقفيل البرسونا أحسن من الواجا (مع ملاحظة فرق سنة الموديل):
مثلاً تبطين غطا الشنطة مش موجود في الواجا.. وكمان فيه سلك ظاهر وماشي جنب دراع غطا الشنطة مع إنه كان ممكن يمر من داخل الدراع المجوف.. في البرسونا مش ظاهر خالص.. كمان الموتور في البرسونا متحزم من فوق بقضيب عرضي واصل بين الرفرفين من مكان تثبيت المساعدين.. علشان تثبيت مقدمة العربية مع بعضها بالعرض.. في الواجا مش موجود.. شكل حوض الموتور وتوزيع المكونات فيه مش عارف ليه حسيت إنه مرتب ومنظم في البرسونا عن الواجا.. أكرة باب السائق في الواجا بتعلق.. بتفتح لكن الدراع الصغير اللي انت بتحركه بيفضل متعلق ثواني قبل ما يرجع تاني مكانه.. ومسؤول المعرض قالي ده من تسريب مياه الغسيل داخل الباب.. طبعاً تفسير أسوأ كتير من إنها بتعلق.. لأن ده معناه كارثة في الأكر أو الإزاز أو السنتر أو كل دول بعد كام غسلة للعربية.. إذا كانت لسة في المعرض وحصل لها كدة..
2- في المقابل الواجا أوسع.. فرق بسيط قوي في عرض الكنبة الخلفية.. وفرق أوضح شوية في المسافة الطولية علشان في البرسونا الشنطة أعمق فضاغطة على الصالون وواخدة من المسافة بين السائق أو الراكب الأمامي والكنبة الخلفية فضيقة حوالي 10 سم عن الواجا..
وكمان الواجا أعلى قليلاً عن البرسونا.. يمكن العتب اللي في البرسونا مخليها تبدو أقل في الاترفاع لكن الفرق واضح أكتر في مقدمة العربية.. البرسونا بتصميمها تلاقيها مايلة شوية ناحية الأرض من قدام.. صحيح الرفق بسيط قوي يمكن ما يزيدش عن 2 أو 3 سم لكنه يفرق لصالح الواجا خصوصاً إن المقدمة دي اللي فيها الموتور يعني أخطر جزء بيقابل مطبات وحجارة وبلاوي في شوارعنا..
3- فيه حاجات تانية أنا مش عارف أحكم عليها.. زي مكونات وتصميم العفشة.. في الموديلات السابقة للواجا كانت نسخة من ميتسوبيشي.. موتور وعفشة وفتيس ومكونات أخرى.. دلوقتي الموتور كامبرو لكن هل بقية المكونات لسة ميتسوبيشي؟؟ يعني عفشتها والمساعدين وتيل الفرامل أو الجنوط وغيره لسة ميتسوبيشي؟ ولا بقت نسخة من الجين والبرسونا زي الموتور؟ المسألة دي مهمة علشان قطع الغيار ومدى انتشارها.. انتو طبعاً عارفين إن حاجة الجين والبرسونا دلوقتي موجودة كتير.. أما الواجا فالعربية نفسها مش منتشرة.. فلو قطع غيارها زيهم يبقى شيء رائع.
4- أنا دورت العربية وسبتها دايرة حوالي 7 دقايق ولاحظت إن صوت الموتور مسموع حتى بعد ما العربية سخنت.. صحيح الصوت قل شوية بعد 4 دقايق تقريباً.. لكنه برضه مسموع وواضح من جوا العربية والإزاز كله مقفول.. والأهم إن فيه زنة أو ورررة غريبة حسيتها بوضوح ومسمعة في الكرسي كمان.. والمسؤول اللي في المعرض بقى مش عارف يقولي عليها إيه.. أول ما دورت العربية قال لي علشان لسة بتسخن.. وبعد كدة لما الصوت قل شوية لكن الورررة فضلت موجودة اضطر يقولي ده بس علشان المكان هادي وساكت فالإحساس بالصوت وذبذبة الموتور
عالي.. طبعاً كان رد مش مقنع.. هل فيه حد عنده معلومة عن الحكاية دي؟

أجو الإفادة يا جماعة علشان أنا رحت معرض العجوزة وشبه مقرر إني أحجز برسونا ولما شفت الواجا بصراحة غيرت رأيي لأني لقيتها فخمة جدا ومش كلاسيكية قوي زي ما كنت متخيل أو زي ما باشوفها في الشارع.. بالعكس أنا شفتها بي إم.. بدون مبالغة أنا حسيت إني واقف قدام بي إم ولما قعدت فيها زاد إحساسي بالفخامة وإني راكب عربية كبيرة في الحجم والمقام.. مع إني لسة شايف برضه إن البرسونا أشيك وشبابية أكتر وانسيابية..


معلش أنا طولت عليكم.. لكن أنا حيرتي زادت :b4_592: خصوصاً إن اتساع الواجا ميزة علشان أنا معايا زوجتي وثلاث أولاد بيكبروا بسرعة (أسرع من بقية الأطفال!!!) فهل ملاحظاتي على تقفيل الواجا أو بالأصح الاهتمام الواضح اللي شفته في تقفيل وإتقان البرسونا صحيحة؟ وتستاهل إني أتنازل عن الفرق البسيط في الاتساع وآخد البرسونا؟ ولا أستنى الواجا 2010 وأشوفها يمكن يكونوا حسنوا تصنيعها وتقفيلها زي ما عملوا في البرسونا؟ وهل حد يعرف هي نازلة إمتى؟ علشان في التوكيل قال لي مش عارفين والموجودة (2009) عليها تخفيض 3000.. ففهمت إنه مش عاوز يقول لي الجديدة نازلة إمتى..
ما رأيكم يا وحوش البروتون.. برسونا ولا واجا.. وإيه الفروق بالتفصيل بعد إذنكم وأشكركم مقدما..

المشاركة الأصلية كتبت بواسطة samehrashed

أشكرك يا باشمهندس
يعني حضرتك تنصح بالانتظار 4 شهور لما تيجي الواجا الجديدة وبعدين أقرر؟
الحقيقة أنا مش ميال لدي أو لدي.. كل الحكاية إني شايف تقفيل واهتمام وتلافي لعيوب التشطيب في البرسونا زائد شياكة وانسيابية وحجم مش كبير.. مقابل فخامة خارجية وصالون أشيك وتابلوه مريح أكتر للعين (وجهة نظر شخصية) واتساع في الواجا.. يعني أنا أمام ميزات مختلفة عن بعضها..
وكمان فيه حاجات ما اقدرش أحكم عليها .. حاجات فنية شوية.. زي مسألة الذراع الحديد اللي ماسك العربية بالعرض فوق موتور البرسونا.. ويقابلها ارتفاع مقدمة الواجا عن الأرض مقارنة بالبرسونا..
وصوت الورررة اللي سمعتها في موتور الواجا.. للأسف مارضيوش يدورو البرسونا علشان أعرف موجودة برضه ولا لأ..
دي حاجات أنا مش متأكد منها بالطبع.. ومش عارف أنهي أفضل فيهم.. فاهمني يا جماعة؟؟
علشان كدة أنا محتار.. مش مسألة ارتياح شخصي وخلاص.. الاترياح أو عدمه يبقى في الشكل والمظهر .. لكن في النواحي الفنية أو الخامات أو توافر قطع الغيار أو صوت الموتور ..إلخ.. دي محتاجة آراؤكم يا خبراء البروتون..
طيب حضرتك بتقول جربت الاتنين.. ولقيتهم قريبين من بعض.. في الحالة دي هل تشوف إن فارق الاتساع والفخامة اللي في الواجا يوازي فارق الانتشار ووجود قطع الغيار وفرق الإتقان اللي لاحظته في البرسونا؟ لو ده صحيح تبقى الواجا طبعاً.. ولا إيه؟

المشاركة الأصلية كتبت بواسطة samehrashed

يا جماعة أنا اتصلت من دقايق بتوكيل الصحراوي علشان أسأله فيه واجا 2010؟ وزفوجئت بإن اللي بيرد عليا هو الأستاذ/ محسن صالح.. الحقيقة أول مرة أكلمه.. راجل في منتهى الذوق فعلاً..
المهم إنه قال لس واجا 2010 ما نزلتش.. ومش قبل شهر مارس أو أبريل اللي جاي..
المعلومة التانية المهمة إنها فيها abs وفيها كل حاجة زي البرسونا.. بس جاله موبايل وأنا باكلمه فما لحقتش أسأله عن العفشة أو قطع الغيار وهل هي هي ولا مختلفة..
أنا بس حبيت أوضح المعلومات دي اللي جت بالصدفة حالاً..
وفي انتظار آراء السادة أصحاب الواجا أو اللي جربه الاثنين علشان نستفيد..
هل فعلاً الفرق الوحيد بس في الاتساع.. ولا فيه فروق تانية وهل أنا صح في ملاحظتي امبارح في معرض العجوزة إن دقة وإتقان البرسونا أعلى من الواجا؟ ولا إيه؟

المشاركة الأصلية كتبت بواسطة samehrashed

طيب يا جماعة فيه حاجتين:
الأولى إن أخونا إسلام معاه واجا 2009 وبيقول إن صاجها ضعيف مقارنة بالواجا القديمة وكمان بعربيات تانية.. وده فكرني إني في المعرض كنت بارفع وبانزل غطا الشنط وغطا الكبوت (الموتور) بصعوبة لأنهم تقال جدا..
في الواجا أنا رفعت غطا الشنطة بكل سهولة وكمان لما رفعته لقيته مش متبطن والصاج بتاعه فعلاً مش مليان.. وكمان باين فيه التقسيمات بتاعته ظاهرة وواضح إنها رفيعة.. ولما جيت أقفله كان خفيف وكذلك الغطا الأمامي.. مش أنا اللي فتحته لكن لما قفلته كان خفيف برضه مقارنة بالبرسونا.. فما رأيكم؟؟؟؟

الحاجة التانية: ما حدش جاوبني على مسألة العفشة والمكونات في الواجا الجديدة (2009) هل لا تزال هي هي بتاعة ميتسوبيشي؟ ولا اتغيرت زي الموتور؟ أحد الأخوة قال إن المساعدين الخلفيين ونظام التعليق الخلفي شبه الميتسوبيشي ومافهمتش يعني "شبه الميتسوبيشي"؟ زميل تاني (أعتقد المهندس رفيق لو أنا مش ناسي) قال لأ العفشة الخلفية إنجليزي من لوتس..
ياريت لو حد يعرف يدلنا هل عفشة الواجا ونظام التعليق فيها مختلف عن البرسونا؟ ومختلف بحيث هو بتاع الميتسوبيشي ولا مختلف انجليزي ولا مش مختلف وهو هو.. والمهم في المسألة دي مدى توافر أي قطعة لو الواحد احتاج حاجة..
آخر حاجة معلش.. هي البرسونا مافيهاش abs ولا ebd؟
أنا جبت البروشور بتاعها وبتاع الجين من المعرض امبارحولقيت مكتوب فيه إن الجين موجود فيها أما البرسونا فمش مذكور.. وده اللي قاله أحد الزملاء إن البرسونا مفيهاش.. فهل ده صحيح؟
وبعدين موتور البرسونا والجين فيهم فلتر الهوا iafm والواجا لأ؟؟ هل ده صحيح؟ يعني الواجا لسة بتنزل بالموتور الكامبرو القديم؟
منتظر ردود عمالقة البروتون أستاذ مهاب والأخ توت والسادة الأعزاء أصحاب البرسونا..

المشاركة الأصلية كتبت بواسطة samehrashed

فعلاً محتاجين منك يا أستاذ أحمد موضوع عن اختيار الواجا وتجربتك معاها.. ويدخل معاك كمان الزملاء أصحابها وكل واحد يقول تجربته وتقييمه بعد ما ركبها فترة..

وكمان محتاجين نتأكد من السادة خبراء البروتون.. هل فعلاً الفلتر الجديد مش موجود في الواجا؟ وكمان مفيهاش ebd مع إني أسمع إن ال abs وال ebd بيبقوا مع بعض يعني تقريباً جهاز واحد بيتركب مرة واحدة.. مش عارف ده صح ولا لأ..

أما مسألة الصاج ومنشأ العفشة فمحتاجة تدخل مباشر وسريع من الأستاذ أيمن.. هو اللي هايقول الخلاصة.. قطع غيار الواجا "الجديدة" موجودة ولا لأ.. ومشابهة للجين أو غيرها ولا لأ؟
وصاج الواجا الجديدة أضعف فعلاً من البرسونا؟؟
بس خدوا بالكم با جماعة المسألة مش سمك الصاج وبس.. بتفرق كتير لو العربية مدعمة بقوايم أو قضبان جانبية من داخل الصاج.. فهل ده موجود في الاتنين؟
وكمان تصميم العربية وطريقة تقسيم الأجزاء وتوزيعها على هيكل العربية.. يعني مثلاً لو الرفرف مجرد قطعة مربعة تنتهي عند الزجاج الخلفي غير لما يكون قطعة واحدة ممتدة من الإكصدام حتى باب العربية.. بتفرق في متانة وتحمل الرفرف وتأثر بقية جسم العربية بأي خبطة والأهم إنها بتفرق في سهولة تصليحه أو استعداله أو حتى استبداله..
يعني مثلاً.. وباقول مثلاً.. يمكن يكون تقسيم جسم الواجا أفضل مثلاً من البرسونا في حالة لا قدر الله خبطة كدة ولا كدة.. وهنا ييجي الصاج وسمكه وهل يصمد أمام الخبطة في البرسونا مقابل سهولة التصليح في الواجا أم لا؟ ده طبعاً بافتراض إن الاتنين ليهم نفس التدعيم من الداخل.. أنا ماعرفش..
متهأيلي المسائل دي كلها محتاجة توضيح من خبراء البروتون الكبار.. التجربة والتقييم والعيوب الظاهرة العادية ممكن نعرفها من بعض..
لكن النواحي الفنية دي والفروق بينها هي دي اللي عندها تكون الكلمة للوحوش الكبيرة.. ديناصورات البروتون.. فياريت يردو علينا ويعرفونا علشان تتحقق فائدة حقيقية من الموضوع ده ..

اهلا بيك أ سامح .. اشكرك على رسالتك و سؤالك على صحه الوالد " الحمد لله بخير "

حضرتك لو حابب تكلمنى فى اى حاجه تحت امرك .

ححاول اجاوب على النقط الى بتسال عليها على قد معرفتى


1- فى اكتر من عضو معانا قال ان الواجا كخامات و تقفيل افضل نسبيا ... لكن كشكل ديه حاجه نسبيه بتختلف من شخص للاخر و فى ناس شايفه ان الواجا داخليا افضل و ناس شايفه ان البيرسونا افضل ... و الجانبين معاهم حق طبعا لان ليهم ازواق مختلفه .

2- عربيات كتير فى بروتون بتعانى من عيوب التقفيل ... الى معظمها ان مكانش كلها بيتعالج فى الصيانه الواجا و البيرسونا مش استثناء , ديه حاجه معروفه لينا جميعا و كل الناس الى بتشترى جديد بتبقى عارفه الموضوع ده بس بشهاده ناس شغاله فى التوكيل الواجا مشاكلها و الشكوى منها عموما قليله .

3- صالون الواجا اوسع نسبيا من البيرسونا ... بحكم اختلاف التصميم .. تصميم سقف و جوانب الواجا من الخلف اعرض و اكبر و اعلى البيرسونا ... الى هى اساسا جين 2 سيدان ف نفس خطوط التصميم الرياضيه مأثره على مساحه الصالون .

4- مكونات و تصميم العفشه فى الواجا الجديده ... بأكدلك انه هو هو زى الواجا الى معايا " الشكل القديم " عفشه الواجا الخلفيه زى الانسر ... علبه الدركسيون بنسبه 90 % هى هى الى فى الانسر ... العفشه الاماميه مختلفه .

يعنى سواء الواجا القديمه او الجديده الاجزاء المشتركه مع الانسر العفشه... العفشه الخلفيه و علبه الدركسيون ... غير كده الحاجات التانيه مختلفه .

* توضيح بخصوص الشاسيه و العفشه .... شاسيه الواجا .. تعاون مشترك مابين فولفو و ميتسوبيشى و بروتون ... العفشه بالكامل يابانى كمكونات و بتصميم و هندسه لوتس ..... المساعدين و علبه الدركسيون و مضخة الباور kyb .... اقراص الفرامل و الرولمان بلى ntn يابانى ....... ديه الحاجات الى قدرت اعرفها لحد دلوقتى بخصوص العفشه .

.... الموتور و الفتيس فقط فى الواجا الجديده هما الى قطع غيارههم زى الجين و البيرسونا...


5 - صوت الموتور هو هو واحد سواء فى الواجا الجديده و البيرسونا والجين لانهم بنفس الموتور .... مع اختلاف ان الواجا فلتر هواء الموتور زى فلتر هواء الواجا القديمه بموتور ال 4g18 .و مختلف عن فلتر الجين 2 الشكل القديم و الجين 2 و البيرسونا iafm .

هو عموما صوت الموتور عالى شويه لكن مش لدرجه انه يكون مزعج .

6- الواجا و البيرسونا الفل اوبشن فيهم abs +ebd


7- قطع غيار الواجا عموما متوافره فى محلات بروتون جديده و فى الحرفين استيراد ... الحاجات الى مش حتلاقيها للواجا الجديده بره هى الكبوت و الاكصدام الامامى و الفانوس فقط .. و فى اسواء الاحوال كبوت الواجا القديمه والاكصدام و الفانوس يركب على الجديده من غير مشاكل . و باقى الاجزاء كلها متوافقه مع الواجا القديمه .. و بالنسبه للموتور متوافقه مع الجين2 .

* نفس مشكله قطع الغيار ديه اساسا فى الجين 2 الجديده .. ملهاش فوانيس اماميه ولا اكصدام بره التوكيل و زميلنا اسلام لما عمل حادثه جاب الاكصدام بتاع الشكل القديم للجين" 2006 " و ركبه فى عربيته " موديل 2009 " .. و جاب فانوس و رشه اسود .

و البيرسونا مش احسن حالا بل اسوا .... لانها ملهاش لا اكصدام خلفى ولا اكصدام امامى ولا شنطه ولا ازاز خلفى بره التوكيل " و حتى مكانوش متوافرين فى التوكيل و زميلنا فى المنتدى ( مُحب ) لما عمل حادثه اضطر يسمكر الشنطه و يصلح الاكصدام لانهم مكانوش موجودين فى اى مكان ولا فى التوكيل ولا استراد .

8 - واجا 2009 او 2010 مش حيكون فى اختلافات جوهريه " و بنسبه 99 % مش حيكون فى اى اختلافات ولا حتى بسيطه " .



* بيرسونا ولا واجا ... حضرتك الى ليك الاختيار الاخير " لاننا كلنا ازواقنا و اختيارتنا مختلفه انا حديك رأيى و غيرى حيديك رأيه و مش لازم ان ارائنا تكون مناسبه ليك " و عموما متحسبهاش كتير لان سواء البيرسونا او الواجا ليهم مميزاتهم و ليهم عيوبهم ....المهم انهى الى عاجبك اكتر و انهى الى مناسب لزوقك و احتياجاتك .

حاجه اخيره.... حاول برده تبص على السيراتو ,صنى , لانسر , اوبترا . خد فكره عنهم ممكن حاجه منهم تعجبك اكتر من الواجا و البيرسونا .

علاشان لما تستقر على عربيه و تشتريها تكون مقتنع 100 % بقرارك .


لو فى اى استفسار تانى تحت امرك .